ਹੈਦਰਾਬਾਦ: ਪੂਰੇ ਦੇਸ਼ ਵਿੱਚ ਲੌਕਡਾਊਨ ਦੇ ਕਾਰਨ ਜਦ ਵੱਖ-ਵੱਖ ਹਿੱਸਿਆਂ ਤੋਂ ਪ੍ਰਵਾਸੀ ਮਜ਼ਦਰ ਆਪਣੇ ਸੂਬਿਆਂ ਨੂੰ ਵਾਪਸ ਮੁੜ ਰਹੇ ਹਨ, ਤਾਂ ਅਜਿਹੇ ਸਮੇਂ ਵਿੱਚ ਬਿਹਾਰ ਤੋਂ ਲਗਭਗ 250 ਪ੍ਰਵਾਸੀਆਂ ਦੇ ਨਾਲ ਇੱਕ ਟ੍ਰੇਨ ਸ਼ੁੱਕਰਵਾਰ ਨੂੰ ਤੇਲੰਗਾਨਾ ਪਹੁੰਚੀ। ਤੇਲੰਗਾਨਾ ਦੇ ਚੌਲ ਮਿਲਾਂ ਵਿੱਚ ਕੰਮ ਕਰਨ ਵਾਲੇ ਮਜ਼ਦੂਰਾਂ ਨੂੰ ਲੈ ਕੇ ਜਾਣ ਵਾਲੀ ਮਜ਼ਦੂਰ ਸਪੈਸ਼ਲ ਟ੍ਰੇਨ ਹੈਦਰਾਬਾਦ ਦੇ ਬਾਹਰੀ ਇਲਾਕਿਆਂ ਵਿੱਚ ਸਥਿਤ ਲਿੰਗਮਪੱਲੀ ਸਟੇਸ਼ਨ ਉੱਤੇ ਪਹੁੰਚੀ।
ਪੂਰਬ-ਮੱਧ ਰੇਲਵੇ (ਈਸੀਆਰ) ਮੁਤਾਬਕ, ਇਹ ਟ੍ਰੇਨ ਬਿਹਾਰ ਦੇ ਖਗੜਿਆ ਤੋਂ ਵੀਰਵਾਰ ਸਵੇਰੇ 3.45 ਵਜੇ ਰਵਾਨਾ ਹੋਈ। ਈਸੀਆਰ ਅਧਿਕਾਰੀਆਂ ਨੇ ਕਿਹਾ ਕਿ ਟ੍ਰੇਨ ਸੂਬਾ ਸਰਕਾਰ ਦੀ ਬੇਨਤੀ ਉੱਤੇ ਇਹ ਟ੍ਰੇਨ ਚਲਾਈ ਗਈ ਸੀ।
ਰਾਸ਼ਟਰੀ ਜਨਤਾ ਦਲ (ਰਾਜਦ) ਦੇ ਸੰਸਦ ਮੈਂਬਰ ਮਨੋਜ ਕੁਮਾਰ ਝਾਅ ਨੇ ਵੱਲੋਂ ਰੇਲ ਮੰਤਰੀ ਨੂੰ ਟਵੀਟ ਕੀਤੇ ਜਾਣ ਤੋਂ ਬਾਅਦ ਕਿ ਕਿਸ ਦੇ ਹੁਕਮ ਦੇ ਤਹਿਤ ਟ੍ਰੇਨ ਚੱਲ ਰਹੀ ਹੈ ਤਾਂ ਅਧਿਕਾਰੀਆਂ ਨੇ ਸਪੱਸ਼ਟੀਕਰਨ ਦਿੱਤਾ।
ਤੇਲੰਗਾਨਾ ਦੇ ਮੁੱਖ ਮੰਤਰੀ ਕੇ. ਚੰਦਰ ਸ਼ੇਖਰ ਰਾਓ ਨੇ 5 ਮਈ ਨੂੰ ਕਿਹਾ ਸੀ ਕਿ ਪ੍ਰਵਾਸੀ ਮਜ਼ੂਦਰਾਂ ਨੂੰ ਬਿਹਾਰ ਲੈ ਕੇ ਜਾਣ ਵਾਲੀਆਂ ਟ੍ਰੇਨਾਂ ਬਿਹਾਰ ਦੇ 20,000 ਤੋਂ 25,000 ਉਨ੍ਹਾਂ ਮਜ਼ਦੂਰਾਂ ਦੇ ਨਾਲ ਵਾਪਸ ਆਉਣਗੀਆਂ, ਜੋ ਤੇਲੰਗਾਨਾ ਵਿੱਚ ਚੌਲ ਮਿਲਾਂ ਵਿੱਚ ਕੰਮ ਕਰ ਰਹੇ ਸਨ।
ਪਿਛਲੇ ਮਹੀਨੇ ਰਾਓ ਨੇ ਬਿਹਾਰ ਸਰਕਾਰ ਨੂੰ ਤੇਲੰਗਾਨਾ ਵਿੱਚ ਕੰਮ ਕਰਨ ਵਾਲੇ ਮਜ਼ਦੂਰਾਂ ਨੂੰ ਵਾਪਸ ਭੇਜਣ ਦੀ ਬੇਨਤੀ ਕੀਤੀ ਸੀ। ਇੱਥੇ ਚੌਲ ਮਿਲਾਂ ਵਿੱਚ 90 ਫ਼ੀਸਦ ਤੋਂ ਜ਼ਿਆਦਾ ਬਿਹਾਰ ਦੇ ਪ੍ਰਵਾਸੀ ਮਜ਼ਦੂਰ ਸਨ। ਮੁੱਖ ਮੰਤਰੀ ਨੇ ਕਿਹਾ ਸੀ ਕਿ ਚੌਲ ਦੇ ਟਰੱਕਾਂ ਤੋਂ ਸਮਾਨ ਉਤਾਰਣ ਅਤੇ ਚੜਾਉਣ ਵਾਲੇ ਇਹ ਕਰਮਚਾਰੀ ਹੋਲੀ ਦੇ ਲਈ ਬਿਹਾਰ ਗਏ ਸਨ ਅਤੇ ਉੱਥੇ ਫ਼ਸੇ ਹੋਏ ਸਨ।
ਰਾਓ ਨੇ ਇਹ ਵੀ ਕਿਹਾ ਸੀ ਕਿ ਜੇ ਜ਼ਰੂਰਤ ਹੈ ਤਾਂ ਉਹ ਬਿਹਾਰੀ ਪ੍ਰਵਾਸੀ ਮਜ਼ਦੂਰਾਂ ਨੂੰ ਵਾਪਸ ਲਿਆਉਣ ਦੇ ਲਈ ਕੁੱਝ ਖ਼ਾਸ ਟ੍ਰੇਨਾਂ ਦੀ ਵਿਵਸਥਾ ਕਰਨ ਦੇ ਲਈ ਕੇਂਦਰ ਨਾਲ ਵੀ ਗੱਲਬਾਤ ਕਰਨਗੇ।
ਮੁੱਖ ਮੰਤਰੀ ਨੇ ਕਿਹਾ ਕਿ ਤੇਲੰਗਾਨਾ ਦੇ ਪਿੰਡਾਂ ਵਿੱਚ ਖ਼ਰੀਦ ਕੇਂਦਰਾਂ ਦੇ ਮਾਧਿਅਮ ਤੋਂ ਕਿਸਾਨਾਂ ਦੇ ਰਿਕਾਰਡ 1.05 ਕਰੋੜ ਟਨ ਝੋਨਾ ਖ਼ਰੀਦ ਰਿਹਾ ਹੈ, ਅਜਿਹੇ ਵਿੱਚ ਲੌਕਡਾਊਨ ਦੇ ਮੱਦੇਨਜ਼ਰ ਬਿਨਾ ਬਿਹਾਰੀ ਮਜ਼ਦੂਰਾਂ ਦੀ ਮਦਦ ਨਾਲ ਉਹ ਇਸ ਕੰਮ ਨੂੰ ਪੂਰਾ ਨਹੀਂ ਕਰ ਪਾਉਣਗੇ, ਕਿਉਂਕਿ ਉਹ ਹੀ ਟਰੱਕਾਂ ਤੋਂ ਸਮਾਨ ਉਤਾਰਦੇ ਅਤੇ ਚੜ੍ਹਾਉਂਦੇ ਹਨ।
ਆਈਏਐੱਨਐੱਸ
