ਬਠਿੰਡਾ: ਪੰਜਾਬ ਵਿੱਚ ਸੱਤਾ ਪਰਿਵਰਤਨ ਤੋਂ ਬਾਅਦ ਲਗਾਤਾਰ ਭਗਵੰਤ ਮਾਨ ਸਰਕਾਰ ਵੱਲੋਂ ਲਏ ਜਾ ਰਹੇ ਫੈਸਲਿਆਂ ’ਚੋਂ ਇਕ ਫੈਸਲਾ ਪੰਜਾਬ ਵਿੱਚ ਹੋ ਰਹੀ ਬਿਜਲੀ ਚੋਰੀ ਨੂੰ ਠੱਲ੍ਹ ਪਾਉਣ ਲਈ ਲਿਆ ਗਿਆ ਹੈ ਪਰ ਇਸ ਤੋਂ ਪਹਿਲਾਂ ਬਠਿੰਡਾ ਦੇ ਐਂਟੀ ਪਾਵਰ ਥੈਫਟ ਥਾਣੇ ਵਿੱਚ ਛੇ ਸੌ ਤੋਂ ਵੱਧ ਬਿਜਲੀ ਚੋਰੀ ਦੇ ਕੇਸ ਰਜਿਸਟਰਡ ਕੀਤੇ ਜਾ ਚੁੱਕੇ ਹਨ ਅਤੇ ਬਿਜਲੀ ਚੋਰਾਂ ਤੋਂ ਕਰੋੜਾਂ ਰੁਪਏ ਜ਼ੁਰਮਾਨੇ ਵਜੋਂ ਵਸੂਲ ਕੀਤੇ ਜਾ ਚੁੱਕੇ ਹਨ।
ਸਾਲ 2022 ਵਿੱਚ 600 ਤੋਂ ਉਪਰ ਬਿਜਲੀ ਚੋਰੀ ਦੇ ਕੇਸ ਰਜਿਸਟਰਡ: ਬਠਿੰਡਾ ਦੇ ਥਾਣਾ ਐਂਟੀ ਪਾਵਰ ਥੈਪਟ ਦੇ ਇੰਚਾਰਜ ਨੇਤਰ ਦਾਸ ਨੇ ਦੱਸਿਆ ਕਿ ਸਾਲ 2022 ਵਿੱਚ ਉਨ੍ਹਾਂ ਵੱਲੋਂ ਬਿਜਲੀ ਚੋਰੀ ਦੇ ਕਰੀਬ 600 ਮਾਮਲੇ ਦਰਜ ਕੀਤੇ ਗਏ ਹਨ ਅਤੇ ਇੰਨ੍ਹਾਂ ਬਿਜਲੀ ਚੋਰਾਂ ਕੋਲੋਂ ਹੁਣ ਤੱਕ ਪੌਣੇ ਤਿੰਨ ਕਰੋੜ ਰੁਪਿਆ ਜ਼ੁਰਮਾਨੇ ਵਜੋਂ ਵਸੂਲ ਕੀਤਾ ਜਾ ਚੁੱਕਿਆ ਹੈ। ਉਨ੍ਹਾਂ ਦੱਸਿਆ ਕਿ ਇਨਫੋਰਸਮੈਂਟ ਵੱਲੋਂ ਬਿਜਲੀ ਚੋਰੀ ਫੜੇ ਜਾਣ ਤੋਂ ਬਾਅਦ ਉਨ੍ਹਾਂ ਕੋਲ ਸ਼ਿਕਾਇਤ ਦਰਜ ਕਰਵਾਈ ਜਾਂਦੀ ਹੈ ਇਸੇ ਸ਼ਿਕਾਇਤ ਅਧੀਨ ਉਨ੍ਹਾਂ ਵੱਲੋਂ ਬਿਜਲੀ ਚੋਰਾਂ ਖ਼ਿਲਾਫ਼ ਕੇਸ ਰਜਿਸਟਰਡ ਕੀਤਾ ਜਾਂਦਾ ਹੈ ਅਤੇ ਲੋਕ ਅਦਾਲਤ ਰਾਹੀਂ ਇਨ੍ਹਾਂ ਬਿਜਲੀ ਚੋਰਾਂ ਤੋਂ ਜ਼ੁਰਮਾਨੇ ਵਜੋਂ ਰਕਮ ਵਸੂਲੀ ਜਾਂਦੀ ਹੈ।
ਐਂਟੀਪਾਵਰ ਥੈਫਟ ਬਠਿੰਡਾ ਅਧੀਨ ਆਉਂਦੇ ਨੇ ਛੇ ਜ਼ਿਲ੍ਹੇ 88 ਸਬ ਡਿਵੀਜ਼ਨਾਂ: ਬਠਿੰਡਾ ਐਂਟੀ ਪਾਵਰ ਥੈਫਟ ਥਾਣੇ ਅਧੀਨ ਛੇ ਜ਼ਿਲ੍ਹੇ ਬਠਿੰਡਾ, ਸ੍ਰੀ ਮੁਕਤਸਰ ਸਾਹਿਬ, ਫ਼ਰੀਦਕੋਟ, ਫ਼ਿਰੋਜ਼ਪੁਰ, ਮਾਨਸਾ ਅਤੇ ਫ਼ਾਜ਼ਿਲਕਾ ਅਧੀਨ ਆਉਂਦੀਆਂ ਅਠਾਸੀ ਸਬ ਡਿਵੀਜ਼ਨਾਂ ਵਿੱਚ ਜੇਕਰ ਕੋਈ ਵੀ ਵਿਅਕਤੀ ਬਿਜਲੀ ਚੋਰੀ ਕਰਦਾ ਫੜਿਆ ਜਾਂਦਾ ਹੈ ਤਾਂ ਉਸ ਖ਼ਿਲਾਫ਼ ਮਾਮਲਾ ਦਰਜ ਕੀਤਾ ਜਾਂਦਾ ਹੈ। ਉਨ੍ਹਾਂ ਦੱਸਿਆ ਕਿ ਹੁਣ ਤੱਕ ਉਨ੍ਹਾਂ ਵੱਲੋਂ ਇਕਵੰਜਾ ਲੱਖ ਰੁਪਏ ਇੱਕੀ ਲੱਖ ਅਤੇ ਉਨੀ ਲੱਖ ਰੁਪਏ ਦੀ ਬਿਜਲੀ ਚੋਰੀ ਫੜੀ ਗਈ ਹੈ ਜਿਸ ਸਬੰਧੀ ਥਾਣਾ ਐਂਟੀ ਪਾਵਰ ਥੈਫਟ ਵਿਖੇ ਕੇਸ ਰਜਿਸਟਰਡ ਕੀਤਾ ਗਿਆ।
ਬਿਜਲੀ ਚੋਰਾਂ ਤੋਂ ਵਸੂਲੇ ਜੁਰਮਾਨੇ ਵਜੋਂ ਕਰੋੜਾਂ ਰੁਪਏ: ਇੰਸਪੈਕਟਰ ਨੇਤਰ ਦਾਸ ਨੇ ਦੱਸਿਆ ਕਿ ਸਾਲ 2022 ਵਿੱਚ ਛੇ ਸੌ ਦੇ ਕਰੀਬ ਬਿਜਲੀ ਚੋਰੀ ਦੇ ਕੇਸ ਰਜਿਸਟਰਡ ਕੀਤੇ ਗਏ ਸਨ ਜਿੰਨ੍ਹਾਂ ਵਿੱਚੋਂ 388 ਕੇਸਾਂ ਦਾ ਨਿਪਟਾਰਾ ਲੋਕ ਅਦਾਲਤ ਰਾਹੀਂ ਕੀਤਾ ਗਿਆ ਹੈ ਅਤੇ ਇੰਨ੍ਹਾਂ ਬਿਜਲੀ ਚੋਰਾਂ ਤੋਂ ਕਰੀਬ ਪੌਣੇ ਤਿੰਨ ਕਰੋੜ ਦਾ ਬਿਜਲੀ ਦਾ ਜੁਰਮਾਨਾ ਵਸੂਲ ਕੀਤਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਹੁਣ ਤੱਕ ਉਨ੍ਹਾਂ ਵੱਲੋਂ ਇਨਫੋਰਸਮੈਂਟ ਦੀ ਹਦਾਇਤ ਇਕਵੰਜਾ, ਉਨੀ ਲੱਖ ਅਤੇ ਇੱਕੀ ਲੱਖ ਰੁਪਏ ਦੀ ਵੱਡੀ ਬਿਜਲੀ ਚੋਰੀ ਕਰਦੇ ਇੰਡਸਟਰੀਲਿਸਟ ਨੂੰ ਫੜਿਆ ਗਿਆ ਹੈ।
ਦੂਸਰੀ ਵਾਰ ਬਿਜਲੀ ਚੋਰੀ ਕਰਦਾ ਫੜੇ ਜਾਣ ਤੇ ਹੋ ਸਕਦੀ ਹੈ ਤਿੰਨ ਸਾਲ ਦੀ ਸਜ਼ਾ: ਇੰਸਪੈਕਟਰ ਨੇਤਰ ਦਾਸ ਨੇ ਦੱਸਿਆ ਕਿ ਪੀਐੱਸਪੀਸੀਐੱਲ ਵੱਲੋਂ ਪਹਿਲੀ ਵਾਰ ਬਿਜਲੀ ਚੋਰੀ ਕਰਨ ’ਤੇ ਕੇਸ ਰਜਿਸਟਰਡ ਕਰਵਾ ਕੇ ਜੁਰਮਾਨਾ ਵਸੂਲ ਕੀਤਾ ਜਾਂਦਾ ਪ੍ਰੰਤੂ ਜੇਕਰ ਦੂਜੀ ਵਾਰ ਵਿਅਕਤੀ ਬਿਜਲੀ ਚੋਰੀ ਕਰਦਾ ਪਾਇਆ ਜਾਂਦਾ ਹੈ ਤਾਂ ਉਸ ਖ਼ਿਲਾਫ਼ ਕੇਸ ਰਜਿਸਟਰਡ ਕਰਵਾ ਕੇ ਅਦਾਲਤ ਰਾਹੀਂ ਸਜ਼ਾ ਕਰਵਾਉਣ ਦੀ ਪ੍ਰਕਿਰਿਆ ਅਪਣਾਈ ਜਾਂਦੀ ਹੈ। ਉਨ੍ਹਾਂ ਕਿਹਾ ਕਿ ਜੇਕਰ ਕੋਈ ਵਿਅਕਤੀ ਬਿਜਲੀ ਚੋਰੀ ਕਰਦਾ ਫੜਿਆ ਜਾਂਦਾ ਹੈ ਤਾਂ ਘੱਟੋ-ਘੱਟ ਉਸ ਨੂੰ ਤਿੰਨ ਸਾਲ ਦੀ ਸਜ਼ਾ ਹੋ ਸਕਦੀ ਹੈ।
ਇਹ ਵੀ ਪੜ੍ਹੋ: 'ਆਪ' ਸਰਕਾਰ ਦੇ ਦੋ ਮਹੀਨੇ ਦੇ ਕਾਰਕਾਲ 'ਤੇ ਵਿਰੋਧੀਆਂ ਨੇ ਸਾਧੇ ਨਿਸ਼ਾਨੇ, ਕਿਹਾ, "ਕਰਜ਼ਾ ਚੁੱਕ ਰਹੀ ਸਰਕਾਰ"
