ਮੋਗਾਦਿਸ਼ੁ : ਸੋਮਾਲੀਆ ਦੀ ਰਾਜਧਾਨੀ 'ਚ ਸ਼ਨੀਵਾਰ ਸਵੇਰੇ ਇੱਕ ਸੁਰੱਖਿਆ ਜਾਂਚ ਚੌਕੀ 'ਤੇ ਹੋਏ ਟਰੱਕ ਬੰਬ ਧਮਾਕੇ 'ਚ 76 ਲੋਕਾਂ ਦੇ ਮਾਰੇ ਜਾਣ ਦੀ ਸਾਹਮਣੇ ਆਈ ਖ਼ਬਰ ਹੈ। ਇਹ ਹਮਲਾ ਬਿਤੇ ਕੁਝ ਸਾਲਾਂ ਦੌਰਾਨ ਮੋਗਾਦਿਸ਼ੁ ਵਿੱਚ ਹੋਏ ਸਭ ਤੋਂ ਭਿਆਨਕ ਹਮਲਿਆਂ ਵਿੱਚੋਂ ਇੱਕ ਹੈ।
ਇਸ ਧਮਾਕੇ ਨੂੰ ਵੇਖਣ ਵਾਲੇ ਪ੍ਰਤੱਖ ਦ੍ਰਸ਼ੀ ਲੋਕਾਂ ਨੇ ਕਿਹਾ ਕਿ ਇਸ ਧਮਾਕੇ ਨੁੂੰ ਵੇਖ ਕੇ ਉਨ੍ਹਾਂ ਨੂੰ ਸਾਲ 2017 ਵਿੱਚ ਹੋਏ ਧਮਾਕੇ ਦੀ ਯਾਦ ਆ ਗਈ, ਜਿਸ 'ਚ ਸੈਂਕੜੇ ਲੋਕ ਮਾਰੇ ਗਏ ਸਨ। ਇਸ ਬਾਰੇ ਸਰਕਾਰੀ ਬੁਲਾਰੇ ਇਸਮਾਇਲ ਮੁਖ਼ਤਾਰ ਨੇ ਆਪਣੇ ਬਿਆਨ 'ਚ ਕਿਹਾ ਕਿ ਇਸ ਹਾਦਸੇ 'ਚ ਮ੍ਰਿਤਕਾਂ ਦੀ ਗਿਣਤੀ ਹੋਰ ਵੱਧ ਸਕਦੀ ਹੈ, ਕਿਉਂਕਿ ਕਈ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਲੋਕ ਹਸਪਤਾਲਾਂ 'ਚ ਦਾਖਲ ਹਨ।
ਮਦੀਨਾ ਹਸਪਤਾਲ ਦੇ ਡਾਇਰੈਕਟਰ ਡਾ. ਮੁਹੰਮਦ ਯੂਸਫ ਨੇ ਜਾਣਕਾਰੀ ਦਿੱਤੀ ਕਿ 73 ਲਾਸ਼ਾਂ ਹਸਪਤਾਲ ਪਹੁੰਚਾਇਆਂ ਗਈਆਂ ਹਨ। ਆਮੀਨ ਐਂਬੂਲੈਂਸ ਸਰਵਿਸ ਦੇ ਡਾਇਰੈਕਟਰ ਅਬੇਦੀਕਾਦਿਰ ਅਬਦਿਰਾਹਮਾਨ ਨੇ ਜ਼ਖਮੀਆਂ ਦੀ ਗਿਣਤੀ 50 ਤੋਂ ਵੱਧ ਹੋਣ ਦੀ ਖ਼ਬਰ ਦਿੱਤੀ ਹੈ। ਇਸ ਬੰਬ ਧਮਾਕੇ 'ਚ ਮਾਰੇ ਗਏ ਲੋਕਾਂ ਵਿਚੋਂ ਜ਼ਿਆਦਾਤਰ ਯੂਨੀਵਰਸਿਟੀਆਂ ਅਤੇ ਹੋਰ ਸੰਸਥਾਵਾਂ ਦੇ ਵਿਦਿਆਰਥੀ ਸਨ ਜੋ ਕਿ ਆਪਣੀ ਕਲਾਸਾਂ ਲਈ ਨਿਕਲੇ ਸਨ । ਪੁਲਿਸ ਨੇ ਦੱਸਿਆ ਕਿ ਮ੍ਰਿਤਕਾਂ 'ਚ ਦੋ ਤੁਰਕੀ ਨਾਗਰਿਕ ਵੀ ਸ਼ਾਮਲ ਹਨ।
ਕੈਪਟਨ ਮੁਹੰਮਦ ਹੁਸੈਨ ਨੇ ਦੱਸਿਆ ਕਿ ਇਹ ਧਮਾਕਾ ਉਸ ਵੇਲੇ ਹੋਇਆ ਜਦ ਸੋਮਾਲੀਆ ਦੇ ਲੋਕ ਵੀਕੈਂਡ ਤੋਂ ਬਾਅਦ ਆਪੋ-ਆਪਣੇ ਕੰਮਾਂ ਲਈ ਰਵਾਨਾ ਹੋਏ ਸਨ। ਇਸ ਵਿੱਚ, ਸੁਰੱਖਿਆ ਜਾਂਚ ਚੌਕੀ ਸਥਿਤ ਕਰਕੇ ਟੈਕਸ ਉਗਾਹੀ ਕੇਂਦਰ ਨੂੰ ਵੀ ਨਿਸ਼ਾਨਾ ਬਣਾਇਆ ਗਿਆ।
ਹੋਰ ਪੜ੍ਹੋ : ਹੇਮੰਤ ਸੋਰੇਨ ਅੱਜ ਚੁੱਕਣਗੇ ਝਾਰਖੰਡ ਦੇ ਮੁੱਖ ਮੰਤਰੀ ਅਹੁਦੇ ਦੀ ਸਹੁੰ
ਧਮਾਕੇ ਤੋਂ ਬਾਅਦ ਰਾਜਧਾਨੀ ਦੇ ਉੱਤੇ ਧੂੰਏਂ ਦਾ ਗੁਬਾਰ ਛਾ ਗਿਆ। ਹਾਦਸੇ ਵਾਲੀ ਥਾਂ ਉੱਤੇ ਵਾਹਨਾਂ ਅਤੇ ਲਾਸ਼ਾਂ ਦਾ ਢੇਰ ਵਿਖਾਈ ਦੇ ਰਿਹਾ ਹੈ। ਫਿਲਹਾਲ ਅਜੇ ਕਿਸੇ ਵੀ ਸੰਗਠਨ ਨੇ ਇਸ ਹਮਲੇ ਦੀ ਜ਼ਿੰਮੇਵਾਰੀ ਨਹੀਂ ਚੁਕੀ ਹੈ।
ਜਾਣਕਾਰੀ ਮੁਤਾਬਕ ਅਲ ਕਾਇਦਾ ਸੰਗਠਨ ਨਾਲ ਜੁੜੀ ਅੱਤਵਾਦੀ ਸੰਗਠਨ' ਅਲ ਸ਼ਬਾਬ 'ਅਕਸਰ ਇਸ ਤਰ੍ਹਾਂ ਦੇ ਹਮਲੇ ਕਰਦੀ ਹੈ। ਇਸ ਕੱਟੜਪੰਥੀ ਸਮੂਹ ਨੂੰ ਕਈ ਸਾਲ ਪਹਿਲਾਂ ਮੋਗਾਦਿਸ਼ੁ ਤੋਂ ਭੱਜਾ ਦਿੱਤਾ ਗਿਆ ਸੀ ਪਰੰਤੂ ਸੁਰੱਖਿਆ ਚੌਕੀਆਂ, ਹੋਟਲਾਂ ਅਤੇ ਸਮੁੰਦਰੀ ਕੰਢਿਆਂ 'ਤੇ ਅਜੇ ਵੀ ਇਸ ਤਰ੍ਹਾਂ ਦੇ ਵੱਡੇ ਹਮਲੇ ਲਗਾਤਾਰ ਜਾਰੀ ਹਨ। ਅਲ ਸ਼ਬਾਬ ਨੇ ਸਾਲ 2017 'ਚ ਮੋਗਾਦਿਸ਼ੁ 'ਚ ਅਜਿਹਾ ਹੀ ਇੱਕ ਭਿਆਨਕ ਟਰੱਕ ਬੰਬ ਧਮਾਕਾ ਕੀਤਾ ਸੀ, ਜਿਸ ਵਿੱਚ 500 ਤੋਂ ਵੱਧ ਲੋਕ ਮਾਰੇ ਗਏ ਸਨ।
