ஐதராபாத் : மும்பையில் உள்ள பாலிவுட் நடிகர் சல்மான் கான் வீட்டின் முன் கடந்த ஏப்ரல் 14ஆம் தேதி அதிகாலை துப்பாக்கிச் சூடு நடத்தப்பட்டது. இரண்டு மோட்டர் பைக்கில் வந்த மர்ம நபர்கள் ஆறு ரவுண்டு துப்பாக்கிச் சூடு நடத்தி விட்டு தப்பி தலைமறைவாகினர். இந்த சம்பவம் தொடர்பாக மும்பை போலீசார் சிசிடிவி காட்சிகளை ஆய்வு செய்து விசாரித்து வருகின்றனர்.
இந்நிலையில், சல்மான் கான் வீட்டின் முன் நடத்தப்பட்ட துப்பாக்கிச் சூடு சம்பவத்திற்கு பிரபல தாதா லாரன்ஸ் பிஷ்னோயின் கும்பல் பொறுப்பேற்றுக் கொண்டதாக தெரிவிக்கப்பட்டு உள்ளது. நடிகர் சல்மான் கானுக்கு மிரட்டல் விடுத்து வெளியான பேஸ்புக் பதிவின் மூலம் உறுதி செய்யப்பட்டதாக மும்பை போலீசார் தெரிவித்து உள்ளனர்.
தாதா லாரன்ஸ் பிஷ்னோயின் தம்பி மற்றும் அமெரிக்காவை சேர்ந்த அன்மோல் பிஷ்னாய் பெயரில் பாலிவுட் நடிகர் சல்மான் கானுக்கு பேஸ்புக் மூலம் கொலை மிரட்டல் விடுக்கப்பட்டு உள்ளது. அந்த பதிவில், "அடுத்த முறை தாக்குதல் நிச்சயம் தவறாது" என தெரிவிக்கப்பட்டு உள்ளது. மேலும் அந்த பதிவில், "இது உங்களுக்கு ஒரு டிரெய்லரைக் காண்பிப்பதற்காகவே, எங்கள் சக்தியை உங்களுக்குப் புரிய வைப்பதற்காக இந்த தாக்குதல்.
இதுவே உங்களுக்கு முதல் மற்றும் கடைசி எச்சரிக்கை. அடுத்த முறை, தோட்டாக்கள் சுவர்கள் அல்லது காலி வீடுகள் மீது சுடப்படாது. தாவூத் இப்ராஹிம் மற்றும் சோட்டா ஷகீல் ஆகியோரை உங்கள் கடவுள்களாக நீங்கள் கருதுகிறீர்கள், ஆனால் எங்களிடம் இரண்டு நாய்கள் அவர்களது பெயரில் உள்ளன. இந்த குறிப்பு போதுமானது, மேலும் நான் எதுவும் சொல்ல விரும்பவில்லை" என்று சல்மான் கானுக்கு அன்மோல் தரப்பில் மிரட்டல் விடுக்கப்பட்டு உள்ளது.
முன்னதாக கடந்த ஆண்டு மார்ச் மாதம், சல்மான் கானை மிரட்டி மின்னஞ்சல் வந்தது. அதனைத் தொடர்ந்து மும்பை போலீசார் லாரன்ஸ் பிஷ்னோய் மற்றும் கோல்டி ப்ரார் ஆகியோரின் மீது எப்ஐஆர் பதிவு செய்தது குறிப்பிடத்தக்கது. இந்த சம்பவம் தொடர்பாக மும்பை போலீசார் தீவிர விசாரணை நடத்தி வருகின்றனர்.
இதையும் படிங்க : கேம்பைன் ஸ்டார்ட் பண்ணட்டுமா.. The G.O.A.T படத்தின் 1st சிங்கிள் வெளியானது! - THE GOAT 1ST SINGLE RELEASED
