பீகார்: ரத்த புற்று நோயால் பாதிக்கப்பட்டு, டெல்லி எய்ம்ஸ் மருத்துவமனையில் சிகிச்சை பெற்று வந்த பிரபல நாட்டுப்புற பாடகி சாரதா சின்ஹா(72) உயிரிழந்தார். 1952ஆம் ஆண்டு அக்டோபர் 1ஆம் தேதி பீகார் மாநிலத்தில், சுபல் மாவட்டத்தில் உள்ள ஹுலாஸ் கிராமத்தில் பிறந்தவர் சாரதா சின்ஹா.
1970களில் சாரதா சின்ஹா தனது நாட்டுப்புற இசைப் பயணத்தை தொடங்கினார். பின்னர் பாலிவுட் திரைப்படங்களிலும் பல்வேறு பாடல்களை பாடினார். குறிப்பாக 1994இல் வெளியான ‘Hum aapke hain koun’ என்ற படத்தில் இடம்பெற்ற பாபூல் பாடல் மிகவும் பிரபலமடைந்தது. மத்திய அரசு நாட்டுப்புற பாடகி சாரதா சின்ஹாவை கௌரவப்படுத்தும் வகையில் 2018இல் பத்ம பூஷன் விருது வழங்கியது.
நாட்டுப்புற இசையை பிரபலப்படுத்தும் நோக்கில் பீகார் மாநில அரசு சாரதா சின்ஹாவை மாநில கலாச்சார தூதராக நியமித்தது. சாரதா சின்ஹா பாடகராக மட்டுமின்றி, இசை பேராசிரியராகவும் பணியாற்றியுள்ளார். சாரதா சின்ஹா 2000ஆம் ஆண்டில் மிகவும் பெருமை வாய்ந்த sangeet natak akademi விருதை வென்றார். பின்னர் 2006ஆம் ஆண்டில் National ahilyabai sevi samman விருதை வென்றார்.
இதையும் படிங்க: ஓவியா அம்மனாக நடிக்கும் சேவியர் படத்தின் ஃப்ர்ஸ்ட் லுக் போஸ்டர் வெளியானது!
இந்நிலையில் கடந்த 2018ஆம் ஆண்டில் ரத்த புற்று நோயால் பாதிக்கப்பட்ட சாரதா சின்ஹா சில தினங்களுக்கு முன் டெல்லி எய்ம்ஸ் மருத்துவமனையில் அனுமதிக்கப்பட்டார். சாரதா சின்ஹா உடல் நலம் குறித்து பிரதமர் நரேந்திர மோடி அவரது மகன் அன்ஷுமன் சின்ஹாவிடம் தெலைபேசியில் தொடர்பு கொண்டு விசாரித்தார். இந்நிலையில் எய்ம்ஸ் மருத்துவமனையில் வெண்டிலேட்டர் சிகிச்சை பெற்று வந்த சாரதா சின்ஹா, நேற்று (நவ.05) சிகிச்சை பலனின்றி உயிரிழந்தார்.
ஈடிவி பாரத் வாட்ஸ்அப் சேனலில் இணைய இங்கே கிளிக் செய்யவும்
