ਚੰਡੀਗੜ੍ਹ: ਪੰਜਾਬ ਦੀ ਸਭ ਤੋਂ ਪੁਰਾਣੀ ਅਤੇ ਰਿਵਾਇਤੀ ਪਾਰਟੀ ਅਕਾਲੀ ਦਲ ਇਸ ਵੇਲੇ ਆਪਣੀ ਹੋਂਦ ਦੀ ਲੜਾਈ ਲੜ ਰਹੀ ਹੈ। ਪਿਛਲੀਆਂ ਦੋ ਵਿਧਾਨ ਸਭਾ ਚੋਣਾਂ ਦੌਰਾਨ ਅਕਾਲੀ ਦਲ ਨੂੰ ਨਮੋਸ਼ੀ ਵਾਲੀ ਹਰ ਦਾ ਸਾਹਮਣਾ ਕਰਨਾ ਪਿਆ। ਇਸ ਸਮੇਂ ਦੌਰਾਨ ਅਕਾਲੀ ਦਲ ਵਿਚ ਕਈ ਉਤਾਰ ਚੜਾਅ ਆਏ, ਭਾਜਪਾ ਨਾਲੋਂ ਗੱਠਜੋੜ ਟੁੱਟਿਆ, ਬਸਪਾ ਨਾਲ ਰਿਸ਼ਤਾ ਵੀ ਜੁੜਿਆ ਪਰ ਅਕਾਲੀ ਦਲ ਲਈ ਪੰਜਾਬ ਸਰ ਕਰਨਾ ਸੁਖਾਲਾ ਨਾ ਹੋ ਸਕਿਆ। ਹੁਣ ਭਾਜਪਾ ਵੀ ਅਕਾਲੀ ਦਲ ਦੇ ਕਈ ਨੇਤਾਵਾਂ ਨੂੰ ਆਪਣੀ ਬੁੱਕਲ ਵਿੱਚ ਸਮਾਅ ਰਹੀ ਹੈ। ਦੂਜੇ ਪਾਸੇ ਸ਼੍ਰੋਮਣੀ ਅਕਾਲੀ ਦਲ ਨੂੰ ਆਪਣੇ ਹਰ ਪਾਸੇ ਹਨ੍ਹੇਰਾ ਹੀ ਨਜ਼ਰ ਆ ਰਿਹਾ ਹੈ।
2024 ਵਿਚ ਅਕਾਲੀ ਦਲ ਲਈ ਚੁਣੌਤੀਆਂ ਹੀ ਚੁਣੌਤੀਆਂ: ਸੀਨੀਅਰ ਪੱਤਰਕਾਰ ਅਤੇ ਰਾਜਨੀਤਕ ਮਾਹਿਰ ਸਵਰਨ ਸਿੰਘ ਦਾਨੇਵਾਲੀਆ ਨੇ ਈਟੀਵੀ ਭਾਰਤ ਨਾਲ ਫੋਨ ਉੱਤੇ ਗੱਲਬਾਤ ਕਰਦਿਆਂ ਦੱਸਿਆ ਕਿ 2024 ਅਕਾਲੀ ਦਲ ਲਈ ਚੁਣੌਤੀਆਂ ਨਾਲ ਭਰਿਆ ਹੋਇਆ ਹੈ, ਕਿਉਂਕਿ ਅਕਾਲੀ ਦਲ ਨੇ ਆਪਣੀਆਂ ਜੜ੍ਹਾਂ ਨਾਲੋਂ ਨਾਤਾ ਤੋੜ ਲਿਆ। ਅਕਾਲੀ ਦਲ ਦੀਆਂ ਜੜਾਂ ਹਨ ਸਿੱਖ ਸਿਆਸਤ ਜਦੋਂ ਤੋਂ ਅਕਾਲੀ ਦਲ ਨੇ ਪੰਥਕ ਸਿਆਸਤ ਛੱਡ ਕੇ ਪੰਜਾਬ ਦੀ ਰਾਜਨੀਤੀ ਵਿੱਚ ਪ੍ਰਵੇਸ਼ ਕੀਤਾ ਤਾਂ ਅਕਾਲੀ ਦਲ ਨੂੰ ਖਮਿਆਜਾ ਭੁਗਤਨਾ ਪਿਆ, ਕਿਉਂਕਿ ਅਕਾਲੀ ਦਲ ਆਪਣੇ ਸਿਧਾਂਤਾਂ ਤੋਂ ਭਟਕ ਗਿਆ ਜਿਸ ਲਈ ਅਕਾਲੀ ਦਲ ਦੀ ਇਹ ਹਾਲਤ ਹੋਈ। ਸੁਖਬੀਰ ਬਾਦਲ ਪਾਰਟੀ 'ਤੇ ਪੈਸਾ ਖਰਚ ਕਰਕੇ ਪਾਰਟੀ ਖੜ੍ਹੀ ਜ਼ਰੂਰ ਰੱਖ ਸਕਦੇ ਹਨ ਪਰ ਲੋਕਾਂ ਦਾ ਵਿਸ਼ਵਾਸ ਨਹੀਂ ਕਾਇਮ ਰੱਖ ਸਕਦੇ। ਉਹਨਾਂ ਆਖਿਆ ਕਿ ਇੱਕ ਦੌਰ ਹੁੰਦਾ ਸੀ ਜਦੋਂ ਅਕਾਲੀ ਦਲ ਦੀ ਤੂਤੀ ਬੋਲਦੀ ਸੀ ਅਤੇ ਲੋਕ ਨੀਲੀ ਪੱਗ ਬੰਨ੍ਹ ਕੇ ਅਕਾਲੀ ਹੋਣ ਉੱਤੇ ਮਾਣ ਮਹਿਸੂਸ ਕਰਦੇ ਸਨ, ਪਰ ਹੁਣ ਅਕਾਲੀ ਦਲ ਤੋਂ ਲੋਕਾਂ ਦਾ ਅਜਿਹਾ ਮੋਹ ਭੰਗ ਹੋਇਆ ਹੈ ਕਿ ਅਕਾਲੀ ਦਲ ਮੁੜ ਪੈਰਾਂ ਸਿਰ ਖੜ੍ਹਾ ਹੀ ਨਹੀਂ ਹੋ ਪਾ ਰਿਹਾ। ਅਕਾਲੀ ਦਲ ਲਈ ਸਭ ਤੋਂ ਵੱਡੀ ਚੁਣੌਤੀ ਤਾਂ ਇਹੀ ਹੈ ਕਿ ਪੰਜਾਬੀਆਂ ਦਾ ਅਕਾਲੀ ਦਲ ਤੋਂ ਵਿਸ਼ਵਾਸ ਉੱਠ ਗਿਆ ਹੈ।
ਪੰਥਕ ਮੁੱਦੇ ਉਭਾਰ ਕੇ ਵੀ ਅਕਾਲੀ ਦਲ ਹੱਥ ਰਹੇ ਖਾਲੀ: ਸਵਰਨ ਸਿੰਘ ਦਾਨੇਵਾਲੀਆ ਦਾ ਕਹਿਣਾ ਹੈ ਕਿ ਅਕਾਲੀ ਦਲ ਨੇ ਮੁੜ ਤੋਂ ਪੰਥਕ ਸਿਆਸਤ ਦੀ ਸੁਰ ਜ਼ਰੂਰ ਛੇੜੀ। ਪੰਥਕ ਮੁੱਦੇ ਦੇ ਆਧਾਰ ਉੱਤੇ ਹੀ ਅਕਾਲੀ ਦਲ ਵੱਲੋਂ ਸੰਗਰੂਰ ਜ਼ਿਮਨੀ ਚੋਣ ਲੜੀ ਗਈ ਜਿਸ ਦੇ ਵਿੱਚ ਅਕਾਲੀ ਉਮੀਦਵਾਰ ਕਮਲਦੀਪ ਕੌਰ ਰਾਜੋਆਣਾ ਦੀ ਜ਼ਮਾਨਤ ਤੱਕ ਜ਼ਬਤ ਹੋ ਗਈ ਸੀ। ਜਿਸਦਾ ਕਾਰਨ ਇਹ ਹੈ ਕਿ ਹੁਣ ਸ਼੍ਰੋਮਣੀ ਅਕਾਲੀ ਦਲ ਜਿੰਨਾ ਮਰਜ਼ੀ ਪੰਥਕ ਰਾਗ ਛੇੜ ਲਵੇ ਕਾਮਯਾਬ ਨਹੀਂ ਹੋ ਸਕਦਾ ਕਿਉਂਕਿ ਲੋਕਾਂ ਦਾ ਅਕਾਲੀ ਦਲ ਤੋਂ ਵਿਸ਼ਵਾਸ ਉੱਠ ਗਿਆ ਹੈ। ਜਿੰਨ੍ਹਾਂ ਮਰਜ਼ੀ ਅਕਾਲੀ ਦਲ ਦੁੱਧ ਧੋਤਾ ਬਣਨ ਦੀ ਕੋਸ਼ਿਸ਼ ਕਰ ਲਵੇ ਪਰ ਲੋਕਾਂ ਦਾ ਵਿਸ਼ਵਾਸ ਮੁੜ ਤੋਂ ਨਹੀਂ ਜਿੱਤ ਸਕਣਗੇ, ਪੰਥਕ ਸਿਆਸਤ ਨੂੰ ਅਣਗੌਲਿਆਂ ਕਰਨਾ ਹੀ ਅਕਾਲੀ ਦਲ ਨੂੰ ਬੈਕਫੁਟ 'ਤੇ ਲੈ ਆਇਆ ਹੈ।
ਪੰਜਾਬੀਆਂ ਦਾ ਰੋਸ ਅਕਾਲੀ ਦਲ ਨਾਲ ਨਹੀਂ ਬਲਕਿ ਬਾਦਲ ਪਰਿਵਾਰ ਨਾਲ ਹੈ: ਸਵਰਨ ਸਿੰਘ ਦਾਨੇਵਾਲੀਆ ਦਾ ਕਹਿਣਾ ਹੈ ਕਿ ਇਹ ਵੀ ਇਕ ਬਹੁਤ ਮਹੱਤਵਪੂਰਨ ਪਹਿਲੂ ਹੈ ਕਿ ਪੰਜਾਬੀਆਂ ਦਾ ਰੋਸ ਸ਼੍ਰੋਮਣੀ ਅਕਾਲੀ ਦਲ ਨਾਲ ਨਹੀਂ ਬਲਕਿ ਬਾਦਲ ਪਰਿਵਾਰ ਨਾਲ ਹੈ। ਜਦੋਂ ਤੱਕ ਸੁਖਬੀਰ ਬਾਦਲ ਅਕਾਲੀ ਦਲ ਦੀ ਰਹਿਨੁਮਾਈ ਕਰਦੇ ਰਹਿਣਗੇ ਉਦੋਂ ਤੱਕ ਅਕਾਲੀ ਦਲ ਦਾ ਆਧਾਰ ਪੰਜਾਬ ਵਿਚ ਕਾਇਮ ਨਹੀਂ ਹੋ ਸਕਦਾ। ਉਹਨਾਂ ਦਾਅਵਾ ਕੀਤਾ ਕਿ ਜੇਕਰ ਬਾਦਲ ਪਰਿਵਾਰ ਅਤੇ ਸੁਖਬੀਰ ਬਾਦਲ ਨੂੰ ਅਕਾਲੀ ਦਲ ਵਿਚੋਂ ਪਾਸੇ ਕਰ ਦਿੱਤਾ ਜਾਵੇ ਤਾਂ ਅਕਾਲੀ ਦਲ ਦੀ ਪੰਜਾਬ ਵਿਚ ਸਰਕਾਰ ਬਣਦਿਆਂ ਦੇਰ ਨਹੀਂ ਲੱਗਣੀ। ਇਥੋਂ ਤੱਕ 2024 ਲੋਕ ਸਭਾ ਵਿਚ ਅਕਾਲੀ ਦਲ ਦੀਆਂ 10 ਸੀਟਾਂ ਪੱਕੀਆਂ ਹਨ ਜੇਕਰ ਬਾਦਲ ਪਰਿਵਾਰ ਨੂੰ ਅਕਾਲੀ ਦਲ ਵਿਚੋਂ ਪਾਸੇ ਕਰ ਦਿੱਤਾ ਜਾਵੇ। ਸੁਖਬੀਰ ਬਾਦਲ ਆਪਣੀ ਜਿੱਦ ਉੱਤੇ ਅੜੇ ਹੋਏ ਹਨ। ਸੁਖਬੀਰ ਬਾਦਲ ਨੇ ਪਾਰਟੀ ਨੂੰ ਫੰਡਾਂ ਦੀ ਪਾਨ ਚੜਾਈ ਹੋਈ ਹੈ ਜਿਸ ਤੋਂ ਬਾਹਰ ਅਕਾਲੀ ਦਲ ਜਾ ਨਹੀਂ ਰਿਹਾ, ਇਸੇ ਲਈ ਅਕਾਲੀ ਦਲ ਪੰਜਾਬ ਵਿਚ ਆਪਣੀ ਹੋਂਦ ਕਾਇਮ ਰੱਖ ਲਵੇ ਇੰਨਾ ਹੀ ਬਹੁਤ ਹੋਵੇਗਾ।
ਅਕਾਲੀ ਆਗੂਆਂ ਦਾ ਭਾਜਪਾ ਵਿੱਚ ਜਾਣਾ ਕੋਈ ਵੱਡਾ ਮਸਲਾ ਨਹੀਂ: ਮਾਹਿਰਾਂ ਦੀ ਮੰਨੀਏ ਤਾਂ ਅਕਾਲੀ ਆਗੂਆਂ ਦਾ ਭਾਜਪਾ ਵਿੱਚ ਜਾਣਾ ਕੋਈ ਮਸਲਾ ਨਹੀਂ ਹੈ। ਜਿਸ ਪਾਰਟੀ ਦਾ ਪਹਿਲਾਂ ਹੀ ਕੋਈ ਆਧਾਰ ਨਹੀਂ ਉਸ ਦੇ ਲੀਡਰ ਜਿੱਧਰ ਮਰਜ਼ੀ ਜਾਣ ਕੋਈ ਫ਼ਰਕ ਨਹੀਂ ਪੈਂਦਾ। ਜੇਕਰ ਕਿਸੇ ਮਜ਼ਬੂਤ ਪਾਰਟੀ ਜਾਂ ਸੱਤਾ ਧਿਰ ਪਾਰਟੀ ਦੇ ਆਗੂ ਭਾਜਪਾ ਵਿਚ ਜਾਂਦੇ ਤਾਂ ਫਿਰ ਵੱਡਾ ਸਿਆਸੀ ਹੇਰ ਫੇਰ ਹੋ ਸਕਦਾ ਸੀ। ਰਹੀ ਗੱਲ ਭਾਜਪਾ ਦੀ ਤਾਂ ਭਾਜਪਾ ਪੰਜਾਬ ਦੇ ਵਿਚ ਕੋਈ ਵੱਡਾ ਦਾਅ ਨਹੀਂ ਲਗਾ ਸਕਦੀ, ਭਾਜਪਾ ਨੂੰ ਪੰਜਾਬ ਵਿਚ ਚੰਗਾ ਨਹੀਂ ਸਮਝਿਆ ਜਾਂਦਾ ਲੋਕ ਇਸ ਉੱਤੇ ਵਿਸ਼ਵਾਸ ਨਹੀਂ ਕਰਦੇ। ਪੰਜਾਬ ਵਿਚ ਭਾਜਪਾ ਨੂੰ ਅਜੇ ਵੀ ਸਿੱਖ ਅਤੇ ਕਿਸਾਨ ਵਿਰੋਧੀ ਪਾਰਟੀ ਹੀ ਮੰਨਿਆ ਜਾਂਦਾ।
ਇਹ ਵੀ ਪੜ੍ਹੋ: Partap Bajwa Advice to CM Mann: ਪ੍ਰਤਾਪ ਸਿੰਘ ਬਾਜਵਾ ਦੀ ਸੀਐੱਮ ਮਾਨ ਨੂੰ ਸਲਾਹ, ਕੋਈ ਕੰਮ ਕਰਨ ਤੋਂ ਪਹਿਲਾਂ ਕਰੋ ਹੋਮਵਰਕ
ਪੰਜਾਬ ਦਾ ਵੋਟਰ ਦੁਚਿੱਤੀ ਵਿੱਚ ਹੈ: ਦਾਨੇਵਾਲੀਆ ਕਹਿੰਦੇ ਹਨ ਕਿ ਪੰਜਾਬ ਦਾ ਵੋਟਰ ਪੂਰੀ ਤਰ੍ਹਾਂ ਦੁਚਿੱਤੀ ਵਿੱਚ ਹੈ। ਉਨ੍ਹਾਂ ਕਿਹਾ ਪੰਜਾਬ ਵਿਧਾਨ ਸਭਾ ਚੋਣਾਂ ਦੌਰਾਨ ਅਖੀਰਲੇ 2 ਮਹੀਨਿਆਂ ਵਿੱਚ ਲੋਕਾਂ ਦੇ ਮਨਾਂ ਅੰਦਰ ਬਦਲਾਅ ਦਾ ਖਿਆਲ ਆਇਆ ਸੀ। ਸ਼੍ਰੋਮਣੀ ਅਕਾਲੀ ਦਲ ਦੇ ਹਾਲਾਤਾਂ ਤੋਂ ਸਭ ਜਾਣੂੰ ਹਨ, ਕਾਂਗਰਸ ਦੀ ਕਲਾ ਨੇ ਕਾਂਗਰਸ ਨੂੰ ਸੱਤਾ ਧਿਰ ਨਹੀਂ ਬਣਨ ਦਿੱਤਾ। ਜਿਸ ਦਾ ਲਾਹਾ ਆਮ ਆਦਮੀ ਪਾਰਟੀ ਨੂੰ ਮਿਿਲਆ ਲੋਕਾਂ ਨੇ ਆਪ ਨੂੰ ਵੋਟਾਂ ਪਾਉਣ ਦੀ ਕੋਈ ਕਸਰ ਬਾਕੀ ਨਾ ਛੱਡੀ, ਹੁਣ ਪੰਜਾਬ ਦੇ ਜੋ ਹਾਲਾਤ ਹਨ ਉਹਨਾਂ ਨੇ ਵੋਟਰਾਂ ਨੂੰ ਮੁੜ ਤੋਂ ਉਲਝਾ ਦਿੱਤਾ ਹੁਣ ਚੁਣੌਤੀਆਂ ਅਕਾਲੀ ਦਲ, ਕਾਂਗਰਸ ਲਈ ਹੀ ਨਹੀਂ ਬਲਕਿ ਆਮ ਆਦਮੀ ਪਾਰਟੀ ਲਈ ਵੀ ਹਨ।
