ਮੁੰਬਈ: ਫਰਾਂਸ ਦੇ ਕਾਨਸ ਸ਼ਹਿਰ ਦੇ ਤੱਟਵਰਤੀ ਖੇਤਰ ਫ੍ਰੈਂਚ ਰਿਵੇਰਾ 'ਚ 76ਵਾਂ ਕਾਨਸ ਫਿਲਮ ਫੈਸਟੀਵਲ ਆਯੋਜਿਤ ਕੀਤਾ ਜਾ ਰਿਹਾ ਹੈ। ਇਸ ਸਾਲ ਭਾਰਤ ਦੀਆਂ ਕਈ ਅਦਾਕਾਰਾ ਨੇ ਕਾਨਸ ਵਿੱਚ ਆਪਣਾ ਡੈਬਿਊ ਕੀਤਾ ਹੈ। ਇਸ ਦੇ ਨਾਲ ਹੀ ਹੁਣ ਇਸ ਇੰਟਰਨੈਸ਼ਨਲ ਈਵੈਂਟ 'ਤੇ ਮਸ਼ਹੂਰ ਬਾਲੀਵੁੱਡ ਅਦਾਕਾਰ ਨਵਾਜ਼ੂਦੀਨ ਦੀਆਂ ਸਖ਼ਤ ਟਿੱਪਣੀਆਂ ਆਈਆਂ ਹਨ।
ਜੇਕਰ ਨਵਾਜ਼ ਦੀ ਇਸ ਟਿੱਪਣੀ ਦਾ ਸਿੱਧਾ ਮਤਲਬ ਦੇਖਿਆ ਜਾਵੇ ਤਾਂ ਇਹ ਅਨੁਰਾਗ ਕਸ਼ਯਪ ਦੀ ਫਿਲਮ 'ਕੈਨੇਡੀ' ਨਾਲ ਜੁੜਿਆ ਜਾਪਦਾ ਹੈ। ਕਾਨਸ ਫਿਲਮ ਫੈਸਟੀਵਲ 'ਤੇ ਨਵਾਜ਼ੂਦੀਨ ਦਾ ਇਹ ਬਿਆਨ ਕਾਫੀ ਹੈਰਾਨ ਕਰਨ ਵਾਲਾ ਹੈ। ਨਵਾਜ਼ੂਦੀਨ ਸਿੱਦੀਕੀ ਨੇ ਸਾਫ਼ ਕਿਹਾ ਹੈ ਕਿ ਇੱਥੇ ਆਡੀਟੋਰੀਅਮ ਕਿਰਾਏ 'ਤੇ ਲੈ ਕੇ ਸਾਡੇ ਹੀ ਲੋਕਾਂ ਨੂੰ ਫਿਲਮਾਂ ਦਿਖਾਈਆਂ ਜਾਂਦੀਆਂ ਹਨ ਅਤੇ ਫਿਰ ਉਹ ਕਹਿੰਦੇ ਹਨ ਕਿ ਸਾਡੀ ਫਿਲਮ ਕਾਨਸ 'ਚ ਦਿਖਾਈ ਗਈ ਹੈ।
ਤੁਹਾਨੂੰ ਦੱਸ ਦੇਈਏ ਕਿ ਨਵਾਜ਼ੂਦੀਨ ਦੀਆਂ ਕਾਨਸ ਫਿਲਮ ਫੈਸਟੀਵਲ 'ਚ ਹੁਣ ਤੱਕ 9 ਫਿਲਮਾਂ ਦਿਖਾਈਆਂ ਜਾ ਚੁੱਕੀਆਂ ਹਨ। ਅਦਾਕਾਰ ਦੀ ਪਹਿਲੀ ਫਿਲਮ ਮਿਸ ਲਵਲੀ (2012) ਕਾਨਸ ਵਿਖੇ ਪ੍ਰਦਰਸ਼ਿਤ ਕੀਤੀ ਗਈ ਸੀ। ਉਦੋਂ ਤੋਂ ਅਦਾਕਾਰ ਦੀਆਂ ਫਿਲਮਾਂ ਜਿਵੇਂ 'ਦਿ ਲੰਚਬਾਕਸ', 'ਮੰਟੋ' ਅਤੇ 'ਮਾਨਸੂਨ ਸ਼ੂਟਆਊਟ' ਕਾਨਸ ਵਿੱਚ ਦਿਖਾਈਆਂ ਗਈਆਂ ਹਨ। ਅਦਾਕਾਰ ਨੇ ਕਿਹਾ ਕਿ ਉਨ੍ਹਾਂ ਦੀਆਂ ਸਾਰੀਆਂ ਫਿਲਮਾਂ ਅਧਿਕਾਰਤ ਤੌਰ 'ਤੇ ਚੁਣੀਆਂ ਗਈਆਂ ਹਨ।
ਨਵਾਜ਼ੂਦੀਨ ਨੇ ਕਾਨਸ 'ਤੇ ਕੀ ਕਿਹਾ?: ਮੀਡੀਆ ਰਿਪੋਰਟਾਂ ਦੇ ਮੁਤਾਬਕ ਇੱਕ ਇੰਟਰਵਿਊ ਵਿੱਚ ਨਵਾਜ਼ੂਦੀਨ ਨੇ ਕਿਹਾ 'ਤੁਹਾਡੀ ਫਿਲਮ ਨੂੰ ਅਧਿਕਾਰਤ ਤੌਰ 'ਤੇ ਕਾਨਸ ਲਈ ਨਹੀਂ ਚੁਣਿਆ ਗਿਆ ਹੈ, ਪਰ ਤੁਸੀਂ ਆਪਣੀ ਫਿਲਮ ਨੂੰ ਇੱਥੇ ਲੈ ਜਾ ਸਕਦੇ ਹੋ, ਇੱਥੇ ਕੁਝ ਆਡੀਟੋਰੀਅਮ ਹਨ, ਜਿਨ੍ਹਾਂ ਨੂੰ ਕਿਰਾਏ 'ਤੇ ਦਿੱਤਾ ਜਾ ਸਕਦਾ ਹੈ, ਆਡੀਟੋਰੀਅਮ ਦੇ ਮਾਲਕ ਨੂੰ ਪੈਸੇ ਦਿਓ ਅਤੇ ਚੱਲੋ। ਰੈੱਡ ਕਾਰਪੇਟ 'ਤੇ ਆਪਣੇ ਲੋਕਾਂ ਨੂੰ ਲਿਆਓ, ਫੋਟੋ ਖਿੱਚੋ ਅਤੇ ਆਪਣੇ ਹੀ ਲੋਕਾਂ ਨੂੰ ਫਿਲਮ ਦਿਖਾਓ ਅਤੇ ਫਿਰ ਵਾਪਸ ਆ ਕੇ ਕਹੋ ਕਿ ਸਾਡੀ ਫਿਲਮ ਕਾਨਸ ਫਿਲਮ ਫੈਸਟੀਵਲ ਵਿੱਚ ਚੁਣੀ ਗਈ ਹੈ'।
ਅਦਾਕਾਰ ਨੇ ਅੱਗੇ ਕਿਹਾ 'ਮੈਨੂੰ ਅਜੇ ਵੀ ਸਮਝ ਨਹੀਂ ਆਉਂਦੀ ਕਿ ਇਨ੍ਹਾਂ ਵਿੱਚੋਂ ਅੱਧੇ ਲੋਕ ਇੱਥੇ ਕਿਉਂ ਜਾਂਦੇ ਹਨ, ਜਦੋਂ ਅਸੀਂ ਉੱਥੇ ਸੀ ਤਾਂ ਲੋਕ ਕਹਿੰਦੇ ਸਨ ਕਿ ਤੁਸੀਂ ਇੱਥੇ ਕਿਵੇਂ ਅਤੇ ਕਿਉਂ ਆਏ ਹੋ?' ਅਸੀਂ ਉਨ੍ਹਾਂ ਨੂੰ ਕਹਿੰਦੇ ਸੀ ਕਿ ਸਾਡੀ ਫਿਲਮ ਲੈ ਕੇ ਆਈ ਹੈ, ਉਹ ਫਿਰ ਸਾਨੂੰ ਪੁੱਛਦੇ ਕਿ ਕਿੱਥੇ ਅਤੇ ਸਾਡੇ ਕੋਲ ਕੋਈ ਜਵਾਬ ਨਹੀਂ ਸੀ।
ਨਵਾਜ਼ ਨੇ ਇਹ ਵੀ ਕਿਹਾ ਕਿ ਕਾਨਸ ਜਾਣ ਦਾ ਮਤਲਬ ਇਹ ਨਹੀਂ ਕਿ ਤੁਹਾਡੀ ਫਿਲਮ ਹਿੱਟ ਹੋ ਜਾਵੇਗੀ। ਇਹ ਸਿਰਫ਼ ਪ੍ਰਚਾਰ ਦਾ ਸਾਧਨ ਹੈ। ਅਦਾਕਾਰ ਨੇ ਦੱਸਿਆ ਕਿ ਉਨ੍ਹਾਂ ਦੀ ਫਿਲਮ 'ਮਿਸ ਲਵਲੀ' ਕਾਨਸ ਜਾਣ ਤੋਂ ਬਾਅਦ ਵੀ ਕੰਮ ਨਹੀਂ ਕਰ ਸਕੀ। ਨਵਾਜ਼ ਨੇ ਕਾਨਸ ਫਿਲਮ ਫੈਸਟੀਵਲ ਨੂੰ 'ਸਿਨੇਮਾ ਦਾ ਮੱਕਾ' ਦੱਸਿਆ ਹੈ।
