டெல்லி: ஜனவரி 25 அன்று வாரணாசியில் உள்ள ஞானவாபி மசூதியின் இந்தியத் தொல்லியல் துறையின் அறிக்கை புதிய சர்ச்சையைக் கிளப்பியுள்ளது. மேலும், மசூதி வளாகத்தில் உள்ள இந்து தெய்வங்களின் சிலைகள் மற்றும் பிற உருவப்படங்கள், வாரணாசியில் அமைந்துள்ள ஞானவாபி மசூதி, இந்து மதக் கோயில் இடிக்கப்பட்டுக் கட்டப்பட்டுள்ளதற்கான அடிப்படை சாட்சியங்களாக உள்ளது என்று அந்த அறிக்கையில் இந்தியத் தொல்லியல் துறை தெரிவித்துள்ளது.
இதற்கிடையே, ஞானவாபி மசூதியின் தெற்கு நிலவறையில் உள்ள கோயிலின் அர்ச்சகருடைய வாரிசுதாரர் சைலேந்திர குமார் பதக் என்பவர், வாரணாசி நீதிமன்றத்தில் மனு ஒன்றைத் தாக்கல் செய்திருந்தார். அந்த மனுவில், ஞானவாபி மசூதியின் கீழ் தளத்தில் உள்ள 7 அறைகளில், ஓர் அறையில் உள்ள தெய்வங்களுக்குத் தனது தாத்தா பூஜை செய்து வந்ததாகவும், 1993ஆம் ஆண்டு முதல் அதற்கு அனுமதி மறுக்கப்பட்டதாகவும் குறிப்பிட்டிருந்தார்.
மேலும், அங்கு மீண்டும் பூஜைகளை மேற்கொள்ள அனுமதி அளிக்கப்பட வேண்டும் என்று தனது மனுவில் கூறியிருந்தார். இந்த மனுவை விசாரித்த வாரணாசி மாவட்ட நீதிமன்றம், நேற்றைய தினம் (ஜன.31) ஞானவாபி மசூதியின் தெற்கு நிலவறையில் இந்துக்கள் வழிபாடு நடத்த அனுமதி வழங்கி உத்தரவிட்டது.
இந்த நிலையில். ஞானவாபி மசூதியில் இந்து பக்தர்கள் வழிபாடு நடத்த வாரணாசி நீதிமன்றம் அனுமதித்ததை எதிர்த்து, அவசர விசாரணை கோரி, மசூதி கமிட்டியின் வழக்கறிஞர்கள் உச்ச நீதிமன்ற பதிவாளரிடம் இன்று (பிப்.01) அதிகாலையில் மனுத் தாக்கல் செய்தனர்.
இதனை அடுத்து, ஞானவாபி மசூதியில் சீல் வைக்கப்பட்ட அடித்தளத்தில் இந்து பக்தர்கள் வழிபாடு நடத்த அனுமதி அளித்த வாரணாசி மாவட்ட நீதிபதியின் உத்தரவை எதிர்த்து, ஞானவாபி மசூதியின் குழு, உச்ச நீதிமன்றத்தில் தாக்கல் செய்த மனுவை அவசரமாக விசாரிக்க உச்ச நீதிமன்றம் மறுத்து, அலகாபாத் உயர் நீதிமன்றத்திற்குச் செல்லுமாறு ஞானவாபி மசூதி கமிட்டியின் வழக்கறிஞர் புஜைல் அகமது அய்யூபியிடம் வலியுறுத்தியுள்ளது.
இதையும் படிங்க: “வழக்கை திரும்பப் பெற அரசு முடிவெடுத்தால் அனுமதிக்கான அவசியம் இல்லை” - புதிய தலைமைச் செயலகம் கட்டட விவகாரத்தில் உயர் நீதிமன்றம் கருத்து!
