சென்னை: சூப்பர்ஸ்டார் ரஜினிகாந்த் பிறந்தநாளன்று அவரது அடுத்த பட அப்டேட்கள் வரும் என எதிர்பார்க்கப்படுகிறது. நடிகர் ரஜினிகாந்த் வரும் டிசம்பர் 12ஆம் தேதி தனது 74வது பிறந்தநாளை கொண்டாடுகிறார். ரசிகர்கள் டிசம்பர் முதல் வாரத்திலிருந்தே ரஜினிகாந்த் பிறந்தநாளை கொண்டாடுவது வழக்கம். அதுவும் இது ரஜினிகாந்த் சினிமாவில் நடிக்க வந்து 50வது ஆண்டுகள் என்பதால் இன்னும் கொண்டாட்டங்கள் ஸ்பெஷலாக உள்ளது.
இது ஒருபுறம் இருக்க, லோகேஷ் கனகராஜ் இயக்கத்தில் ரஜினிகாந்த், நாகார்ஜுனா, உபேந்திரா, சத்யராஜ், ஸ்ருதிஹாசன் உள்ளிட்ட பலர் நடித்து வரும் திரைப்படம் ’கூலி’. சன் பிக்சர்ஸ் தயாரிக்கும் இப்படத்திற்கு அனிருத் இசையமைக்கிறார். இப்படத்தின் ப்ரோமோ வெளியானது முதல் பெரும் எதிர்பார்ப்பை ஏற்படுத்தியுள்ளது. லோகேஷ் கனக்ராஜ் கூலி திரைப்படம் ’LCU’ யுனிவர்சில் இல்லாமல் தனிப்படமாக இருக்கும் என அறிவித்துள்ளார்.
இந்நிலையில் ரஜினிகாந்த் பிறந்தநாளன்று செகண்ட் லுக் அல்லது டீசர் வெளியாகும் என எதிர்பார்க்கப்படுகிறது. இது மட்டுமில்லாமல் ’ஜெயிலர் 2’ படத்தின் அப்டேட்டும் வெளியாகும் என எதிர்பார்க்கப்படுகிறது. முன்னதாக நெல்சன் இயக்கத்தில் ரஜினிகாந்த் நடிப்பில் வெளியான ஜெயிலர் திரைப்படம் 600 கோடிக்கு மேல் வசூல் செய்து பாக்ஸ் ஆபிஸில் மாபெரும் சாதனை படைத்தது.
இதனால் ஜெயிலர் 2 திரைப்பட அறிவிப்பு தடபுடலாக வெளியாகும் என தெரிகிறது. கடந்த சில நாட்களுக்கு முன் சன் பிக்சர்ஸ் நிறுவனம் ஜெயிலர் படத்தை breaking bad வெப் சீரியஸுடன் ஒப்பிட்டு ஒரு பதிவை வெளியிட்டனர். இது ’ஜெயிலர் 2’ அறிவிப்பை மறைமுகமாக கூறுவது போல் அமைந்தது.
இதையும் படிங்க: எக்ஸ் பக்கத்தில் இருந்து திடீரென விலகிய விக்னேஷ் சிவன்... காரணம் என்ன?
டிசம்பர் 12ஆம் தேதி மணிரத்னம் இயக்கத்தில் ரஜினிகாந்த் நடித்த கல்ட் கிளாசிக் படமான ‘தளபதி’ ரீரிலீஸ் செய்யப்படுகிறது. அதே நேரத்தில் ரஜினிகாந்த் கூலி படத்தை தொடர்ந்து மணிரத்னம் இயக்கத்தில் நடிக்கப் போகிறார் எனவும் கோலிவுட் வட்டாரத்தில் செய்திகள் உலா வருகிறது. இதனால் ரஜினிகாந்த் பிறந்த தினத்தை ரசிகர்கள் எதிர்பார்த்து உள்ளனர்.
