ਅਯੁੱਧਿਆ: ਰਾਮ ਮੰਦਰ ਲਈ ਅਯੁੱਧਿਆ ਵਿੱਚ 5 ਅਗਸਤ ਨੂੰ ਭੂਮੀ ਪੂਜਨ ਹੋਵੇਗਾ। ਇਸ ਮੌਕੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਮੌਜੂਦ ਰਹਿਣਗੇ। ਸੂਤਰਾਂ ਅਨੁਸਾਰ ਰਾਮ ਜਨਮ ਭੂਮੀ ਤੀਰਥ ਖੇਤਰ ਟਰੱਸਟ ਨੇ ਪੀਐਮਓ ਨੂੰ 3 ਅਤੇ 5 ਅਗਸਤ ਦੀਆਂ 2 ਤਰੀਕਾਂ ਦਿੱਤੀਆਂ ਸਨ। ਪੀਐਮਓ ਨੇ 5 ਅਗਸਤ ਨੂੰ ਚੁਣਿਆ ਹੈ।
ਦੱਸ ਦਈਏ ਕਿ 5 ਫਰਵਰੀ ਨੂੰ ਪ੍ਰਧਾਨ ਮੰਤਰੀ ਮੋਦੀ ਨੇ ਸ਼੍ਰੀ ਰਾਮ ਜਨਮ ਭੂਮੀ ਤੀਰਥ ਖੇਤਰ ਟਰੱਸਟ ਦੇ ਗਠਨ ਦੀ ਐਲਾਨ ਕੀਤੀ ਸੀ। ਰਾਮ ਮੰਦਰ ਟਰੱਸਟ ਦੇ ਪ੍ਰਧਾਨ ਨ੍ਰਿਤਿਆ ਗੋਪਾਲ ਦਾਸ ਦੇ ਬੁਲਾਰੇ ਮਹੰਤ ਕਮਲ ਨਯਨ ਦਾਸ ਨੇ ਕਿਹਾ ਸੀ, "ਅਸੀਂ ਗ੍ਰਹਿ ਤਾਰਿਆਂ ਦੀ ਗਣਨਾ ਦੇ ਆਧਾਰ ’ਤੇ ਪ੍ਰਧਾਨ ਮੰਤਰੀ ਦੇ ਦੌਰੇ ਲਈ 2 ਸ਼ੁਭ ਤਰੀਕਾਂ- 3 ਅਤੇ 5 ਅਗਸਤ ਦਾ ਸੁਝਾਅ ਦਿੱਤਾ ਸੀ।"
ਜਾਣਕਾਰੀ ਲਈ ਦੱਸ ਦਈਏ ਕਿ ਲੰਬੀ ਕਾਨੂੰਨੀ ਲੜਾਈ ਤੋਂ ਬਾਅਦ ਅਯੁੱਧਿਆ ਵਿੱਚ ਰਾਮ ਮੰਦਰ ਦੀ ਉਸਾਰੀ ਦਾ ਕੰਮ ਪਿਛਲੇ ਸਾਲ 9 ਨਵੰਬਰ ਨੂੰ ਸੁਪਰੀਮ ਕੋਰਟ ਦੇ ਫੈਸਲੇ ਤੋਂ ਬਾਅਦ ਸ਼ੁਰੂ ਕੀਤਾ ਗਿਆ ਸੀ।
ਸ਼ਨੀਵਾਰ ਨੂੰ ਅਯੁੱਧਿਆ ਵਿੱਚ ਟਰੱਸਟ ਮੈਂਬਰਾਂ ਦੀ ਇੱਕ ਬੈਠਕ ਵਿੱਚ ਮੰਦਰ ਦਾ ਨੀਂਹ ਪੱਥਰ ਰੱਖਣ ਦੀ ਸੰਭਾਵਤ ਤਰੀਕ ਬਾਰੇ ਫੈਸਲਾ ਲਿਆ ਗਿਆ। ਸੀਨੀਅਰ ਐਡਵੋਕੇਟ ਕੇ ਪਰਸਾਰਨ, ਵਾਸੁਦੇਵਾਨੰਦ ਸਰਸਵਤੀ ਅਤੇ ਸਵਾਮੀ ਵਿਸ਼ਵ ਪ੍ਰਸਨਜੀਤ ਨੇ ਵੀਡੀਓ ਲਿੰਕ ਰਾਹੀਂ ਮੀਟਿੰਗ ਵਿੱਚ ਸ਼ਿਰਕਤ ਕੀਤੀ।
ਇਹ ਵੀ ਪੜ੍ਹੋ: ਵਿਸ਼ੇਸ਼: ਨਾ ਮੋਬਾਈਲ ਨਾ ਇੰਟਰਨੈੱਟ, ਕਿਵੇਂ ਕਰੀਏ ਆਨਲਾਈਨ ਪੜ੍ਹਾਈ ?
ਟਰੱਸਟ ਦੇ ਜਨਰਲ ਸੱਕਤਰ ਚੰਪਤ ਰਾਏ ਨੇ ਕਿਹਾ ਕਿ ਮੌਨਸੂਨ ਤੋਂ ਤੁਰੰਤ ਬਾਅਦ, ਰਾਮ ਮੰਦਰ ਟਰੱਸਟ ਵਿੱਤੀ ਮਦਦ ਲਈ ਦੇਸ਼ ਭਰ ਦੇ 100 ਮਿਲੀਅਨ ਪਰਿਵਾਰਾਂ ਨਾਲ ਸੰਪਰਕ ਕਰੇਗਾ। ਉਨ੍ਹਾਂ ਦੱਸਿਆ ਕਿ ਮੰਦਰ ਦੀ ਉਸਾਰੀ ਵਿੱਚ 3 ਤੋਂ ਸਾਢੇ 3 ਸਾਲ ਲੱਗਣਗੇ।
ਸ੍ਰੀ ਰਾਮ ਜਨਮ ਭੂਮੀ ਤੀਰਥ ਖੇਤਰ ਟਰੱਸਟ ਦੇ ਮੈਂਬਰ ਕਾਮੇਸ਼ਵਰ ਚੌਪਾਲ ਨੇ ਕਿਹਾ ਕਿ ਮੀਟਿੰਗ ਵਿੱਚ ਰਾਮ ਮੰਦਰ ਦੀ ਉਚਾਈ ਦੇ ਮੁੱਦੇ ‘ਤੇ ਵਿਚਾਰ-ਵਟਾਂਦਰਾ ਕੀਤਾ ਗਿਆ। ਮੰਦਰ ਦੀ ਉਚਾਈ 161 ਫੁੱਟ ਹੋਵੇਗੀ ਅਤੇ ਇਸ ਵਿੱਚ 5 ਗੁੰਬਦ ਹੋਣਗੇ।
ਟਰੱਸਟ ਦੀ ਬੈਠਕ ਵਿੱਚ ਪ੍ਰਧਾਨ ਮੰਤਰੀ ਮੋਦੀ ਦੇ ਸਾਬਕਾ ਪ੍ਰਮੁੱਖ ਸਕੱਤਰ ਅਤੇ ਰਾਮ ਮੰਦਰ ਉਸਾਰੀ ਕਮੇਟੀ ਦੇ ਚੇਅਰਮੈਨ ਨ੍ਰਿਪੇਂਦਰ ਮਿਸ਼ਰਾ ਅਤੇ ਉੱਤਰ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਦੇ ਪ੍ਰਮੁੱਖ ਸਕੱਤਰ ਅਵਨੀਸ਼ ਅਵਸਥੀ ਵੀ ਮੌਜੂਦ ਸਨ।
