ਅਗਲੇ ਖਰੀਫ ਸੀਜ਼ਨ ਲਈ ਬੀਜ ਉਤਪਾਦਨ ’ਤੇ ਕੋਵਿਡ-19 ਦਾ ਪ੍ਰਭਾਵ ਪਿਆ ਹੈ। ਇਸ ਨਾਲ ਬੀਜ ਨੂੰ ਸੋਧਣ ਅਤੇ ਉਨ੍ਹਾਂ ਦੀ ਪੈਕਿੰਗ ਕਰਨ ਦੀ ਪ੍ਰਕਿਰਿਆ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਈ ਹੈ। ਨੈਸ਼ਨਲ ਸੀਡ ਕਾਰੋਪਰੇਸ਼ਨ ਲਿਮਟਿਡ (ਐਨ.ਐਸ.ਸੀ.) ਨੇ ਹਾਲ ਹੀ ਵਿੱਚ ਕੇਂਦਰ ਅਤੇ ਰਾਜ ਸਰਕਾਰਾਂ ਦੇ ਧਿਆਨ ਵਿੱਚ ਲਿਆਂਦਾ ਹੈ ਕਿ ਜੇਕਰ ਉਦਯੋਗਾਂ ਵੱਲੋਂ ਬੀਜਾਂ ਦੀ ਪ੍ਰੋਸੈਸਿੰਗ ਨੂੰ ਅੱਗੇ ਨਾ ਤੋਰਿਆ ਗਿਆ ਤਾਂ ਅਗਲੇ ਮਹੀਨੇ ਤੋਂ ਦੇਸ਼ ਵਿੱਚ ਬੀਜਾਂ ਦੀ ਵਿਕਰੀ ਕਰਨੀ ਮੁਸ਼ਕਿਲ ਹੋ ਜਾਵੇਗੀ।
ਮੌਜੂਦਾ ਮੌਸਮ ਵਿੱਚ ਅਕਤੂਬਰ ਤੋਂ ਉਗਾਈਆਂ ਜਾਣ ਵਾਲੀਆਂ ਫਸਲਾਂ ਦੇ ਬੀਜਾਂ ਦੀਆਂ ਫਸਲਾਂ ਹੁਣ ਕਟਾਈ ਲਈ ਤਿਆਰ ਹਨ। ਫਸਲਾਂ ਨੂੰ ਕੱਟਣ ਤੋਂ ਬਾਅਦ ਇਨ੍ਹਾਂ ਦੇ ਬੀਜਾਂ ਨੂੰ ਰਿਫਾਇਨਮੈਂਟ ਕੇਂਦਰਾਂ ’ਤੇ ਭੇਜਿਆ ਜਾਣਾ ਹੈ। ਉਨ੍ਹਾਂ ਦੀ ਗੁਣਵੱਤਾ ਦੀ ਜਾਂਚ ਅਤੇ ਰਿਫਾਇਨਿੰਗ ਕਰਨ ਤੋਂ ਬਾਅਦ ਹੀ ਉਨ੍ਹਾਂ ਨੂੰ ਖਰੀਫ ਸੀਜ਼ਨ ਲਈ ਵੇਚਿਆ ਜਾ ਸਕਦਾ ਹੈ।
ਤੇਲੰਗਾਨਾ ਖੇਤੀਬਾੜੀ ਵਿਭਾਗ ਨੇ ਰਿਆਇਤੀ ਦਰਾਂ ’ਤੇ ਕਿਸਾਨਾਂ ਤੋਂ ਸਿੱਧਾ 7.50 ਲੱਖ ਕੁਇੰਟਲ ਬੀਜ ਵੇਚਣ ਦੀ ਯੋਜਨਾ ਬਣਾਈ ਹੈ। ਇਸ ਨੂੰ ਲਾਗੂ ਕਰਨ ਲਈ ਰਾਜ ਬੀਜ ਵਿਕਾਸ ਅਥਾਰਿਟੀ ਨੂੰ ਕਿਸਾਨਾਂ ਤੋਂ ਬੀਜ ਖਰੀਦਣਾ ਹੋਵੇਗਾ ਜੋ ਅੱਗੇ ਉਨ੍ਹਾਂ ਨੂੰ ਰਿਫਾਇਨਰੀਆਂ ਵਿੱਚ ਭੇਜੇਗੀ। ਬੀਜ ਲਾਜ਼ਮੀ ਸੇਵਾਵਾਂ ਦੀ ਸੂਚੀ ਵਿੱਚ ਆਉਂਦੇ ਹਨ।
ਐਨ.ਐਸ.ਸੀ. ਦੇ ਪ੍ਰਧਾਨ ਐਮ. ਪ੍ਰਭਾਕਰ ਰਾਓ ਨੇ ਦੱਸਿਆ ਕਿ ਹਮੇਸ਼ਾ ਦੀ ਤਰ੍ਹਾਂ ਸਰਕਾਰ ਨੇ ਲਾਜ਼ਮੀ ਸੇਵਾਵਾਂ ਨੂੰ ਆਮ ਦੀ ਤਰ੍ਹਾਂ ਚੱਲਣ ਦੀ ਪ੍ਰਵਾਨਗੀ ਦਿੱਤੀ ਹੈ, ਇਸ ਲਈ ਉਨ੍ਹਾਂ ਨੇ ਕੇਂਦਰੀ ਖੇਤੀਬਾੜੀ ਸਕੱਤਰ ਅਤੇ ਰਾਜ ਦੇ ਖੇਤੀਬਾੜੀ ਮੰਤਰੀ ਨੂੰ ਪੱਤਰ ਲਿਖਿਆ ਸੀ ਕਿ ਲੌਕਡਾਊਨ ਦੌਰਾਨ ਬੀਜ ਸੋਧਣ ਦੇ ਕਾਰਜ ਨੂੰ ਪ੍ਰਵਾਨਗੀ ਦਿੱਤੀ ਜਾਵੇ।
ਉਨ੍ਹਾਂ ਨੇ ਕਿਹਾ ਕਿ ਬੀਜ ਕੰਪਨੀਆਂ ਵਿੱਚ ਕੰਮ ਕਰਨ ਵਾਲੇ ਕਰਮਚਾਰੀਆਂ ਨੂੰ ਆਪਣਾ ਆਈਡੀ ਕਾਰਡ ਦਿਖਾ ਕੇ ਕੰਮ ਕਰਨ ਦੀ ਆਗਿਆ ਦੇਣੀ ਚਾਹੀਦੀ ਹੈ ਅਤੇ ਬੀਜ ਲੈ ਕੇ ਜਾਣ ਵਾਲੇ ਟਰੱਕਾਂ ਨੂੰ ਪੁਲਿਸ ਵੱਲੋਂ ਰੋਕਿਆ ਨਹੀਂ ਜਾਣਾ ਚਾਹੀਦਾ।
ਅਗਲੇ ਮਹੀਨੇ ਤੋਂ ਪੰਜਾਬ ਵਿੱਚ ਕਪਾਹ ਦੀ ਖੇਤੀ ਸ਼ੁਰੂ ਹੋ ਜਾਵੇਗੀ। ਆਂਧਰ ਪ੍ਰਦੇਸ਼ ਅਤੇ ਤੇਲੰਗਾਨਾ ਵਿੱਚ ਸਾਰੀਆਂ ਫਸਲਾਂ ਦੇ ਬੀਜਾਂ ਦੀ ਵਿਕਰੀ ਮਈ ਤੋਂ ਸ਼ੁਰੂ ਹੋ ਜਾਣੀ ਚਾਹੀਦੀ ਹੈ। ਇਨ੍ਹਾਂ ਦੀ ਢੋਆ ਢੁਆਈ ਲਈ ਬੀਜ ਕੰਪਨੀਆਂ ਨੂੰ ਲੌਕਡਾਊਨ ਤੋਂ ਬਾਹਰ ਰੱਖਿਆ ਜਾਣਾ ਚਾਹੀਦਾ ਹੈ।
ਬੀਜਾਂ ਦੀ ਸਪਲਾਈ ਕਿਉਂਕਿ ਹੋਰ ਰਾਜਾਂ ਤੋਂ ਕੀਤੀ ਜਾਣੀ ਹੈ, ਇਸ ਲਈ ਸ੍ਰੀ ਰਾਓ ਨੇ ਸਰਕਾਰਾਂ ਨੂੰ ਅੰਤਰਰਾਜੀ ਆਵਾਜਾਈ ਨੂੰ ਆਗਿਆ ਦੇਣ ਲਈ ਕਿਹਾ ਹੈ। ਤੇਲੰਗਾਨਾ ਰਾਜ ਬੀਜ ਅਤੇ ਆਰਗੈਨਿਕ ਪ੍ਰਮਾਣੀਕਰਨ ਅਥਾਰਟੀ ਦੇ ਡਾਇਰੈਕਟਰ ਕੇਸ਼ਵੁਲੂ ਨੇ ਵੀ ਇਨ੍ਹਾਂ ਮੁੱਦਿਆਂ ਨੂੰ ਸਰਕਾਰ ਦੇ ਧਿਆਨ ਵਿੱਚ ਲਿਆਂਦਾ ਹੈ।
ਖੇਤੀਬਾੜੀ ਵਿਭਾਗ ਨੇ ਹਾਲ ਹੀ ਵਿੱਚ ਬੀਜ ਕੰਪਨੀਆਂ ਨੂੰ ਤੇਲੰਗਾਨਾ ਵਿੱਚ 1.10 ਕਰੋੜ ਕਪਾਹ ਦੇ ਬੀਜਾਂ ਦੇ ਪੈਕੇਟ ਵਿਕਰੀ ਲਈ ਤਿਆਰ ਕਰਨ ਦੀ ਸਲਾਹ ਦਿੱਤੀ ਹੈ। ਕੰਪਨੀਆਂ ਨੇ ਸਰਕਾਰ ਨੂੰ ਬੇਨਤੀ ਕੀਤੀ ਹੈ ਕਿ ਉਨ੍ਹਾਂ ਨੂੰ ਲੌਕਡਾਊਨ ਤੋਂ ਛੋਟ ਦਿੱਤੀ ਜਾਵੇ।
