ਲੁਧਿਆਣਾ: ਸਮਰਾਲਾ ਵਿਖੇ ਇੱਕ 65 ਸਾਲਾ ਬੁਜ਼ਰਗ ਔਰਤ ਨਾਲ ਲੁੱਟ-ਖੋਹ ਹੋਣ ਦੀ ਖ਼ਬਰ ਸਾਹਮਣੇ ਆਈ ਹੈ। ਲੁਟੇਰਿਆਂ ਨੇ ਲੁੱਟ-ਖੋਹ ਦੌਰਾਨ ਬਜ਼ੁਰਗ ਔਰਤ ਦੀ ਇੱਕ ਸੋਨੇ ਦੀ ਵਾਲੀ ਲੁੱਟ ਲਈ ਹੈ ਅਤੇ ਬੁਜ਼ਰਗ ਨੇ ਬਹਾਦੁਰੀ ਨਾਲ ਆਪਣੀ ਇੱਕ ਸੋਨੇ ਦੀ ਵਾਲੀ ਲੁਟੇਰਿਆਂ ਤੋਂ ਬਚਾ ਵੀ ਲਈ ਹੈ।
ਪੀੜਤਾ ਗੁਰਦੇਵ ਕੌਰ ਨੇ ਕਿਹਾ ਕਿ ਉਹ ਅੱਜ ਸਵੇਰ ਆਪਣੇ ਪੇਕੇ ਪਿੰਡ ਘੁੰਗਰਾਲੀ ਤੋਂ ਵਾਪਸੀ ਕਰਨ ਲਈ ਮੰਡੀ ਗੋਬਿੰਦਗੜ੍ਹ ਨੂੰ ਜਾਣ ਲਈ ਬੱਸ ਦੀ ਉਡੀਕ ਕਰ ਰਹੀ ਸੀ ਕਿ ਇੱਕ ਕਾਰ ਵਿੱਚ ਸਵਾਰ ਤਿੰਨ ਔਰਤਾਂ ਨੇ ਉਸ ਨੂੰ ਇਹ ਕਹਿ ਕੇ ਕਾਰ ਵਿੱਚ ਬਿਠਾ ਲਿਆ ਕਿ ਉਨ੍ਹਾਂ ਨੇ ਵੀ ਮੰਡੀ ਗੋਬਿੰਦਗੜ੍ਹ ਹੀ ਜਾਣਾ ਹੈ। ਜਿਸ ਤੋਂ ਬਾਅਦ ਉਹ ਕਾਰ ਵਿੱਚ ਬੈਠ ਗਈ। ਉਨ੍ਹਾਂ ਕਿਹਾ ਕਿ ਕਾਰ ਵਿੱਚ ਬੈਠਦਿਆਂ ਉਨ੍ਹਾਂ ਨੂੰ ਪਤਾ ਨਹੀਂ ਕਿ ਲੱਗਿਆ ਕਿ ਕਦੋਂ ਉਨ੍ਹਾਂ ਔਰਤਾਂ ਨੇ ਉਨ੍ਹਾਂ ਦੇ ਕੰਨ ਵਿੱਚੋ ਵਾਲੀ ਕੱਢ ਲਈ। ਜਦੋਂ ਉਹ ਔਰਤਾਂ ਉਨ੍ਹਾਂ ਦੇ ਦੂਜੇ ਕੰਨ ਵਿੱਚੋਂ ਵਾਲੀ ਕੱਢਣ ਦੀ ਕੋਸ਼ਿਸ਼ ਕਰਨ ਲਗੀਆਂ ਤਾਂ ਉਨ੍ਹਾਂ ਨੇ ਆਪਣੀ ਦੂਜੀ ਵਾਲੀ ਬਚਾਉਣ ਲਈ ਚਲਦੀ ਕਾਰ ਵਿੱਚੋਂ ਛਲਾਂਗ ਮਾਰ ਦਿੱਤੀ ਅਤੇ ਆਪਣੀ ਇੱਕ ਸੋਨੇ ਦੀ ਵਾਲੀ ਬਚਾ ਲਈ।
ਪੀੜਤਾ ਨੇ ਕਿਹਾ ਕਿ ਇਹ ਕਾਰ ਚਿੱਟੇ ਰੰਗ ਦੀ ਸੀ ਤੇ ਉਸ ਵਿੱਚ 3 ਔਰਤਾਂ ਅਤੇ 1 ਮਰਦ ਸਵਾਰ ਸੀ ਜਿਨ੍ਹਾਂ ਨੇ ਮਾਸਕ ਪਾਏ ਹੋਏ ਸੀ।
ਵਾਰਦਾਤ ਅੰਜ਼ਾਮ ਹੋਣ ਤੋਂ ਬਾਅਦ ਸਮਰਾਲਾ ਪੁਲਿਸ ਉੱਥੇ ਦੇ ਸੀਸੀਟੀਵੀ ਕੈਮਰੇ ਖੰਗਾਲ ਰਹੀ ਹੈ।
