ਨਵੀਂ ਦਿੱਲੀ: ਫੇਸਬੁਕ ਦੀ ਮਾਲਕੀਅਤ ਵਾਲੇ ਵਟਸਐਪ ਨੇ ਇੱਕ ਨਵਾਂ ਖ਼ੁਲਾਸਾ ਕੀਤਾ ਹੈ ਜਿਸ ਵਿੱਚ ਇਹ ਗੱਲ ਸਾਹਮਣੇ ਆਈ ਹੈ ਕਿ ਲੋਕ ਸਭਾ ਚੋਣਾ 2019 ਦੌਰਾਨ ਭਾਰਤ ਦੇ ਕਈ ਪੱਤਰਕਾਰਾਂ ਅਤੇ ਮਨੁੱਖੀ ਅਧਿਕਾਰ ਕਾਰਕੁਨਾਂ ਦੀ ਜਾਸੂਸੀ ਕੀਤੀ ਗਈ ਸੀ। ਇਸ ਲਈ ਇਜ਼ਰਾਈਲ ਸਪਾਈਵੇਅਰ ਪੈਗਾਸਸ ਦੀ ਵਰਤੋਂ ਕੀਤੀ।
ਜਾਣਕਾਰੀ ਮੁਤਾਬਕ ਇਹ ਖ਼ੁਲਾਸਾ ਸੈਨ ਫ਼ਰਾਂਸਿਸਕੋ ਵਿੱਚ ਇੱਕ ਅਮਰੀਕੀ ਫੈਡਰਲ ਕੋਰਟ ਵਿੱਚ ਹੋਇਆ, ਜਿੱਥੇ ਮੰਗਲਵਾਰ ਨੂੰ ਇੱਕ ਮੁਕੱਦਮੇ ਦੀ ਸੁਣਵਾਈ ਚੱਲ ਰਹੀ ਸੀ। ਇਸ ਵਿੱਚ ਵਟਸਐਪ ਨੇ ਦੋਸ਼ ਲਗਾਇਆ ਕਿ ਇਜ਼ਰਾਇਲੀ ਐਨਐਸਓ ਗਰੁੱਪ ਨੇ ਸਪਾਈਵੇਅਰ ਪੈਗਾਸਸ ਦੀ ਵਰਤੋਂ ਕਰਕੇ ਲਗਭਗ 1400 ਵਟਸਐਪ ਯੂਜ਼ਰਸ ਉੱਤੇ ਨਜ਼ਰ ਰੱਖੀ ਸੀ।
ਦੱਸ ਦਈਏ ਕਿ ਵਟਸਐਪ ਨੇ ਭਾਰਤ ਵਿੱਚ ਸਰਵਿਲਾਂਸ ਉੱਤੇ ਰੱਖੇ ਗਏ ਲੋਕਾਂ ਦੀ ਪਛਾਣ ਅਤੇ ਗਿਣਤੀ ਦਾ ਖ਼ੁਲਾਸਾ ਕਰਨ ਤੋਂ ਸਾਫ਼ ਇਨਕਾਰ ਕਰ ਦਿੱਤਾ ਹੈ। ਸੋਸ਼ਲ ਮੀਡੀਆ ਪਲੈਟਫਾਰਮ ਦੇ ਅਮਰੀਕੀ ਬੇਸਡ ਡਾਇਰੈਕਟਰ ਕਾਰਲ ਵੂਗ ਨੇ ਦੱਸਿਆ ਕਿ ਵਟਸਐਪ ਉਨ੍ਹਾਂ ਲੋਕਾਂ ਬਾਰੇ ਜਾਣਦਾ ਸੀ ਜਿਨ੍ਹਾਂ ਵਿੱਚੋਂ ਹਰ ਇੱਕ ਨਾਲ ਸੰਪਰਕ ਕੀਤਾ ਗਿਆ।
ਵੂਗ ਮੁਤਾਬਕ ਭਾਰਤੀ ਪੱਤਰਕਾਰਾਂ ਅਤੇ ਅਤੇ ਮਨੁੱਖੀ ਅਧਿਕਾਰ ਕਾਰਕੁਨਾਂ ਨੂੰ ਸਰਵਿਲਾਂਸ ਉੱਤੇ ਰੱਖਿਆ ਗਿਆ ਸੀ ਪਰ ਉਹ ਉਨ੍ਹਾਂ ਦੀ ਪਛਾਣ ਅਤੇ ਗਿਣਤੀ ਦੀ ਜਾਣਕਾਰੀ ਦਾ ਖ਼ੁਲਾਸਾ ਨਹੀਂ ਕਰ ਸਕਦੇ।
ਐਨਐਸਓ ਗਰੁੱਪ ਅਤੇ ਕਿਊ ਸਾਈਬਰ ਤਕਨਾਲੋਜੀ ਵਿਰੁੱਧ ਮਾਮਲੇ ਵਿੱਚ ਵਟਸਐਪ ਨੇ ਦੋਸ਼ ਲਗਾਇਆ ਕਿ ਇਨ੍ਹਾਂ ਕੰਪਨੀਆਂ ਨੇ ਯੂਐਸ ਅਤੇ ਕੈਲੀਫੋਰਨੀਆ ਦੇ ਕਾਨੂੰਨ ਦੇ ਨਾਲ-ਨਾਲ ਵਟਸਐਪ ਦੀਆਂ ਸ਼ਰਤਾਂ ਦੀ ਵੀ ਉਲੰਘਣਾ ਕੀਤੀ ਹੈ।
ਵਟਸਐਪ ਦਾ ਦਾਅਵਾ ਹੈ ਕਿ ਸਿਰਫ਼ ਮਿਸ ਕਾਲ ਰਾਹੀਂ ਸਮਾਰਟਫੋਨ ਨੂੰ ਸਰਵਿਲਾਂਸ ਉੱਤੇ ਲਗਾਇਆ ਗਿਆ ਹੈ। ਵਟਸਐਪ ਦਾ ਮੰਨਣਾ ਹੈ ਕਿ ਇਸ ਘਟਨਾ ਵਿੱਚ ਘੱਟੋ ਘੱਟ 100 ਲੋਕਾਂ ਨੂੰ ਨਿਸ਼ਾਨਾ ਬਣਾਇਆ ਹੈ।
