ਅੰਮ੍ਰਿਤਸਰ: ਤੁਸੀਂ ਬਹੁਤ ਸਾਰੇ ਅਜਿਹੇ ਲੋਕ ਵੇਖੇ ਹੋਣਗੇ ਜੋ ਕਿ ਫਿਟਨੈਸ ਨੂੰ ਲੈ ਕੇ ਬੇਹਦ ਜਾਗਰੂਕ ਹੁੰਦੇ ਹਨ ਤੇ ਖ਼ੁਦ ਨੂੰ ਫਿੱਟ ਰੱਖਣਾ ਪਸੰਦ ਕਰਦੇ ਹਨ। ਅੰਮ੍ਰਿਤਸਰ ਦੀ 75 ਸਾਲਾ ਸ਼ਕੁੰਤਲਾ ਦੇਵੀ 16 ਸਾਲ ਦੀ ਕੁੜੀਆਂ ਨੂੰ ਵੀ ਮਾਤ ਦਿੰਦੀ ਹੈ। ਇਹ ਬਜ਼ੁਰਗ ਮਹਿਲਾ ਔਖੇ ਤੋਂ ਔਖੇ ਯੋਗ ਆਸਨ ਅਸਾਨੀ ਨਾਲ ਕਰ ਲੈਂਦੀ ਹੈ। ਇਸ ਬਜ਼ੁਰਗ ਮਹਿਲਾ ਨੂੰ ਲੋਕ 'ਯੋਗ ਮਾਤਾ' ਦੇ ਨਾਂਅ ਤੋਂ ਜਾਣਦੇ ਹਨ।
ਈਟੀਵੀ ਭਾਰਤ ਨਾਲ ਗੱਲ ਕਰਦਿਆਂ ਸ਼ਕੁੰਤਲਾ ਦੇਵੀ ਨੇ ਦੱਸਿਆ ਕਿ 60 ਸਾਲ ਦੀ ਉਮਰ 'ਚ ਉਹ ਕਈ ਬਿਮਾਰੀਆਂ ਦਾ ਸ਼ਿਕਾਰ ਸੀ। ਉਸ ਨੂੰ ਕਮਰ ਦਰਦ ਤੇ ਗੋਡੀਆਂ ਦਾ ਦਰਦ ਰਹਿੰਦਾ ਸੀ। ਇੱਕ ਦਿਨ ਉਸ ਨੇ ਟੀਵੀ 'ਤੇ ਬਾਬਾ ਰਾਮਦੇਵ ਨੂੰ ਯੋਗ ਆਸਨ ਕਰਦਿਆਂ ਵੇਖਿਆ। ਬਾਬਾ ਰਾਮਦੇਵ ਤੋਂ ਪ੍ਰੇਰਤ ਹੋ ਕੇ ਉਸ ਨੇ ਰੋਜ਼ਾਨਾ ਯੋਗ ਕਰਨਾ ਸ਼ੁਰੂ ਕੀਤਾ ਤੇ ਕੁਝ ਦਿਨਾਂ ਬਾਅਦ ਉਨ੍ਹਾਂ ਦੀਆਂ ਬਿਮਾਰੀਆਂ ਠੀਕ ਹੋ ਗਈਆਂ। ਉਦੋਂ ਤੋਂ ਉਹ ਹਰ ਰੋਜ਼ ਯੋਗ ਆਸਨ ਕਰਕੇ ਖ਼ੁਦ ਨੂੰ ਫਿਟ ਰੱਖਦੀ ਹੈ ਤੇ ਹੋਰਨਾਂ ਲੋਕਾਂ ਨੂੰ ਵੀ ਯੋਗ ਲਈ ਪ੍ਰੇਰਤ ਕਰਦੀ ਹੈ। ਸ਼ਕੁੰਤਲਾ ਦੇਵੀ ਨੂੰ ਯੋਗ ਕਰਦਿਆਂ ਤਕਰੀਬਨ 12 ਸਾਲ ਹੋ ਗਏ ਹਨ। ਹੁਣ ਉਹ ਲੋਕਾਂ ਨੂੰ ਘਰ 'ਚ ਮੁਫ਼ਤ ਯੋਗਾ ਵੀ ਸਿਖਾਉਂਦੀ ਹੈ।
ਸ਼ਕੁੰਤਲਾ ਦੇਵੀ ਨੇ ਕਿਹਾ ਕਿ ਸਾਨੂੰ ਫਾਸਟ ਫੂਡ ਤੇ ਫਰੋਜ਼ਨ ਖਾਣਿਆਂ ਤੋਂ ਪਰਹੇਜ਼ ਕਰਨਾ ਚਾਹੀਦਾ ਹੈ। ਜਿਨ੍ਹਾਂ ਹੋ ਸਕੇ ਘਰ ਦਾ ਬਣਿਆ ਖਾਣਾ ਹੀ ਖਾਣਾ ਚਾਹੀਦਾ ਹੈ। ਉਨ੍ਹਾਂ ਅਖਿਆ ਕਿ ਮੌਜੂਦਾ ਸਮੇਂ 'ਚ ਨੌਜਵਾਨ ਪੀੜੀ ਫੋਨ ਤੇ ਇਲੈਕਟ੍ਰਾਨਿਕ ਚੀਜ਼ਾਂ ਦਾ ਕਾਫ਼ੀ ਇਸਤੇਮਾਲ ਕਰਦੀ ਹੈ। ਜਿਸ ਨਾਲ ਉਹ ਕਈ ਤਰ੍ਹਾਂ ਦੀਆਂ ਮਾਨਸਿਕ ਤੇ ਸਰੀਰਕ ਬਿਮਾਰੀਆਂ ਦੇ ਸ਼ਿਕਾਰ ਹੋ ਜਾਂਦੇ ਹਨ, ਪਰ ਯੋਗਾ ਨਾਲ ਅਸੀਂ ਖ਼ੁਦ ਨੂੰ ਤੰਦਰੁਸਤ ਰੱਖ ਸਕਦੇ ਹਾਂ।
ਸ਼ਕੁੰਤਲਾ ਦੇਵੀ ਦੇ ਪੁੱਤਰ ਰਾਜਕੁਮਾਰ ਨੇ ਦੱਸਿਆ ਕਿ ਉਹ ਪੰਜਾਬ ਪੁਲਿਸ 'ਚ ਬਤੌਰ ਏਐਸਆਈ ਡਿਊਟੀ ਕਰਦਾ ਹੈ। ਰਾਜ ਕੁਮਾਰ ਨੇ ਦੱਸਿਆ ਕਿ ਉਸ ਦੀ ਮਾਂ ਅਕਸਰ ਬਿਮਾਰ ਰਹਿੰਦੀ ਸੀ। ਉਨ੍ਹਾਂ ਦੀ ਮਾਤਾ ਟੀਵੀ 'ਤੇ ਬਾਬਾ ਰਾਮਦੇਵ ਨੂੰ ਯੋਗਾ ਕਰਦੇ ਵੇਖ ਕੇ ਪ੍ਰੇਰਿਤ ਹੋਈ ਅਤੇ ਰੋਜ਼ ਯੋਗ ਕਰਨ ਲੱਗ ਪਈ। ਰਾਜਕੁਮਾਰ ਨੇ ਦੱਸਿਆ ਕਿ ਪਹਿਲਾਂ ਉਹ ਯੋਗ 'ਤੇ ਵਿਸ਼ਵਾਸ ਨਹੀਂ ਕਰਦਾ ਸੀ ਪਰ ਬਾਅਦ 'ਚ ਜਦ ਉਸ ਦੀ ਮਾਂ ਨੂੰ ਯੋਗਾ ਕਰਨ ਨਾਲ ਫਰਕ ਪਿਆ ਤਾਂ ਹੁਣ ਸਾਰਾ ਪਰਿਵਾਰ ਯੋਗਾ ਕਰਦਾ ਹੈ।
