அமராவதி: 175 சட்டப் பேரவை தொகுதிகளை கொண்ட ஆந்திர சட்டமன்றத்திற்கு மக்களவையுடன் சேர்த்து தேர்தல் நடைபெற்றது. ஜூன் 4ஆம் தேதி வாக்கு எண்ணிக்கை நடைபெற்ற நிலையில், தெலுங்கு தேசம் தலைமையிலான தேசிய ஜனநாயக கூட்டணி 164 தொகுதிகளை கைப்பற்றி அறுதி பெரும்பான்மையுடன் ஆட்சியை கைப்பற்றியது.
இதையடுத்து நேற்று (ஜூன்.12) ஆந்திர பிரதேச முதலமைச்சராக சந்திரபாபு நாயுடு பதவியேற்றுக் கொண்டார். அவரைத் தொடர்ந்து ஜனசேனா கட்சித் தலைவர் பவன் கல்யாண் துணை முதலமைச்சராக பொறுப்பேற்றார். தொடர்ந்து 23 பேர் அமைச்சர்களாக பொறுப்பேற்றுக் கொண்டனர். பதவியேற்பு விழாவில் பிரதமர் மோடி, மத்திய அமைச்சர்கள் அமித் ஷா, ஜெபி நட்டா, நிதின் கட்காரி, தர்மேந்திர பிரதான், சிராஜ் பஸ்வான், முன்னாள் துணை குடியரசுத் தலைவர் வெங்கையா நாயுடு, நடிகர்கள் பாலகிருஷ்ணா, ரஜினிகாந்தி, தமிழக முன்னாள் முதலமைச்சர் ஒ. பன்னீர்செல்வம் உள்ளிட்டோர் கலந்து கொண்டனர்.
இந்நிலையில், ஆந்திர பிரதேசம் முதலமைச்சராக தலைநகர் அமராவதியில் சந்திரபாபு நாயுடு இன்று (ஜூன்.13) பொறுப்பேற்றுக் கொண்டார். பதவியேற்பை முன்னிட்டு தலைமை செயலகத்தில் மந்திர ஓதங்கள் முழங்க சிறப்பு பூஜைகள் நடைபெற்றன. நிகழ்ச்சியில் மாநில அரசின் தலைமைச் செயலாளர் நிரப்குமார் பிரசாத், மாநில அமைச்சர்கள் அச்சன்நாயுடு, கொள்ளு ரவீந்திரா, நிம்மலா ராமாநாயுடு, பையாவுலா கேசவ், சத்யகுமார் யாதவ் மற்றும் பலர் கலந்து கொண்டனர்.
தொடர்ந்து சந்திரபாபு நாயுடுவுக்கு பல்வேறு துறைகளின் உயர் அதிகாரிகள், தொழிற்சங்க தலைவர்கள் உள்ளிட்டோர் உற்சாக வரவேற்பு அளித்தனர். முதலமைச்சராக பொறுப்பேற்ற சந்திரபாபு நாயுடு 5 முக்கிய கோப்புகளில் கையெழுத்திட்டார். தனது தேர்தல் வாக்குறுதியான பட்டதாரிகளுக்கு ஆசிரியர் பணி வழங்கும் கோப்பில் முதலாவதாக கையெழுத்திட்டார்.
அதன்படி 16 ஆயிரத்து 347 ஆசிரியர் பணிகள் விரைவில் நிரப்பப்பட உள்ளதாக தெரிவிக்கப்பட்டுள்ளது. தொடர்ந்து முன்னாள் முதலமைச்சர் ஜெகன் மோகன் ரெட்டி ஆட்சிக் காலத்தில் கொண்டு வரப்பட்ட நில உரிமை சட்டத்தை ரத்து செய்யும் கோப்பில் கையெழுத்திட்டார். முதியோர் ஊக்கத் தொகையை 3 ஆயிரம் ரூபாயில் இருந்து 4 ஆயிரம் ரூபாயாக உயர்த்தி வழங்கும் கோப்பில் கையெழுத்திட்டார்.
குறைந்த விலையில் உணவு வழங்கும் அண்ணா உணவகத்தை திறக்கும் நான்காவது கோப்பிலும், கடந்த ஆட்சியில் கிடப்பில் போடப்பட்ட திறன் மேம்பாட்டு திட்டத்திற்கு ஒப்புதல் அளிக்கும் 5வது கோப்பிலும் சந்திரபாபு நாயுடு கையெழுத்திட்டார். முன்னதாக தலைமைச் செயலகத்தின் பொறுபேற்கும் முன் திருப்பதி ஏழுமலையான் மற்றும் விஜயவாடா கனகதுர்கை அம்மன் கோயிலிலும் குடும்பத்தினருடன் சந்திரபாபு நாயுடு சாமி தரிசனம் செய்தார்.
இதையும் படிங்க: குவைத் அடுக்குமாடி குடியிருப்பு தீ விபத்து: 3வது மாடியில் இருந்து குதித்து உயிர் பிழைத்த தொழிலாளி! - Kuwait Building Fire
