ਚੰਡੀਗੜ੍ਹ: ਕੋਰੋਨਾ ਵਾਇਰਸ ਕਾਰਨ ਲੱਗੇ ਲੌਕਡਾਊਨ ਵਿੱਚ ਪੰਜਾਬ ਯੂਨੀਵਰਸਿਟੀ 250 ਤੋਂ ਵੀ ਵੱਧ ਵੱਡੀ ਉਮਰ ਦੇ ਅਤੇ ਵਿਆਹੇ ਹੋਏ ਵਿਦਿਆਰਥੀਆਂ ਦੀ ਕਾਊਂਸਲਿੰਗ ਕੀਤੀਹੈ। ਯੂਨੀਵਰਸਿਟੀ ਦੀ ਐਲੂਮਨੀ ਐਸੋਸੀਏਸ਼ਨ ਨੇ ਇੱਕ ਹੈਲਪਲਾਈਨ ਨੰਬਰ ਦੀ ਸ਼ੁਰੂਆਤ ਕੀਤੀ ਹੈ, ਜਿਸ ਨਾਲ ਕੋਈ ਵੀ ਵਿਦਿਆਰਥੀ ਆਪਣੇ ਪਰਿਵਾਰ ਸਬੰਧੀ, ਕਰੀਅਰ ਸਬੰਧੀ ਜਾ ਕਿਸੇ ਹੋਰ ਮੁੱਦੇ 'ਤੇ ਗ਼ੱਲ ਕਰ ਸਕਦਾ ਹੈ।
ਇਸ ਦੇ ਨਾਲ ਹੀ ਪੀਯੂ ਚੰਡੀਗੜ੍ਹ ਦੀ ਐਲੂਮਨੀ ਐਸੋਸੀਏਸ਼ਨ ਦੀ ਡੀਨ ਦੀਪਤੀ ਅਰੋੜਾ ਨੇ ਕਿਹਾ, "ਲੌਕਡਾਊਨ ਤੋਂ ਬਾਅਦ ਸਾਡੀ ਐਸੋਸੀਏਸ਼ਨ ਦੇ ਮੈਂਬਰ ਇਸ ਸਿੱਟੇ 'ਤੇ ਪਹੁੰਚੇ ਕਿ ਲੋਕਾਂ ਨੂੰ ਲੋੜੀਂਦੇ ਸਮਾਨ ਅਤੇ ਸ਼ਰੀਰਿਕ ਸਪੋਰਟ ਨਾਲੋਂ ਜ਼ਿਆਦਾ ਮਾਨਸਿਕ ਸਪੋਰਟ ਦੀ ਜ਼ਰੂਰੀ ਹੈ।"
ਇਸ ਤੋਂ ਬਾਅਦ ਐਸੋਸੀਏਸ਼ਨ ਨੇ ਸਵੈਇੱਛਤ ਕਾਊਂਸਲਿੰਗ ਕਰਨ ਦਾ ਫ਼ੈਸਲਾ ਕੀਤਾ ਤੇ 'ਟਾਕ ਟੂ ਪੰਜਾਬ ਯੂਨੀਵਰਸਿਟੀ ਐਸੋਸੀਏਸ਼ਨ' ਹੈਲਪਲਾਈਨ ਨੰਬਰ ਦੀ ਸ਼ੁਰੂਆਤ ਕੀਤੀ। ਕੋਈ ਵੀ ਵਿਦਿਆਰਥੀ ਜੇ ਪੜ੍ਹਾਈ ਕਰਕੇ ਪ੍ਰੇਸ਼ਾਨ ਹੈ ਤਾਂ ਉਹ ਇਸ ਨੰਬਰ 'ਤੇ ਆਪਣੀ ਸਮੱਸਿਆ ਦੱਸ ਸਕਦਾ ਹੈ।
ਦੱਸ ਦੇਈਏ ਕਿ ਐਸੋਸੀਏਸ਼ਨ ਦੇ 75 ਮੈਂਬਰ ਲੋਕਾਂ ਨੂੰ ਕਾਊਂਸਲ ਕਰਨਗੇ। ਇਸ ਦੇ ਨਾਲ ਹੀ ਦੀਪਤੀ ਅਰੋੜਾ ਨੇ ਕਿਹਾ ਕਿ, "75 ਮੈਂਬਰਾਂ ਵਿੱਚੋਂ 25-30 ਫ਼ੀਸਦੀ ਹੀ ਮੈਂਬਰ ਪੇਸ਼ੇਵਰ ਤਜ਼ਰਬੇ ਵਾਲੇ ਕਾਊਂਸਲਰ ਹਨ ਪਰ ਅਸੀਂ ਇਹ ਮਹਿਸੂਸ ਕੀਤਾ ਕਿ ਲੋਕਾਂ ਨੂੰ ਕਾਊਂਸਲ ਕਰਨ ਲਈ ਜ਼ਿਆਦਾ ਪੇਸ਼ੇਵਰ ਤੇ ਤਜ਼ਰਬੇਕਾਰ ਮੈਬਰਾਂ ਦੀ ਜ਼ਰੂਰਤ ਹੈ।"
