ਨਵੀਂ ਦਿੱਲੀ: ਆਮ ਆਦਮੀ ਪਾਰਟੀ ਨੇ ਕਿਸਾਨਾਂ ਦੇ ਸਮਰਥਨ ਵਿੱਚ ਵਰਤ ਰੱਖਿਆ । ਆਮ ਆਦਮੀ ਪਾਰਟੀ ਦੇ ਸਾਰੇ ਆਗੂ ਪਾਰਟੀ ਹੈੱਡਕੁਆਰਟਰ ਵਿੱਚ ਮੌਜੂਦ ਰਹੇ, ਜਦੋਂਕਿ ਸੀਐਮ ਕੇਜਰੀਵਾਲ ਸ਼ਾਮ ਨੂੰ ਇਸ 'ਚ ਸ਼ਾਮਲ ਹੋਏ। ਇਸ ਵਰਤ ਬਾਰੇ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਉਪ ਮੁੱਖ ਮੰਤਰੀ ਮਨੀਸ਼ ਸਿਸੋਦੀਆ ਨੇ ਕਿਹਾ ਕਿ ਅੱਜ ਪੂਰੇ ਦੇਸ਼ ਦੇ ਕਿਸਾਨ ਦੁੱਖੀ ਹਨ, ਇਹ ਸਾਰੇ ਅੱਜ ਵਰਤ ਰੱਖ ਰਹੇ ਹਨ ਅਤੇ ਉਨ੍ਹਾਂ ਦੇ ਸਮਰਥਨ ਵਿੱਚ ਅਸੀਂ ਵੀ ਵਰਤ ‘ਤੇ ਹਾਂ।
'ਤਿੰਨੇ ਕਾਨੂੰਨ ਵਾਪਸ ਹੋਣੇ ਚਾਹੀਦੇ ਹਨ'
ਮਨੀਸ਼ ਸਿਸੋਦੀਆ ਨੇ ਕਿਹਾ ਕਿ ਸਾਡੀ ਮੰਗ ਹੈ ਕਿ ਕਿਸਾਨਾਂ ਖਿਲਾਫ਼ ਲਿਆਂਦੇ ਗਏ ਇਹ ਤਿੰਨ ਬਿੱਲ ਵਾਪਸ ਲਏ ਜਾਣ। ਸਿਸੋਦੀਆ ਨੇ ਕਿਹਾ ਕਿ ਅਸੀਂ ਕਿਸਾਨਾਂ ਦੀ ਚਿੰਤਾ ਕਰਦੇ ਹਾਂ। ਮਹੱਤਵਪੂਰਨ ਗੱਲ ਇਹ ਹੈ ਕਿ ਆਮ ਆਦਮੀ ਪਾਰਟੀ ਦੇ ਇਸ ਵਰਤ ਨੂੰ ਕੇਂਦਰੀ ਮੰਤਰੀ ਪ੍ਰਕਾਸ਼ ਜਾਵੜੇਕਰ ਨੇ ਪਖੰਡ ਦੱਸਿਆ ਹੈ। ਜਦੋਂ ਇਸ ਬਾਰੇ ਪੁੱਛਿਆ ਗਿਆ ਤਾਂ ਮਨੀਸ਼ ਸਿਸੋਦੀਆ ਨੇ ਕਿਹਾ ਕਿ ਉਹ ਗਾਂਧੀ ਨੂੰ ਨਹੀਂ ਸਮਝਦੇ, ਗੌਡਸੇ ਨੂੰ ਸਮਝ ਹੈ।
'ਗਾਂਧੀ ਦੇ ਟੂਲਜ਼ ਦੀ ਕੋਈ ਸਮਝ ਨਹੀਂ'
ਸਿਸੋਦੀਆ ਨੇ ਕਿਹਾ ਕਿ ਜਦੋਂ ਤੋਂ ਅਰਵਿੰਦ ਕੇਜਰੀਵਾਲ ਸਰਕਾਰ ਨੇ ਸਟੇਡੀਅਮ ਨੂੰ ਜੇਲ੍ਹ ਬਣਾਉਣ ਤੋਂ ਇਨਕਾਰ ਕਰ ਦਿੱਤਾ ਹੈ, ਉਦੋਂ ਤੋਂ ਭਾਜਪਾ ਦੇ ਆਗੂ ਬੌਖਲਾਏ ਹੋਏ ਹਨ। ਉਹ ਕਦੇ ਸੀ.ਐੱਮ ਦੇ ਘਰ ਨੂੰ ਜੇਲ ਬਣਾਉਂਦੇ ਹਨ, ਕਈ ਵਾਰ ਉਹ ਉਨ੍ਹਾਂ ਦੇ ਘਰ ਦੇ ਸਾਹਮਣੇ ਲੱਗੇ ਸੀ.ਸੀ.ਟੀ.ਵੀ ਕੈਮਰੇ ਤੋੜ ਦਿੰਦੇ ਹਨ, ਕਈ ਵਾਰ ਉਹ ਲੋਕਾਂ ਨੂੰ ਮੇਰੇ ਘਰ 'ਤੇ ਬੈਠਾ ਦਿੰਦੇ ਹਨ। ਸਿਸੋਦੀਆ ਨੇ ਕਿਹਾ ਕਿ ਉਹ ਗਾਂਧੀ ਦੇ ਵਰਤ ਰੱਖਣ ਵਰਗੇ ਟੂਲਜ਼ ਨੂੰ ਨਹੀਂ ਸਮਝਦੇ ਹਨ।
