ਜਿਉਦੇ ਲਾਸ਼ ਬਣੇ ਪੁੱਤ ਦੇ ਇਲਾਜ਼ ਲਈ ਪਿਤਾ ਨੇ ਸਮਾਜ ਸੇਵੀ ਸੰਸਥਾਵਾ ਤੋਂ ਮਦਦ ਦੀ ਕੀਤੀ ਮੰਗ

ਨੌਜਵਾਨ ਪੁੱਤ ਦੇ ਇਲਾਜ਼ ਲਈ ਪਿਤਾ ਵੱਲੋਂ ਸਮਾਜ ਸੇਵੀ ਸੰਸਥਾਵਾਂ ਤੋਂ ਮਦਦ ਦੀ ਮੰਗ ਕੀਤੀ ਗਈ ਹੈ। ਪੀੜਤ ਪਰਿਵਾਰ ਸਾਰੇ ਗਹਿਣੇ ਵੇਚ ਕੇ ਪਹਿਲਾਂ ਵੀ ਆਪਣੇ ਪੁੱਤ ਦਾ ਇਲਾਜ਼ ਕਰਵਾ ਚੁੱਕਿਆ ਹੈ।

ਤਰਨਤਾਰਨ:ਕਸਬਾ ਖਾਲੜਾ ਦੇ ਗੁਰਲਾਲ ਸਿੰਘ ਦੇ ਪਰਿਵਾਰ ‘ਤੇ ਉਸ ਸਮੇਂ ਦੁੱਖਾਂ ਦਾ ਪਾਹੜ ਟੁੱਟ ਪਿਆ। ਜਦੋਂ ਅਚਾਨਕ ਉਨ੍ਹਾਂ ਦੇ ਪੁੱਤਰ ਨੂੰ ਕਿਸੇ ਗੰਭੀਰ ਬਿਮਾਰੀ ਨੇ ਘੇਰ ਲਿਆ। ਇਸ ਪਰਿਵਾਰ ਦੀ ਆਰਥਿਕ ਹਾਲਤ ਵੀ ਬਹੁਤੀ ਠੀਕ ਨਹੀਂ ਹੈ। ਪਰ ਫਿਰ ਵੀ ਇਨ੍ਹਾਂ ਨੂੰ ਆਪਣੇ ਪੁੱਤਰ ਦਾ ਇਲਾਜ਼ ਕਰਵਾਉਣ ਲਈ ਦਰ-ਦਰ ਦੀਆਂ ਠੋਕਰਾਂ ਖਾਣੀਆਂ ਪਈਆ। ਪੀੜਤ ਵਿਅਕਤੀ ਵਿਆਹਿਆ ਹੋਇਆ ਹੈ। ਜਿਸ ਦਾ ਇੱਕ ਚਾਰ ਸਾਲ ਦਾ ਪੁੱਤਰ ਹੈ।

ਪਰਿਵਾਰਿਕ ਮੈਂਬਰਾਂ ਮੁਤਾਬਿਕ ਗੁਰਲਾਲ ਸਿੰਘ ਨੂੰ ਅੱਜ ਤੋਂ ਦੋ ਮਹੀਨੇ ਇਸ ਭਿਆਨਕ ਬਿਮਾਰੀ ਨੇ ਆਪਣੀ ਜਕੜ ਵਿੱਚ ਲੈ ਲਿਆ ਸੀ। ਪਰਿਵਾਰ ਦਾ ਕਹਿਣਾ ਹੈ, ਕਿ ਅਸੀਂ ਗੁਰੂ ਨਾਨਕ ਦੇਵ ਹਸਪਤਾਲ ਅੰਮ੍ਰਿਤਸਰ ਵਿਖੇ ਇਲਾਜ਼ ਲਈ ਪੀੜਤ ਨੂੰ ਲੈਕੇ ਗਏ ਸਨ।

ਉੱਥੇ ਡਾਕਟਰਾਂ ਨੇ ਮਰੀਜ਼ ਨੂੰ 10 ਤੋਂ 12 ਦਿਨ ਰੱਖਣ ਤੋਂ ਬਾਅਦ ਸਾਨੂੰ ਨੂੰ ਪੀ.ਜੀ.ਆਈ. ਚੰਡੀਗੜ੍ਹ ਵਿਖੇ ਭੇਜ ਦਿੱਤਾ। ਪੀ.ਜੀ.ਆਈ. ਦੇ ਡਾਕਟਰਾਂ ਨੇ ਇਲਾਜ਼ ਦੌਰਾਨ ਸਿਰ ਦਾ ਆਪ੍ਰੇਸ਼ਨ ਕਰਨ ਤੋਂ ਬਾਅਦ ਪੀੜਤ ਦੀ ਅੱਖ ਕੱਢ ਦਿੱਤੀ।

ਇਸ ਦੇ ਦੌਰਾਨ ਸਾਡਾ ਕਾਫ਼ੀ ਖ਼ਰਚਾ ਹੋ ਗਿਆ। ਪੀੜਤ ਪਰਿਵਾਰ ਆਪਣੇ ਘਰ ਦੇ ਗਹਿਣੇ ਰੱਖ ਕੇ ਆਪਣੇ ਪੁੱਤਰ ਦਾ ਇਲਾਜ਼ ਕਰਵਾ ਦਿੱਤਾ, ਅਤੇ ਹੁਣ ਫਿਰ ਦੁਬਾਰਾ ਪੀ.ਜੀ.ਆਈ. ਤੋਂ ਇਲਾਜ਼ ਲਈ ਸੱਦਾ ਆਇਆ ਹੈ।

ਪੀੜਤ ਨੌਜਵਾਨ ਦੇ ਪਿਤਾ ਨੇ ਦੱਸਿਆ ਕਿ ਹੁਣ ਉਨ੍ਹਾਂ ਕੋਲ ਇਲਾਜ਼ ਲਈ ਕੋਈ ਪੈਸੇ ਨਹੀਂ ਹੈ। ਜਿਸ ਕਰਕੇ ਉਨ੍ਹਾਂ ਦਾ ਜਵਾਨ ਪੁੱਤ ਇੱਕ ਜਿੰਦਾ ਲਾਸ਼ ਬਣਕੇ ਮੰਜੇ ‘ਤੇ ਪਿਆ ਹੈ। ਪੀੜਤ ਪਰਿਵਾਰ ਵੱਲੋਂ ਸਮਾਜ ਸੇਵੀ ਸੰਸਥਾਵਾਂ ਤੋਂ ਮਦਦ ਦੀ ਮੰਗ ਕੀਤੀ ਜਾ ਰਹੀ ਹੈ। ਤਾਂ ਜੋ ਉਨ੍ਹਾਂ ਦਾ ਪੁੱਤ ਜਿੰਦਾ ਰਹੇ ਸਕੇ।