சென்னை: நடிகர் மற்றும் இசையமைப்பாளர் விஜய் ஆண்டனி நடிப்பில் உருவாகும் அவரது 25வது படத்தின் தலைப்பு மற்றும் போஸ்டர் அதிகாரப்பூர்வமாக வெளியாகியுள்ளது. இந்த படத்திற்கு தமிழில் ’சக்தித் திருமகன்’ எனவும் தெலுங்கு, ஹிந்தி உட்பட மற்ற மொழிகளுக்கு ’பராசக்தி’ எனவும் பெயர் வைக்கப்பட்டுள்ளது.
இந்த படத்தை விஜய் ஆண்டனியே இசையமைத்து தயாரிக்கிறார். 'அருவி' பட இயக்குநர் அருண் பிரபு இப்படத்தை எழுதி இயக்குகிறார். மலையாளம், தெலுங்கு, ஹிந்தி, கன்னடம் என பல்வேறு மொழிகளில் தயாராகும் இந்த படம் கோடை விடுமுறைக்கு வெளியாவதாக அறிவித்துள்ளனர்.
2012ஆம் ஆண்டு வெளியான 'நான்' திரைப்படத்தின் மூலம் இசையமைப்பாளராக இருந்த விஜய் ஆண்டனி முழு நேர நடிகராக மாறினார். தொடர்ந்து பல படங்களில் நடித்தார். அவரது நடிப்பில் உருவான ‘பிச்சைக்காரன்’ திரைப்படம் தமிழில் மட்டுமல்லாமல் தெலுங்கிலும் மிகப்பெரிய வெற்றியை பெற்றது. அதைத் தொடர்ந்து 'பிச்சைக்காரன்' இரண்டாம் பாகத்தில் இயக்குநராகவும் படத்தொகுப்பாளராகவும் களமிறங்கினார் விஜய் ஆண்டனி.
விஜய் ஆண்டனி நடிப்பில் அண்மையில் வெளியான 'ரோமியோ', 'மழை பிடிக்காத மனிதன்' மற்றும் 'ஹிட்லர்' ஆகிய படங்கள் மக்களிடையே கலவையான விமர்சனங்களையே பெற்றன. எதிர்பார்த்த வெற்றியை பெறவில்லை. இந்நிலையில், விஜய் அருண் பிரபு இயக்கத்தில் உருவாகும் அவரது 25வது படமான 'சக்தித் திருமகன்' மீது எதிர்பார்ப்பு ஏற்பட்டுள்ளது.
புயலடிக்கிற வேகத்தில் புழுதி குப்பைங்க இருக்குமா🔥
— vijayantony (@vijayantony) January 29, 2025
இவன் நடக்குற வேகத்த சகுனிக்கூட்டம் தாங்குமா👺#VA25 @ArunPrabu_ @vijayantonyfilm pic.twitter.com/XCxjv95UVH
இப்படத்தின் அறிவிப்பு இன்று வெளியாகும் என விஜய் ஆண்டனி தனது எக்ஸ் தளத்தில் பதிவிட்டிருந்தார். அதன்படி, இப்படத்தின் தலைப்பு மற்றும் போஸ்டர், “புயலடிக்கிற வேகத்தில் புழுதி குப்பைங்க இருக்குமா, இவன் நடக்குற வேகத்த சகுனிக்கூட்டம் தாங்குமா” என்ற வாசகங்களுடன் வெளியிட்டுள்ளார் விஜய் ஆண்டனி. அருண் பிரபுவின் அருவி படத்தில் பணிபுரிந்த தொழில்நுட்ப கலைஞர்களான ஒளிப்பதிவாளர் ஷெல்லி, எடிட்டர் ரேமண்ட் ஆகியோரே இதிலும் பணியாற்றுகிறார்கள்.
கடந்த சில நாட்களாக சிவகார்த்திகேயனின் 25வது படத்திற்கு ’பராசக்தி’ என பெயர் வைக்கப்பட்டுள்ளதாக தகவல் வெளியாகி அதற்கு சிவாஜி சமூகநலப் பேரவை சார்பில் கண்டன அறிக்கையும் வெளியிடப்பட்டது. இந்நிலையில் விஜய் ஆண்டனி தமிழல்லாத மற்ற மொழிகளுக்கு தனது படத்தின் தலைப்பை ’பராசக்தி’ என வைத்திருப்பது குழப்பத்தில் ஆழ்த்தியுள்ளது. இதற்கும் சிவாஜி சமூகநலப் பேரவை சார்பில் கண்டனம் தெரிவிக்கப்படுமா என பொறுத்திருந்து பார்ப்போம்.
இதையும் படிங்க: தந்தை இறந்தும் பாடலை முடித்த லியோன் ஜேம்ஸ்... ’டிராகன்’ பட இயக்குநர் உருக்கம்
முன்பு ஒரு மொழியில் இருந்து மற்றொரு மொழிக்கு டப் செய்யப்படும் போது படத்தின் பெயரும் மாற்றம் செய்யப்படும். பான் இந்தியா படங்களின் வருகைக்கு பிறகு பெரும்பாலும் அத்தனை மொழிகளிலும் ஒரே பெயர் தான் பயன்படுத்தப்படுகிறது. ஆனால் விஜய் ஆண்டனியின் 25வது படத்திற்கு அவர்கள் சூட்டியிருக்கும் பெயரை பார்த்தால் அதுதான் நியாபகம் வருகிறது.
