திரையுலகில் 32 வருடங்கள்.. தனி ஆளாக ரசிகர்கள் மனதை வென்ற அஜித்குமார்.. கடந்து வந்த பாதை! - 32 years of ajithkumar - 32 YEARS OF AJITHKUMAR

32 years of ajithkumar: சினிமாவில் பிரபல நடிகர் அஜித்குமார் நடிக்க தொடங்கி 32 ஆண்டுகள் ஆனதை தொடர்ந்து, இதனை அவரது ரசிகர்கள் கொண்டாடி வருகின்றனர்.

அஜித்குமார் புகைப்படம் (Credits - ETV Bharat Tamil Nadu)

Published : Aug 3, 2024, 2:02 PM IST

சென்னை: தமிழ் சினிமாவில் எத்தனையோ நடிகர்கள் இருந்தாலும் தனது தன்னம்பிக்கை மற்றும் திறமையால் யாருடைய உதவியும் இல்லாமல் கோலிவுட்டில் தனக்கென தனி ரசிகர்கள் பட்டாளத்தை உருவாக்கியவர் நடிகர் அஜித் குமார். ஆசை நாயகனாக அறிமுகமாகி அடுத்தடுத்த வெற்றிப் படங்களால் தற்போது கோலிவுட்டில் தவிர்க்க முடியாத நடிகராக உள்ளார்.

சென்னையில் அஜித்குமார் 10ஆம் வகுப்பு படிப்பை முடித்தார். பின்னர் அப்பாவின் நண்பர் ஒருவர் நடத்திய எக்ஸ்போர்ட் நிறுவனத்தில் சூப்பர்வைசர், அதன் பிறகு சென்னிமலை, ஈரோடு நகரங்களில் இருந்து பெட்ஷீட் வாங்கி வந்து சென்னையில் விற்பனை செய்த பிசினஸ் மேன் என அஜித்தின் ஆரம்ப கால வாழ்க்கை வித்தியாசமான பயணமாக இருந்தது.

அதன்பிறகு சில விளம்பரங்களில் நடித்த அஜித்திற்கு சினிமா வாழ்க்கை ஆரம்ப கட்டம் அவ்வளவு சுலபமானதாக இல்லை. ‘என் வீடு என் கணவர்’ என்ற படத்தில் ஒரு பாடல் காட்சியில் சில விநாடிகள் வந்து போனது மூலம் அமைந்தது தான் அஜித்தின் முதல் சினிமா வாய்ப்பு.

ஆனால் அடுத்து வந்த ‘பிரேம புஸ்தகம்’ என்ற தெலுங்கு படம் தான் மிகச்சரியான அறிமுகம். 1992ஆம் ஆண்டு ஆகஸ்ட் 3ஆம் தேதி சினிமா பயணத்தை தொடங்கிய அஜித்தின் வெள்ளித்திரைக்கு வயது 32 என எடுத்துக் கொள்ளலாம். அஜித் சினிமாவில் வாய்ப்பு தேடிக் கொண்டே விளம்பர படங்களிலும் நடித்து வந்தார்.

பிறகு செல்வா இயக்கத்தில் அஜித் நடித்த அமராவதி தமிழில் முதல் படமாக அமைந்தது. இதனைத்தொடர்ந்து பல்வேறு கட்டப் போராட்டத்திற்கு பிறகு தமிழ் சினிமாவில் தனக்கென ஒரு இடத்தை பிடித்து முன்னணி நடிகராக உயர்ந்தார். தமிழில் ஆசை, காதல் கோட்டை என ஆரம்ப காலங்களில் பல காதல் படங்களில் நடித்து வந்த அஜித்திற்கு வாலி படம் திருப்புமுனையாக அமைந்தது. வாலி படத்தில் சினிமாவில் ஆரம்ப கட்டத்தில் எந்த நடிகரும் ஏற்று நடிக்க தயங்கும் கதாபாத்திரத்தில் அஜித்குமார் நடித்து பெயர் பெற்றார்.

வாலி படத்தில் அஜித் ஏற்று நடித்த வில்லன் கதாபாத்திரம் இன்று வரை தமிழ் சினிமாவில் வில்லன்கள் பட்டியலில் முக்கிய இடம் பிடித்துள்ளது. பின்னர் முகவரி, கண்டுகொண்டேன் கண்டுகொண்டேன் ஆகிய படங்கள் பாக்ஸ் ஆபிஸில் பெரிய வெற்றியை பெறவில்லை என்றாலும் அஜித்தின் வித்தியாசமான நடிப்பை வெளிப்படுத்திய படங்களாக அமைந்தது.

இதனைத்தொடர்ந்து முருகதாஸ் இயக்கத்தில் நடித்த தீனா படத்திற்கு பிறகு மாஸ் ஹீரோவாக உயர்ந்தார். 2000ஆம் ஆண்டிற்கு பிறகு நடித்த சிட்டிசன், அட்டகாசம், பில்லா, மங்காத்தா ஆகிய படங்கள் கோலிவுட்டில் அஜித்தை உச்சத்தில் தூக்கி நிறுத்தியது. ரசிகர்கள் அஜித்தை ‘தல’ என அழைத்து வந்த நிலையில், அவர் தனது ரசிகர் மன்றங்களை கலைத்தார்.

அப்போதும் இன்று வரை ரசிகர்கள் அஜித் படங்கள் தியேட்டர்களில் வெளியாகும் போது திருவிழா போல் கொண்டாடி வருகின்றனர். இன்று அஜித் சினிமாவில் நுழைந்து 32 ஆண்டுகள் கடந்துள்ளது. இதனை அவரது ரசிகர்கள் கொண்டாடி வருகின்றனர். அஜித் தற்போது மகிழ் திருமேனி இயக்கத்தில் விடாமுயற்சி மற்றும் ஆதிக் ரவிச்சந்திரன் இயக்கத்தில் குட் பேட் அக்லி ஆகிய படங்களில் நடித்து வருகிறார்.