ਕੋਲੰਬੋ: ਲੰਕਾ ਪ੍ਰੀਮੀਅਰ ਲੀਗ ਦੀ ਉਡੀਕ ਕਰ ਰਹੇ ਕ੍ਰਿਕੇਟ ਪ੍ਰਸ਼ੰਸਕਾਂ ਲਈ ਇੱਕ ਬੁਰੀ ਖ਼ਬਰ ਹੈ। ਲੀਗ 'ਚ ਆਂਦਰੇ ਰਸੇਲ, ਫਾਫ ਡੂ ਪਲੇਸਿਸ, ਡੇਵਿਡ ਮਿਲਰ ਅਤੇ ਡੇਵਿਡ ਮਲਾਨ ਨੇ ਨਾਂਅ ਵਾਪਸ ਲਿਆ ਹੈ। ਸਾਰੇ ਕ੍ਰਿਕੇਟਰਾਂ ਨੇ ਵੱਖੋ ਵੱਖਰੇ ਕਾਰਨ ਦੱਸੇ ਹਨ।
ਰਸੇਲ ਆਪਣੇ ਗੋਡੇ ਦੀ ਸੱਟ ਦੇ ਕਾਰਨ ਉਪਲਬਧ ਨਹੀਂ ਰਹਿਣਗੇ। ਡੂ ਪਲੇਸਿਸ, ਮਿਲਰ ਅਤੇ ਮਲਾਨ ਨੂੰ ਇੰਗਲੈਂਡ ਅਤੇ ਦੱਖਣੀ ਅਫਰੀਕਾ ਵਿਚਾਲੇ ਹੋਣ ਵਾਲੀ ਸੀਰੀਜ਼ ਦਾ ਹਿੱਸਾ ਬਣਨਾ ਹੈ, ਇਸ ਲਈ ਉਹ ਐਲਪੀਐਲ 2020 ਤੋਂ ਨਾਂਅ ਵਾਪਸ ਲੈ ਰਹੇ ਹਨ। ਇਸ ਤੋਂ ਇਲਾਵਾ ਜਿਨ੍ਹਾਂ ਨੇ ਆਪਣੇ ਨਾਮ ਵਾਪਸ ਲਏ ਹਨ, ਉਹ ਵਿਕਟਕੀਪਰ ਬੱਲੇਬਾਜ਼ ਮਨਵਿੰਦਰ ਬਿਸਲਾ ਹਨ ਜੋ ਆਈਪੀਐਲ ਦੇ 35 ਮੈਚ ਖੇਡ ਚੁੱਕੇ ਹਨ।
ਐਲਪੀਐਲ 2020 ਦਾ ਸੀਜ਼ਨ 21 ਨਵੰਬਰ ਤੋਂ ਸ਼ੁਰੂ ਹੋਵੇਗਾ ਅਤੇ ਇਸ ਦਾ ਆਖ਼ਰੀ ਮੈਚ 13 ਦਸੰਬਰ ਨੂੰ ਖੇਡਿਆ ਜਾਵੇਗਾ। ਐਲਪੀਐਲ ਦੇ ਨਿਰਦੇਸ਼ਕ ਰਵੀਨ ਵਿਕਰਮਾਰਤਨੇ ਨੇ ਕਿਹਾ ਹੈ ਕਿ ਜਿਨ੍ਹਾਂ ਫਰੈਂਚਾਇਜ਼ੀ ਕੋਲ ਇਹ ਖਿਡਾਰੀ ਸਨ, ਹੁਣ ਉਨ੍ਹਾਂ ਨੂੰ ਹੋਰ ਖਿਡਾਰੀ ਉਨ੍ਹਾਂ ਦੀ ਜਗ੍ਹਾ ਲਿਆਉਣੇ ਹੋਣਗੇ।
ਕੋਲੰਬੋ ਕਿੰਗਜ਼ ਨੂੰ ਐਲਪੀਐਲ ਵਿੱਚ ਸਭ ਤੋਂ ਵੱਡਾ ਝਟਕਾ ਲੱਗਾ ਹੈ। ਟੀਮ ਵਿੱਚ ਤਿੰਨ ਵੱਡੇ ਨਾਮ ਸਨ। ਰਸਲ, ਡੂ ਪਲੇਸਿਸ ਅਤੇ ਬਿਸਲਾ ਇਸ ਟੀਮ ਦਾ ਹਿੱਸਾ ਸਨ।
