ஹைதராபாத்: டோலிவுட் பிரபலம் அல்லு அர்ஜுன், தென்னிந்திய குயின் ராஷ்மிகா மந்தனா, மிரட்டல் வில்லன் பகத் பாசில் என உச்சகட்ட நட்சத்திரங்களின் நடிப்பில் கடந்த 2021ஆம் ஆண்டு வெளியான திரைப்படம் புஷ்பா தி ரைஸ். மைத்ரி மூவி மேக்கர்ஸ் தயாரிப்பில் உருவான இப்படத்தைன் சுகுமார் இயக்கி இருந்தார். தேவி ஸ்ரீ பிரசாத் இசையில் உருவான இப்படத்தின் பாடல்கள் படம் வெளியான தமிழ், தெலுங்கு, மலையாளம், கன்னடம் மற்றும் இந்தி என அனைத்து மொழிகளிலும் ஹிட் அடித்தது.
அது மட்டுமல்லாமல், சமந்தா சிறப்புத் தோற்றத்தில் ஆடியிருந்த ஊ ஆண்ட வா மாமா என்ற பாடலும், ராஷ்மிகா - அல்லு அர்ஜுனின் ஏ சாமி என்ற பாடலிலும் இடம்பெற்ற நடனங்கள் சிக்னேச்சர் மார்க்கை படத்தில் உருவாக்கின. அது மட்டுமல்லாமல், அல்லு அர்ஜுனின் நடிப்பும் ரசிகர்களைக் கவர்ந்தது. அதற்கு பரிசாக சிறந்த நடிகருக்கான தேசிய விருதையும் அல்லு அர்ஜுன் பெற்றார்.
இதனையடுத்து, புஷ்பா 2 தி ரூல் படப்பிடிப்பும் விறுவிறுப்பாக தொடங்கி நடைபெற்று வருகிறது. முதல் பாகத்தை போலவே மைத்ரி மூவி மேக்கர்ஸ் - சுகுமார் - அல்லு அர்ஜுன் - ராஷ்மிகா மந்தனா - பகத் பாசில் மற்றும் தேவி ஸ்ரீ பிரசாத் கூட்டணி இரண்டாம் பாகத்திலும் இணைந்து நடத்தி வருகிறது. இதன் படப்பிடிப்புகள் ஆந்திராவின் வனப்பகுதிகளிலும், ஹைதராபாத் ராமோஜி பிலிம் சிட்டியிலும் படமாக்கப்பட்டு வந்தது.
இதனிடையே, படத்தின் இயக்குநர் சுகுமார் - அல்லு அர்ஜுன் இடையே கருத்து வேறுபாடு ஏற்பட்டு புஷ்பா 2 படத்தில் விரிசல் ஏற்பட்டதாக கூறப்பட்டது. அதற்கு இணையாக எந்தவொரு அப்டேட்டும் படம் தொடர்பாக வெளியாகாமல் இருந்தன. இந்த நிலையில் தான், நேற்றைய முன்தினம் (ஜூலை 27) முதல் மீண்டும் புஷ்பா 2 படத்தின் படப்பிடிப்பு துவங்கி உள்ளது. ஹைதராபாத் ராமோஜி பிலிம் சிட்டியில் மீண்டும் தொடங்கியுள்ள படப்பிடிப்பில் அல்லு அர்ஜுன் தொடர்புடைய காட்சிகள் படமாக்கப்பட்டு வருவதாக தகவல் வெளியாகியுள்ளது.
முன்னதாக, புஷ்பா 2 படத்தில் இருந்து இரண்டு பாடல்கள் வெளியாகி ரசிகர்களிடம் நல்ல வரவேற்பைப் பெற்றது. அதிலும், ‘புஷ்பா புஷ்பா’ என்ற பாடம் இந்தியில் மட்டும் யூடியூபில் 70 மில்லியன் பார்வையாளர்களைக் கடந்துள்ளது. அதேநேரம், ஸ்ரீவள்ளி - புஷ்பராஜின் 'சூடான’ என்ற பாடலும் வெளியாகி ரசிகர்களிடம் வரவேற்பைப் பெற்று வருகிறது.
இதையும் படிங்க: கேஜிஎஃப் புகழ் யாஷ் படத்திற்கு புதிய சிக்கல்.. கர்நாடக நீதிமன்றம் நோட்டீஸ்!
