ਸ੍ਰੀ ਅਨੰਦਪੂਰ ਸਾਹਿਬ: ਕਹਿੰਦੇ ਨੇ ਜਦੋਂ ਮਨੁੱਖ ਦੂਜੇ ਮਨੁੱਖ ਨੂੰ ਸਹਾਰਾ ਨਹੀਂ ਦਿੰਦਾ ਤਾਂ ਉਸ ਦਾ ਸਹਾਰਾ ਖ਼ੁਦ ਪਰਮਾਤਮਾ ਬਣਦਾ ਹੈ ਕੁਝ ਅਜਿਹੀ ਹੀ ਕਿਰਪਾ ਪਰਮਾਤਮਾ ਨੇ ਕੁਸ਼ਟ ਰੋਗੀਆਂ 'ਤੇ ਕੀਤੀ ਤੇ ਕਰੀਬ 30 ਪਰਿਵਾਰ, ਜਿਨ੍ਹਾਂ ਨੂੰ ਸਮਾਜ ਤੋਂ ਦਰਕਿਨਾਰ ਕਰ ਦਿੱਤਾ ਗਿਆ ਸੀ। ਉਨ੍ਹਾਂ ਨੂੰ 2 ਵੇਲੇ ਦੀ ਰੋਟੀ ਤੇ ਰਹਿਣ ਨੂੰ ਛੱਤ ਦਿੱਤੀ, ਪਰ ਹੁਣ ਲਗਦਾ ਹੈ ਕਿ ਇਨ੍ਹਾਂ ਬੇਸਹਾਰਿਆਂ ਦਾ ਇਹ ਸਹਾਰਾ ਵੀ ਸਰਕਾਰ ਖੋਹ ਲਵੇਗੀ।
ਨੰਗਲ ਵਿਖੇ ਟ੍ਰੈਫਿਕ ਦੀ ਪਰੇਸ਼ਾਨੀ ਦੇ ਹੱਲ ਲਈ ਸਰਕਾਰ ਵੱਲੋਂ ਕਰੋੜਾਂ ਰੁਪਏ ਦਾ ਪ੍ਰੋਜੈਕਟ ਪਾਸ ਕੀਤਾ ਗਿਆ ਹੈ ਤੇ ਹੁਣ ਸਤਲੁਜ ਦਰਿਆ ਉਪਰ ਫਲਾਈਓਵਰ ਬਣਾਇਆ ਜਾ ਰਿਹਾ ਹੈ। ਇਸ ਨਾਲ ਨੰਗਲ ਵਿੱਚ ਲੱਗਣ ਵਾਲੇ ਟ੍ਰੈਫਿਕ ਜਾਮ ਤੋਂ ਨਿਜਾਤ ਮਿਲ ਸਕੇਗੀ ਪਰ ਮੁੱਖ ਸਮੱਸਿਆ ਫਲਾਈਓਵਰ ਦੇ ਰਸਤੇ ਵਿੱਚ ਆ ਰਿਹਾ 1975 ਦਾ ਰਾਮਕੁਸ਼ਟ ਆਸ਼ਰਮ ਹੈ, ਜਿੱਥੇ ਰਹਿੰਦੇ ਕਰੀਬ 70-80 ਲੋਕ ਇਸ ਆਸ਼ਰਮ ਦੀ ਛੱਤ ਤੋਂ ਬੇਘਰ ਹੋ ਜਾਣਗੇ।
ਓਧਰ ਰੂਪਨਗਰ ਦੇ ਡਿਪਟੀ ਕਮਿਸ਼ਨਰ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਦੱਸਿਆ ਕਿ ਆਸ਼ਰਮ ਦੇ ਸਾਰੇ ਪਰਿਵਾਰਾਂ ਨੂੰ ਘਰ ਦੇਣ ਦਾ ਵਾਅਦਾ ਕੀਤਾ ਗਿਆ ਸੀ ਪਰ ਇਸ ਵਿੱਚ ਅਜੇ 2 ਤੋਂ 3 ਮਹੀਨੇ ਦਾ ਸਮਾਂ ਹੋਰ ਲੱਗੇਗਾ।
ਟਰੈਫਿਕ ਦੀ ਸਮੱਸਿਆ ਹੋਵੇ ਭਾਵੇਂ ਇਸ ਸਮੱਸਿਆ ਨੂੰ ਖਤਮ ਕਰਨ ਲਈ ਫਲਾਈਓਵਰ ਦਾ ਨਿਰਮਾਣ, ਪਰ ਇਸ ਵਿਕਾਸ ਦੀ ਏਵਜ਼ ਵਿੱਚ ਕੁਸ਼ਟ ਰੋਗੀਆਂ ਨੂੰ ਘਰੋਂ ਬੇਘਰ ਕਰਨਾ ਸਚਮੁੱਚ ਸ਼ਰਮਨਾਕ ਹੈ। ਸਰਕਾਰਾਂ ਜਾਂ ਪ੍ਰਸ਼ਾਸਨ ਚਾਹੁਣ ਤਾਂ ਇਸ ਦਾ ਢੁਕਵਾਂ ਹੱਲ ਵੀ ਕੱਢਿਆ ਜਾ ਸਕਦਾ ਹੈ।
