பதேபுர்: உத்தர பிரதேச மாநிலம் பதேபுர் மாவட்டம் சவுன்ரா கிராமத்தை சேர்ந்தவர் விகாஷ் துபே. 24 வயதான விகாஷ் துபே கடந்த 40 நாட்களில் 7 முறை தன்னை பாம்பு கடித்ததாக கூறி மருத்துவமனையில் அனுமதியானார். மேலும், சனி மற்றும் ஞாயிற்றுக்கிழமைகளில் தான் தன்னை பாம்பு கடிப்பதாகவும் 9வது முறை தன்னை பாம்பு கடிக்கும் போது தான் இறந்துவிடுவேன் என்றும் கூறி பீதியை கிளப்பினார்.
இந்நிலையில், விகாஷ் துபேயின் இந்த பேச்சு சமூக வலைதளங்களில் வைரலான நிலையில், அதுகுறித்து விசாரிக்க உத்தர பிரதேச சுகாதாரத்துறை விசாரிக்க குழு அமைத்தது. அதன்படி மூன்று மருத்துவர்கள் கொண்டு குழு இந்த சம்பவ குறித்து விசாரிக்க சுகாதாரத்துறையால் நியமிக்கப்பட்டது.
அவர்கள் விகாஷ் துபே சிகிச்சை பெற்றுக் கொண்ட பதேபுர் மருத்துவமனைக்கு சென்று ஆய்வு மேற்கொண்டனர். விகாஷ் துபே பாம்பு கடித்ததாக அனுமதிக்கப்பட்ட ஒவ்வொறு முறையும் அவருக்கு பாம்பு கடிக்கான விஷமுறிவு சிகிச்சை அளிக்கப்பட்டுள்ளது. ஒவ்வொரு முறையும் விஷமுறிவு மருந்து அவருக்கு செலுத்தப்பட்டு காப்பாற்றப்பட்டதாக மருத்துவ அறிக்கையில் தெரிவிக்கப்பட்டு இருந்தது.
மேலும், பாம்பு கடித்து ஐசியூவில் சிகிச்சை பெற்று வரும் மற்றொருவரின் காயத்தையும், விகாஷ் துபேயின் பாம்பு கடி தடத்தையும் மருத்துவ குழுவினர் ஆய்வு செய்தனர். இதனிடையே, வனத்துறையினர் விகாஷ் துபேயின் வீடு மற்றும் அவர் சிகிச்சை பெற்றுக் கொண்ட மருத்துவமனை பகுதியில் பாம்பு நடமாட்டத்திற்கான அறிகுறிகள் உள்ளதா என ஆய்வு நடத்தினர்.
இத்தனை ஆய்வுகளுக்கு பிறகு விகாஷ் துபே குறித்து மருத்துவ குழு அளித்த அறிக்கை அதிர்ச்சியையும் ஆச்சரியத்தையும் ஏற்படுத்தி உள்ளது. அந்த அறிக்கையில், விகாஷ் துபேவை ஒரேயொரு முறை மட்டுமே பாம்பு கடித்ததாக மருத்துவர்கள் தெரிவித்து உள்ளனர். ஐசியுவில் உள்ள மற்றொரு பாம்பு கடிக்கு சிகிச்சை பெற்று வந்தவரின் காயத்துடன் விகாஷ் துபேயின் காயத்தை ஒப்பிட்டு பார்த்த போது அவர் முதல் முறையாக மட்டுமே பாம்பு கடிக்கு உள்ளானதாகவும் மற்ற 6 முறை ஏற்பட்ட காயம் பாம்பு கடித்ததால் ஏற்பட்டது அல்ல என்றும் மருத்துவர்கள் தெரிவித்துள்ளனர்.
மேலும், விகாஷ் துபேவுக்கு ஸ்நேக் போபியா பாதிப்பு கண்டறியப்பட்டு உள்ளதாகவும் அதனால் அவர் தன்னை அடிக்கடி பாம்பு கடித்ததாக எண்ணிக் கொண்டதாகவும், அவர் முதல் முறையாக பாம்பு கடித்த போது தவிர மற்ற 6 முறையும் அவரை கடித்ததாக கூறப்படும் பாம்பை யாரும் நேரில் காணவில்லை என்றும் மருத்துவர்கள் தெரிவித்துள்ளனர்.
மேலும், விகாஷ் துபேவுக்கு மனநல மருத்துவரின் ஆலோசனை தேவைப்பட உள்ளதால் விரைந்து அவருக்கு மனநல சிகிச்சை அளிக்கப்பட வேண்டும் என்றும் அந்த அறிக்கையில் மருத்துவர்கள் பரிந்துரைத்து உள்ளனர்.
இதையும் படிங்க: பிஎம் கேர்சில் 51 சதவீத மனுக்கள் நிராகரிப்பு! கரோனாவால் பெற்றோரை இழந்த குழந்தைகளுக்கு மேலும் நெருக்கடி! - PM CARES application rejects
