ਨਵੀਂ ਦਿੱਲੀ: ਹਾਵੜਾ ਐਕਸਪ੍ਰੈੱਸ ਟਰੇਨ 'ਚ ਇੱਕ ਗਰਭਵਤੀ ਮਹਿਲਾ ਦੀ ਭਾਰਤੀ ਫ਼ੌਜ ਦੀਆਂ 2 ਡਾਕਟਰਾਂ ਨੇ ਡਿਲਿਵਰੀ ਕਰਵਾਈ। ਜਿਸ ਤੋਂ ਬਾਅਦ ਇਨ੍ਹਾਂ ਡਾਕਟਰਾਂ ਦੀ ਹਰ ਥਾਂ ਸ਼ਲਾਘਾ ਕੀਤੀ ਜਾ ਰਹੀ ਹੈ।
ਚਲਦੀ ਰੇਲ ਗੱਡੀ ਚ ਦੋਹਾਂ ਡਾਕਟਰਾਂ ਨੇ ਮਿਲ ਕੇ ਗਰਭਵਤੀ ਔਰਤ ਦੀ ਡਿਲਿਵਰੀ ਕਰਵਾਈ। ਬੱਚਾ ਅਤੇ ਮਾਂ ਦੋਵੇਂ ਠੀਕ ਹਨ। ਜਾਣਕਾਰੀ ਮੁਤਾਬਕ ਹਾਵੜਾ ਐਕਸਪ੍ਰੈਸ 'ਚ ਯਾਤਰਾ ਕਰਨ ਵਾਲੀ ਇੱਕ ਔਰਤ ਨੂੰ ਅਚਾਨਕ ਦਰਦ ਹੋਣ ਲਗ ਗਿਆ। ਸਟੇਸ਼ਨ ਦੂਰ ਹੋਣ ਕਾਰਨ ਔਰਤ ਨੂੰ ਹਸਪਤਾਲ ਨਹੀਂ ਲਿਜਾਇਆ ਜਾ ਸਕਦਾ ਸੀ। ਦਰਦ ਨਾਲ ਤੜਪ ਰਹੀ ਔਰਤ ਦੀ ਅਵਾਜ਼ ਉਸੇ ਡੱਬੇ 'ਚ ਯਾਤਰਾ ਕਰ ਰਹੀ ਫੌਜ ਦੇ 172ਵੇਂ ਮਿਲਟਰੀ ਹਸਪਤਾਲ ਦੀਆਂ ਦੋ ਡਾਕਟਰਾਂ ਕੈਪਟਨ ਲਲੀਤਾ ਅਤੇ ਕੈਪਟਨ ਅਮਨਦੀਪ ਦੇ ਕੰਨਾਂ ਤਕ ਪਹੁੰਚੀ, ਤਾਂ ਦੋਵੇ ਪੀੜਤ ਔਰਤਾਂ ਦੀ ਡਿਲਿਵਰੀ ਕਰਵਾਉਣ ਲਈ ਤਿਆਰ ਹੋ ਗਈਆਂ। ਡਿਲਿਵਰੀ ਸਫਲ ਹੋਣ ਤੋਂ ਬਾਅਦ ਫ਼ੌਜ ਦੇ ਵਧੀਕ ਡਾਇਰੈਕਟਰ ਜਨਰਲ ਨੇ ਆਰਮੀ ਦੇ ਟਵਿੱਟਰ ਹੈਂਡਲ ਤੋਂ ਟਵੀਟ ਕੀਤਾ, 'ਮਾਂ ਤੇ ਬੱਚਾ ਦੋਵੇਂ ਤੰਦਰੁਸਤ ਹਨ।'
