புதுடெல்லி: டெல்லியைச் சேர்ந்த தன்னார்வ அமைப்பான 'குடிபோதையில் வாகனம் ஓட்டுவதற்கு எதிரான இயக்கம்' சார்பில் உச்ச நீதிமன்றத்தில் பொது நல வழக்குத் தொடரப்பட்டுள்ளது. அந்த மனுவில், 'எங்கள் அமைப்பால் சேகரிக்கப்பட்ட ஆராய்ச்சி மற்றும் புள்ளிவிவரங்களின்படி, 70 சதவீதத்திற்கும் அதிகமான சாலை விபத்துக்களுக்கு குடித்துவிட்டு வாகனம் ஓட்டுவதே காரணம் என்றும், இதன் விளைவாக நாடு முழுவதும் ஆண்டுக்கு 1,00,000 க்கும் அதிகமான சாலை மரணங்கள் நிகழ்கின்றன என்றும் தெரிய வந்துள்ளது' என தெரிவிக்கப்பட்டுள்ளது.
மேலும், 'மது அருந்துவது ஒருவரின் அடிப்படை உரிமையாக கருத முடியாது' என்றும் இம்மனுவில் அழுத்தமாக தெரிவிக்கப்பட்டுள்ளது. அத்துடன், ஒரு தனிநபரை மது அருந்த அனுமதிப்பதற்கான சட்டப்பூர்வ் வயதுவரம்பு வெவ்வேறு மாநிலங்களில் வெவ்வேறாக உள்ளது. அதாவது தமிழ்நாடு, கர்நாடகா, கோவா போன்ற மாநிலங்களில் மதுஅருந்துவதற்கான குறைந்தபட்ச வயது வரம்பு 18 ஆகவும், இதுவே டெல்லி, மகாராஷ்டிரா போன்ற மாநிலங்களில் இந்த வயது வரம்பு 25 ஆகவும் நிர்ணயிக்கப்பட்டுள்ளது' என்றும் மனுவில் குறிப்பிடப்பட்டுள்ளது.
மேலும், ' 18 -25 வயதுக்குட்ட இளைஞர்களில் சுமார் 42.3 சதவீதத்தினர், தாங்கள் 18 வயதை அடையும் முன்பே முதல்முறை மதுவின் வாசத்தை நுகர்ந்தவர்களாக உள்ளனர் எனவும், இவர்களில் 90 சதவீதம் பேரால், எவ்வித வயது சரிபார்ப்பு நடைமுறையும் இன்றி, மது விற்பனை கூடங்களில் மதுபானங்களை எளிதாக பெற முடிகிறது' எனவும் அதில் சுட்டிக்காட்டப்பட்டுள்ளது.
அத்துடன், 'குடிபோதையில் வாகனத்தை ஓட்டுபவர்களுக்கான தண்டனை விகிதமும் குறையாகவே உள்ளது. இது ஜாமீனில் வெளிவரக்கூடிய குற்றமாக உள்ளதால் தவறு செய்பவர்கள் உடனே ஜாமீனில் வெளியே வந்துவிடுகின்றனர். 18 வயதுக்குட்பட்ட சிறுவர்கள் குடிபோதையில் வாகனங்களை ஓட்டுவது தற்போது சாதாரண விஷயமாகிவிட்டது. இதன் விளைவாக விபத்துகள் நிகழ்வதும் ஊடகங்களில் அவ்வபோது செய்திகளாகின்றன' எனவும் இப்பொதுநல மனுவில் தெரிவிக்கப்பட்டுள்ளது.
'ஓர் மது விற்பனை கூடம், கேளிக்கை விடுதி உள்ளிட்ட இடங்களுக்கு நேரடியாக சென்று மதுபானங்களை வாங்கும் நபரின் வயதைச் சரிபார்ப்பதற்கான சட்ட வழிமுறைகளோ, தெளிவான நடைமுறைகளோ தற்போது இல்லை. இதனால் மது கடைகளுக்குச் சென்று மதுபானங்களை வாங்குபவர்களால் தவறாக பயன்படுத்தப்படுகிறது. இதனால் குடிபோதையில் வாகனம் ஓட்டும் சிறார்களால் ஏற்படும் உயிரிழப்புகள் ஏராளம்' என்றும் பொதுநல மனுவில் குறிப்பிடப்பட்டுள்ளது.
இந்த வழக்கு உச்ச நீதிமன்ற நீதிபதிகள் பி,ஆர்.காவை, கே.வி. விஸ்வநாதன் ஆகியோர் அடங்கிய அமர்வின் முன் இன்று விசாரணைக்கு வந்தது. அப்போது, மது விற்பனை செய்யப்படும் அனைத்து இடங்களிலும், அதனை வாங்க வருவோருக்கான வயதை சரிபார்ப்பதற்கான நடைமுறையை கட்டாயமாக்குவது குறித்து விளக்கம் கேட்டு மத்திய அரசு நோட்டீஸ் அனுப்ப நீதிபதிகள் உத்தரவிட்டனர்.
