ਹੁਸ਼ਿਆਰਪੁਰ: ਅੱਜ ਹੁਸ਼ਿਆਰਪੁਰ ਵਿਖੇ ਕਰਵਾਏ ਪਹਿਲੇ ਰਾਈਟਰਸ ਫੈਸਟੀਵਲ ਦੌਰਾਨ ਹੁਸ਼ਿਆਰਪੁਰ ਸਾਹਿਤਕ ਰੰਗ ਵਿੱਚ ਰੰਗਿਆ ਗਿਆ। ਸਿਟਰਸ ਕਾਊਂਟੀ ਛਾਉਣੀ ਕਲਾਂ ਵਿਖੇ ਫੈਸਟੀਵਲ ਦਾ ਆਗਾਜ਼ ਪੰਜਾਬ ਯੋਜਨਾ ਬੋਰਡ ਤੇ ਸੋਨਾਲੀਕਾ ਇੰਟਰਨੈਸ਼ਨਲ ਟਰੈਕਟਰਜ਼ ਲਿਮ: ਦੇ ਵਾਈਸ ਚੇਅਰਮੈਨ ਅਮ੍ਰਿਤ ਸਾਗਰ ਮਿੱਤਲ ਅਤੇ ਉਘੇ ਲੇਖਕ ਤੇ ਪੰਜਾਬ ਰਾਜ ਸੂਚਨਾ ਕਮਿਸ਼ਨਰ ਖੁਸ਼ਵੰਤ ਸਿੰਘ ਵੱਲੋਂ ਸ਼ਮਾਂ ਰੌਸ਼ਨ ਕਰਕੇ ਕੀਤਾ ਗਿਆ।
ਇਸ ਮੌਕੇ ਵਧੀਕ ਡਿਪਟੀ ਕਮਿਸ਼ਨਰ ਹਰਪ੍ਰੀਤ ਸਿੰਘ ਸੂਦਨ, ਵਧੀਕ ਡਿਪਟੀ ਕਮਿਸ਼ਨਰ ਹਰਬੀਰ ਸਿੰਘ, ਹੁਸ਼ਿਆਰਪੁਰ ਲਿਟਰੇਰੀ ਸੋਸਾਇਟੀ' ਦੀ ਪ੍ਰਧਾਨ ਸਨਾ ਕੇ. ਗੁਪਤਾ ਤੋਂ ਇਲਾਵਾ ਵੱਖ-ਵੱਖ ਸਖਸ਼ੀਅਤਾਂ ਮੌਜੂਦ ਸਨ।
ਫੈਸਟੀਵਲ ਦੌਰਾਨ ਉਘੇ ਲੇਖਕਾਂ, ਕਵੀਆਂ, ਪੈਨਲਿਸਟ ਅਤੇ ਫਿਲਮ ਇੰਡਸਟਰੀ ਨਾਲ ਜੁੜੀਆਂ ਅਹਿਮ ਹਸਤੀਆਂ ਵੱਲੋਂ ਵੱਖ-ਵੱਖ ਮੁੱਦਿਆਂ 'ਤੇ ਅਹਿਮ ਵਿਚਾਰਾਂ ਹੋਈਆਂ। ਫੈਸਟੀਵਲ ਵਿੱਚ 7 ਸੈਸ਼ਨ ਹੋਏ ਅਤੇ ਆਖਰੀ ਸੈਸ਼ਨ ਵਿੱਚ ਉਘੇ ਕਵੀ ਸੁਰਜੀਤ ਪਾਤਰ ਨਾਲ ਉਨ੍ਹਾਂ ਦੀ ਪੁਸਤਕ 'ਪੰਜਾਬ ਇਕ ਕਵੀ ਦੀ ਨਜ਼ਰ ਤੋਂ' (Punjab through the eyes of a poet) ਬਾਰੇ ਸੀਨੀਅਰ ਪੱਤਰਕਾਰ ਨਿਰੁਪਮਾ ਦੱਤ ਵੱਲੋਂ ਅਹਿਮ ਚਰਚਾ ਕੀਤੀ ਗਈ।
ਇਸ ਮੌਕੇ ਭਾਰੀ ਗਿਣਤੀ ਵਿੱਚ ਪੁੱਜੇ ਵਿਦਿਆਰਥੀਆਂ ਵੱਲੋਂ ਸਵਾਲ ਵੀ ਕੀਤੇ ਗਏ, ਜਿਨ੍ਹਾਂ ਦਾ ਸੁਰਜੀਤ ਪਾਤਰ ਵੱਲੋਂ ਬਾਖੂਬੀ ਜਵਾਬ ਦਿੱਤਾ ਗਿਆ। ਸਭ ਤੋਂ ਪਹਿਲਾਂ ਉਘੇ ਲੇਖਕ ਉਪਮਨਿਊ ਚੈਟਰਜੀ ਨਾਲ ਉਨ੍ਹਾਂ ਦੀ ਪੁਸਤਕ (Stories around assassination of Indra Gandhi) ਬਾਰੇ ਸਪੀਕਿੰਗ ਟਾਈਗਰ ਦੇ ਸਹਿ ਸੰਸਥਾਪਕ ਰਵੀ ਸਿੰਘ ਨੇ ਗੱਲਬਾਤ ਕੀਤੀ। ਇਸ ਦੌਰਾਨ ਇਸ ਪੁਸਤਕ ਸਬੰਧੀ ਅਹਿਮ ਘਟਨਾਵਾਂ ਨੂੰ ਛੋਹਿਆ ਗਿਆ।
ਹੁਸ਼ਿਆਰਪੁਰ ਰਾਈਟਰਸ ਫੈਸਟੀਵਲ' ਮੌਕੇ ਸਮਾਜਿਕ ਰਿਸ਼ਤਿਆਂ ਸਬੰਧੀ ਉਘੀ ਲੇਖਿਕਾ ਸੋਨਾਲੀ ਖੁੱਲਰ ਸ਼ਰਾਫ ਵਲੋਂ ਲਿਖੀ ਪੁਸਤਕ (Love in the time of affluenza) ਬਾਰੇ ਪੈਨਲਿਸਟ ਪ੍ਰੀਤੀ ਗਿੱਲ ਅਤੇ ਸਨਾ ਕੇ ਗੁਪਤਾ ਵਲੋਂ ਗੱਲਬਾਤ ਕੀਤੀ ਗਈ, ਜਿਸ ਵਿੱਚ ਪਰਿਵਾਰਕ ਰਿਸ਼ਤਿਆਂ ਦੀ ਮਜ਼ਬੂਤੀ ਬਾਰੇ ਚਰਚਾ ਕੀਤੀ ਗਈ।
ਇਸ ਤੋਂ ਬਾਅਦ ਪੰਜਾਬੀ ਸਿਨੇਮਾ ਬਾਰੇ ਡਿਜੀਟਲ ਦੀ ਦੁਨੀਆਂ ਵਿੱਚ ਮਨੋਰੰਜਨ ਦੇ ਭਵਿੱਖ ਬਾਰੇ ਬਾਲੀਵੁੱਡ ਅਭਿਨੇਤਾ ਰਣਵੀਰ ਸ਼ੌਰੇ, ਐਕਸ ਵਾਇਆਕਾਮ 18 ਦੇ ਸਾਬਕਾ ਸੀ.ਓ.ਓ.ਰਾਜ ਨਾਇਕ ਅਤੇ ਜੋਤੀ ਕਮਲ ਦਰਮਿਆਨ ਚਰਚਾ ਹੋਈ। ਇਸ ਚਰਚਾ ਵਿੱਚ ਡਿਜੀਟਲ ਦੀ ਦੁਨੀਆਂ ਵਿੱਚ ਸਿਨੇਮਾ ਦੇ ਭਵਿੱਖ ਬਾਰੇ ਅਹਿਮ ਵਿਚਾਰ ਪੇਸ਼ ਕੀਤੇ ਗਏ। ਇਸ ਤੋਂ ਇਲਾਵਾ ਅਜੋਕੇ ਦੌਰ ਵਿੱਚ ਮਾਸ ਮੀਡੀਆ ਦੇ ਯੋਗਦਾਨ ਸਬੰਧੀ ਵੀ ਚਰਚਾ ਕੀਤੀ ਗਈ।
ਫੈਸਟੀਵਲ ਦੌਰਾਨ ਮਸ਼ਹੂਰ ਲੇਖਿਕਾ ਰਖਸ਼ੰਦਾ ਜਲੀਲ ਦੀ ਨਵੀਂ ਪੁਸਤਕ (But You don't look like A Muslim) 'ਤੇ ਸੀਨੀਅਰ ਪੱਤਰਕਾਰ ਨਿਰੂਪਮਾ ਦੱਤ ਵੱਲੋਂ ਚਰਚਾ ਕੀਤੀ ਗਈ। ਇਸ ਪੁਸਤਕ ਵਿੱਚ ਵੀ ਅਹਿਮ ਮੁੱਦਿਆਂ ਨੂੰ ਬੜੀ ਹੀ ਬਰੀਕੀ ਨਾਲ ਛੋਹਿਆ ਗਿਆ। ਇਸ ਤੋਂ ਇਲਾਵਾ ਪੰਜਾਬੀ ਸਿਨੇਮਾ ਬਾਰੇ ਉਘੇ ਡਾਇਰੈਕਟਰ ਅਨੁਰਾਗ ਸਿੰਘ, ਐਕਟਰ ਗੁਰਪ੍ਰੀਤ ਸਿੰਘ ਘੁੱਗੀ, ਲੇਖਕ ਜਤਿੰਦਰ ਮੌਹਰ, ਸਾਬਕਾ ਮਿਸ ਇੰਡੀਆ ਅਤੇ ਐਕਟਰ ਨਵਨੀਤ ਢਿੱਲੋਂ ਅਤੇ ਨਵਲੀਨ ਲੱਖੀ ਵੱਲੋਂ ਗੱਲਬਾਤ ਕੀਤੀ ਗਈ, ਜਿਸ ਵਿੱਚ ਪੰਜਾਬੀ ਸਿਨੇਮੇ ਦੇ ਮੌਜੂਦਾ ਦੌਰ ਅਤੇ ਭਵਿੱਖ ਬਾਰੇ ਅਹਿਮ ਵਿਸ਼ਿਆਂ ਨੂੰ ਛੇੜਿਆ ਗਿਆ।
ਉਪਰੰਤ 'ਹੁਸ਼ਿਆਰਪੁਰ ਲਿਟਰੇਰੀ ਸੋਸਾਇਟੀ' ਦੀ ਪ੍ਰਧਾਨ ਅਤੇ ਲੇਖਿਕਾ ਸਨਾ ਕੇ. ਗੁਪਤਾ ਦੀ ਪੁਸਤਕ (Hands that disobeyed) ਲਾਂਚ ਕੀਤੀ ਗਈ ਅਤੇ ਇਸ ਪੁਸਤਕ ਬਾਰੇ ਲੇਖਿਕਾ ਨਾਲ 6ਵੇਂ ਸੈਸ਼ਨ ਦੌਰਾਨ ਉਘੇ ਲੇਖਕ ਤੇ ਪੰਜਾਬ ਰਾਜ ਸੂਚਨਾ ਕਮਿਸ਼ਨਰ ਖੁਸ਼ਵੰਤ ਸਿੰਘ ਅਤੇ ਲੇਖਿਕਾ ਸੋਨਾਲੀ ਖੁੱਲਰ ਸ਼ਰਾਫ ਵੱਲੋਂ ਅਹਿਮ ਵਿਚਾਰਾਂ ਕੀਤੀਆਂ ਗਈਆਂ। ਇਸ ਪੁਸਤਕ ਦੀ ਚਰਚਾ ਦੌਰਾਨ ਅਹਿਮ ਮੁੱਦਿਆਂ 'ਤੇ ਗੱਲਬਾਤ ਹੋਈ।
ਉਪਰੰਤ ਸ਼ਾਮ ਨੂੰ ਮਹਾਨ ਪੰਜਾਬੀ ਕਵੀ ਸੁਰਜੀਤ ਪਾਤਰ ਦੀ ਕਵਿਤਾ 'ਪੰਜਾਬ ਇਕ ਕਵੀ ਦੀ ਨਜ਼ਰ ਤੋਂ' ਸਬੰਧੀ ਨਿਰੁਪਮਾ ਦੱਤ ਨੇ ਵਿਚਾਰ ਚਰਚਾ ਕੀਤੀ ਅਤੇ ਪੂਰੀ ਫਿਜ਼ਾ ਨੂੰ ਸਾਹਿਤਕ ਰੰਗ ਵਿੱਚ ਰੰਗ ਕੇ 'ਹੁਸ਼ਿਆਰਪੁਰ ਰਾਈਟਰਸ ਫੈਸਟੀਵਲ' ਸਮਾਪਤ ਹੋਇਆ।
ਖੁਸ਼ਵੰਤ ਸਿੰਘ ਨੇ ਕਿਹਾ ਕਿ ਇਸ ਫੈਸਟੀਵਲ ਰਾਹੀਂ ਉਘੇ ਲੇਖਕਾਂ, ਕਵੀਆਂ ਅਤੇ ਫਿਲਮ ਇੰਡਸਟਰੀ ਨਾਲ ਜੁੜੀਆਂ ਅਹਿਮ ਹਸਤੀਆਂ ਵੱਲੋਂ ਵੱਖ-ਵੱਖ ਮੁੱਦਿਆਂ 'ਤੇ ਅਹਿਮ ਵਿਚਾਰਾਂ ਕੀਤੀਆਂ ਗਈਆਂ ਹਨ, ਜੋ ਇਕ ਨਿਰੋਏ ਅਤੇ ਤੰਦਰੁਸਤ ਸਮਾਜ ਲਈ ਬਹੁਤ ਜ਼ਰੂਰੀ ਹਨ।
ਇਹ ਵੀ ਪੜੋ: ਚੰਗਾਲੀਵਾਲਾ ਕਤਲ ਮਾਮਲਾ: ਪਰਿਵਾਰ ਨੂੰ ਹਾਲੇ ਵੀ ਲੱਗ ਰਿਹਾ ਡਰ, ਮਿਲ ਰਹੀਆਂ ਨੇ ਧਮਕੀਆਂ
ਉਨ੍ਹਾਂ ਨੇ ਕਿਹਾ ਕਿ ਹੁਸ਼ਿਆਰਪੁਰ ਨੂੰ ਇਹ ਫੈਸਟੀਵਲ ਕਰਵਾਉਣ ਦਾ ਮਾਣ ਪ੍ਰਾਪਤ ਹੋਇਆ ਹੈ, ਜਿਸ ਲਈ ਉਹ 'ਹੁਸ਼ਿਆਰਪੁਰ ਲਿਟਰੇਰੀ ਸੋਸਾਇਟੀ' ਨੂੰ ਵਧਾਈ ਦਿੰਦੇ ਹਨ। ਉਨ੍ਹਾਂ ਨੇ ਫੈਸਟੀਵਲ ਵਿੱਚ ਪਹੁੰਚੇ ਉਘੇ ਲੇਖਕਾਂ, ਕਵੀਆਂ ਅਤੇ ਫਿਲਮ ਇੰਡਸਟਰੀ ਨਾਲ ਜੁੜੀਆਂ ਹਸਤੀਆਂ ਨੂੰ ਪਹੁੰਚਣ 'ਤੇ ਧੰਨਵਾਦ ਵੀ ਪ੍ਰਗਟਾਇਆ। ਇਸ ਮੌਕੇ ਵੱਖ-ਵੱਖ ਸਕੂਲਾਂ ਦੇ ਵਿਦਿਆਰਥੀਆਂ ਤੋਂ ਇਲਾਵਾ 'ਹੁਸ਼ਿਆਰਪੁਰ ਲਿਟਰੇਰੀ ਸੋਸਾਇਟੀ' ਦੇ ਮੈਂਬਰ ਅਤੇ ਵੱਖ-ਵੱਖ ਸਖਸ਼ੀਅਤਾਂ ਹਾਜ਼ਰ ਸਨ।
