சென்னை: சங்கர் இயக்கத்தில் 1996ஆம் ஆண்டு கமல்ஹாசன் நடிப்பில் வெளிவந்த இந்தியன் படத்தின் இரண்டாம் பாகம் வெளியாக உள்ளது. தமிழ், தெலுங்கு, இந்தி உள்ளிட்ட மொழிகளில் பிரமாண்டமாக உருவாகி உள்ள இந்தியன் 2 படம் அடுத்த மாதம் 12ஆம் தேதி வெளியாக உள்ள நிலையில், ரிலீசுக்கு தயாராகி வருகிறது. கடந்த 2019ஆம் ஆண்டு தொடங்கப்பட்ட இப்படத்தின் படப்பிடிப்பு பல்வேறு பிரச்சினைகளுக்கு இடையே படமாக்கி முடிக்கப்பட்டுள்ளது.
படத்தின் நீளம் கருதி இந்தியன் 2 மற்றும் 3 என இரண்டு பாகங்களாகவும் படம் தயாராகி வருகிறது. இப்படத்தில் கமலுடன் பிரியா பவானி சங்கர், காஜல் அகர்வால், ரகுல் ப்ரீத் சிங், எஸ்.ஜே.சூர்யா சித்தார்த், பாபி சிம்ஹா, சமுத்திரகனி உள்ளிட்ட பலர் நடித்துள்ளனர். ரெட் ஜெயண்ட் மூவிஸ் மற்றும் லைக்கா புரோடக்சன்ஸ் நிறுவனம் இணைந்து தயாரித்துள்ள இப்படத்திற்கு அனிருத் இசையமைத்துள்ளார்.
இப்படத்தின் இசை வெளியீட்டு விழா, நேற்று 6 மாலை அளவில், சென்னையில் உள்ள நேரு உள் விளையாட்டு அரங்கில் நடைபெற்றது. இதில் பேசிய நடிகர் சிம்பு, 'லேட்டா வந்தேன் என்று நினைக்க வேண்டாம். தக் லைஃப் (Thug Life) படப்பிடிப்பில் இருந்து வந்தேன். சொன்னாலும் யாரும் நம்ப மாட்டார்கள். நான் லேட்டா வந்தேன் என்பார்கள். இந்தியன் எனக்கு ரொம்ப பிடித்த படம். கமர்ஷியல் படத்துக்கு ஒரு ஃபார்முலா வேண்டும் என்றால் இந்தியனுக்கு மேலே படம் இல்லை என்று தோன்றுகிறது.
இந்தியன் படம் எத்தனை முறை பார்த்தேன் என்று கணக்கில்லை. கமல் எனது குரு. அவரைப்பற்றி சொல்ல நிறைய இருக்கு. கமல் திரையில் குரு. அவருடன் இணைந்து நடிக்கும் பாக்கியம் கிடைத்துள்ளது. அந்த அனுபவம் பற்றி தக் லைஃப் மேடையில் சொல்றேன். சங்கருக்கு மக்களுக்கு பிடித்ததை செய்யும் தேடல் இருக்கிறது. கண்டிப்பாக சங்கர் நமக்கு பிடிப்பது போல்தான் பண்ணியிருப்பாரு. பெரிய படம் பண்ணுவது கஷ்டம். அவர் மூன்று படம் பண்ணியது பெரிய விஷயம் வாழ்த்துகள்.
தற்போது பெரிய படங்கள் மீது நம்பிக்கை வைத்து படம் எடுக்க தயாரிப்பாளர்கள் இல்லை. கொஞ்ச பேர்தான் உள்ளனர். லைக்காவுக்கு வாழ்த்துகள். ரகுமானின் இசை இப்போது வரை மறக்க முடியாது. இந்த படத்துக்கு இசை அமைக்க யாரிடம் கேட்டாலும் மாட்டேன் என்று சொல்லியிருப்பார்கள். ஓகே சொன்னது அனிருத் தான் கண்டிப்பாக நன்றாக செய்திருப்பார். நான் இன்னும் பாட்டு கேட்கவில்லை' எனத் தெரிவித்தார்.
மேலும் பேசிய அவர், 'நல்ல படங்களுக்கு உறுதுணையாக இருக்கும் ரெட் ஜெயண்ட் மூவிஸ்க்கு நன்றி. இந்த படம் மிகப்பெரிய வெற்றி அடைய வேண்டும். ட்ரைலர் பார்க்க ஆவலாக காத்துக்கொண்டு இருக்கிறோம். இந்தியன் என்ற தலைப்புக்கு சரியான ஆள் கமல் தான். அவர் எப்போதோ இந்தியன் மூலம் பான் இந்தியா படம் செய்துவிட்டார். இந்தியன் என்றால் ஒற்றுமை. நாம் ஒற்றுமையாக இருப்பதே பெருமையான விஷயம்.
ஒரு விஷயம் சொல்லலாம். மற்ற படங்களில் நடிக்கும் போது அடுத்த வசனம் பேசுவது மனதில் இருக்கும். கமலுடன் நடிக்கும்போது எதுவும் மனதில் இல்லை. அவரையே பார்த்துக்கொண்டு இருப்பேன். அவரைப் பற்றி பேச எனக்கு வயது இல்லை. விஸ்வரூபம் பிரச்சினை சமயத்தில், குளிக்காமல்கூட கமல் வீட்டுக்கு சென்றுவிட்டேன். நான் என்ன செய்கிறேனோ இல்லையோ, அவருடன் இருக்கலாம் என்று போனேன்.
நம் உடன் இருப்பவர்கள் நம்மை விட்டு போய் விடுவார்கள். கூடவே இருப்பது உடம்பு மட்டும் தான். உடம்பை சரியாக வைத்துக்கொள்ள வேண்டும் என்று நான் தாமதமாகத்தான் உணர்ந்தேன். உடம்பை விட்டுவிடாதீர்கள் பத்திரமாக பார்த்துக் கொள்ளுங்கள்' என்றார்.
இதையும் படிங்க: கமல்ஹாசனிடம் திட்டு வாங்கிய நெல்சன், லோகேஷ்.. இந்தியன் 2 விழாவில் சுவாரஸ்ய பகிர்வு! - Indian 2 Audio Launch
