ਲੁਧਿਆਣਾ: ਦਰੇਸੀ ਦਸ਼ਹਿਰਾ ਗਰਾਊਂਡ ਵਿੱਚ ਇਸ ਵਾਰ ਪੰਜਾਬ ਦਾ ਸਭ ਤੋਂ ਵੱਡਾ 125 ਫੁੱਟ ਦਾ ਰਾਵਣ ਦਹਿਣ ਕੀਤਾ ਜਾਵੇਗਾ। ਇਹ ਰਾਵਣ ਲੱਖਾਂ ਰੁਪਏ ਦੀ ਲਾਗਤ ਨਾਲ ਤਿਆਰ ਕੀਤਾ ਜਾ ਰਿਹਾ ਹੈ। ਰਾਵਣ ਦੇ ਪੁਤਲੇ ਲਈ ਵਿਸ਼ੇਸ਼ ਤੌਰ ਉੱਤੇ ਵਿਦੇਸ਼ ਤੋਂ ਵਾਟਰ ਪਰੂਫ਼ ਕਾਗਜ਼ ਮੰਗਵਾਇਆ ਗਿਆ ਹੈ। 125 ਫੁੱਟ ਦਾ ਇਹ ਪੁਤਲਾ ਪੂਰੀ ਤਰ੍ਹਾਂ ਆਟੋਮੈਟਿਕ ਹੋਵੇਗਾ ਅਤੇ ਇਸ ਨੂੰ ਬਟਨ ਦਬਾਉਣ ਨਾਲ ਹੀ ਅੱਗ ਲੱਗੇਗੀ।
2 ਦਿਨ ਪਹਿਲਾਂ ਅੰਤਿਮ ਰੂਪ
ਰਾਵਣ ਦੇ ਇਸ ਅਨੋਖੇ ਪੁਤਲੇ ਦੀ ਤਿਆਰੀ ਦਸ਼ਹਿਰੇ ਦੇ ਤਿਉਹਾਰ ਤੋਂ ਤਿੰਨ ਮਹੀਨੇ ਪਹਿਲਾਂ ਹੀ ਸ਼ੁਰੂ ਹੋ ਜਾਂਦੀ ਹੈ, ਪਹਿਲਾਂ ਆਗਰਾ ਵਿੱਚ ਅਤੇ ਫਿਰ 40 ਦਿਨ ਪਹਿਲਾਂ ਜਿੱਥੇ-ਜਿੱਥੇ ਆਰਡਰ ਮਿਲਦੇ ਹਨ ਉੱਥੇ ਰਾਵਣ ਦੇ ਪੁਤਲੇ ਨੂੰ ਫਾਈਨਲ ਆਕਾਰ ਦੇਣ ਲਈ ਕਾਰੀਗਰ ਕੰਮ ਕਰਨਾ ਸ਼ੁਰੂ ਕਰ ਦਿੰਦੇ ਹਨ। ਜ਼ਿਆਦਾਤਰ ਰਾਵਣ ਦੇ ਪੁਤਲੇ ਵਿੱਚ ਬਾਂਸ, ਤਾਟ, ਪਰਾਲੀ, ਕਾਗਜ਼ ਅਤੇ ਆਟੇ ਦੇ ਲੇਪ ਦੀ ਵਰਤੋਂ ਕੀਤੀ ਜਾਂਦੀ ਹੈ। ਪੂਰਾ ਪੁਤਲਾ ਤਿਆਰ ਕਰਨ ਤੋਂ ਬਾਅਦ ਦਸ਼ਹਿਰੇ ਦੇ ਤਿਉਹਾਰ ਤੋਂ 2 ਦਿਨ ਪਹਿਲਾਂ ਇਸ ਨੂੰ ਅੰਤਿਮ ਰੂਪ ਦਿੱਤਾ ਜਾਂਦਾ ਹੈ।
ਮੁਸਲਿਮ ਪਰਿਵਾਰ ਕਰਦਾ ਹੈ ਪੁਤਲੇ ਤਿਆਰ
ਇਸ ਨੂੰ ਮੁਸਲਿਮ ਪਰਿਵਾਰ ਹਿੰਦੂ ਕਾਰੀਗਰਾਂ ਦੇ ਨਾਲ ਮਿਲ ਕੇ ਤਿਆਰ ਕਰਦੇ ਹਨ। ਜਲੰਧਰ, ਲੁਧਿਆਣਾ, ਪਾਣੀਪਤ, ਬਰੇਲੀ, ਯੂਪੀ ਅਤੇ ਗੁਜਰਾਤ ਵਿੱਚ ਵੀ ਇਸ ਪਰਿਵਾਰ ਵੱਲੋਂ ਹੀ ਇਹ ਪੁਤਲੇ ਤਿਆਰ ਕੀਤੇ ਜਾਂਦੇ ਹਨ। ਇਸ ਵਾਰ ਲੁਧਿਆਣਾ ਵਿੱਚ ਸਭ ਤੋਂ ਵੱਡਾ 125 ਫੁੱਟ ਦਾ ਰਾਵਣ ਦਾ ਪੁਤਲਾ ਜਦੋਂ ਕਿ ਜਲੰਧਰ ਵਿੱਚ 30 ਫੁੱਟ ਉੱਚਾ ਪੁਤਲਾ ਅਤੇ 30 ਫੁੱਟ ਚੌੜੀ ਲੰਕਾਂ ਤਿਆਰ ਕੀਤੀ ਜਾ ਰਹੀ ਹੈ, ਜੋਕਿ ਖਿੱਚ ਦਾ ਕੇਂਦਰ ਰਹੇਗੀ। ਗੁਜਰਾਤ ਵਿੱਚ ਵੀ ਅਸਗਰ ਦਾ ਪਰਿਵਾਰ ਹੀ ਰਾਵਣ ਦੇ ਪੁਤਲੇ ਤਿਆਰ ਕਰਦਾ ਹੈ। ਅਸਗਰ ਅਲੀ ਦੇ ਨਾਲ ਉਨ੍ਹਾਂ ਦਾ ਸਾਲਾ ਅਕੀਲ ਖ਼ਾਨ ਅਤੇ ਉਸ ਦਾ ਬੇਟਾ ਸੋਹੇਲ ਮਦਦ ਕਰਦੇ ਹਨ। ਸੋਹੇਲ ਪਾਣੀਪਤ ਅਤੇ ਅਸਗਰ ਅਲੀ ਜਲੰਧਰ ਜਦੋਂ ਕਿ ਅਕੀਲ ਖ਼ਾਨ ਲੁਧਿਆਣਾ ਵਿੱਚ ਰਾਵਣ ਦੇ ਪੁਤਲੇ ਆਪਣੀ ਅਗਵਾਈ ਵਿੱਚ ਤਿਆਰ ਕਰ ਰਹੇ ਹਨ। ਰਾਵਣ ਦੇ ਨਾਲ ਲੁਧਿਆਣਾ ਵਿੱਚ ਮੇਘਨਾਥ, ਕੁੰਭਕਰਨ ਦਾ ਪੁਤਲਾ ਵੀ ਤਿਆਰ ਕੀਤਾ ਗਿਆ ਹੈ।
ਵਾਟਰ ਪਰੂਫ ਕਾਗਜ਼
ਸਮੇਂ ਦੇ ਵਿੱਚ ਤਬਦੀਲੀ ਆਉਣ ਦੇ ਨਾਲ ਰਾਵਣ ਦੇ ਪੁਤਲੇ ਤਿਆਰ ਕਰਨ ਦੀ ਤਕਨੀਕ ਦੇ ਵਿੱਚ ਵੀ ਵੱਡੀ ਤਬਦੀਲੀ ਵੇਖਣ ਨੂੰ ਮਿਲੀ ਹੈ। ਪਹਿਲਾਂ ਇਸ ਨੂੰ ਡਾਈ ਦੇ ਵਿੱਚ ਤਿਆਰ ਕੀਤਾ ਜਾਂਦਾ ਸੀ ਪਰ ਹੁਣ ਅਸਗਰ ਦੇ ਪਰਿਵਾਰ ਦੀ ਨਵੀਂ ਪੀੜੀ ਪੜ੍ਹੀ ਲਿਖੀ ਹੋਣ ਕਰਕੇ ਲੈਪਟਾਪ ਦੇ ਵਿੱਚ ਇਸ ਨੂੰ ਡਿਜ਼ਾਇਨ ਕਰਦੀ ਹੈ, ਫਿਰ ਉਸ ਨੂੰ ਅਮਲੀ ਜਾਮਾ ਪਹਿਨਾਇਆ ਜਾਂਦਾ ਹੈ। ਰਾਵਣ ਦੇ ਸ਼ਸਤਰਾਂ ਦੇ ਨਾਲ ਉਸ ਦਾ ਪਹਿਰਾਵਾ, ਕੰਨਾਂ ਦੇ ਕੁੰਡਲ ਨੂੰ ਪੂਰੀ ਤਰ੍ਹਾਂ ਲੈਪਟਾਪ ਦੇ ਵਿੱਚ ਹੀ ਤਿਆਰ ਕੀਤਾ ਜਾਂਦਾ ਹੈ। ਜਿਸ ਤੋਂ ਬਾਅਦ ਫਿਰ ਅੱਗੇ ਉਸ ਨੂੰ ਬਣਾਇਆ ਜਾਂਦਾ ਹੈ। ਰਾਵਣ ਦੇ ਪੁਤਲੇ ਤਿਆਰ ਕਰਨ ਲਈ ਇਸ ਵਾਰੀ ਵਿਸ਼ੇਸ਼ ਤੌਰ ਉੱਤੇ ਕਾਗਜ਼ ਵੀ ਵਿਦੇਸ਼ ਤੋਂ ਮੰਗਵਾਇਆ ਗਿਆ ਹੈ। ਅਕੀਲ ਖਾਨ ਨੇ ਦੱਸਿਆ ਹੈ ਕਿ ਦੁਸ਼ਹਿਰੇ ਦੇ ਦਿਨਾਂ ਦੇ ਵਿੱਚ ਅਕਸਰ ਹੀ ਤ੍ਰੇਲ ਪੈਣੀ ਸ਼ੁਰੂ ਹੋ ਜਾਂਦੀ ਹੈ, ਜਿਸ ਕਰਕੇ ਰਾਵਣ ਦੇ ਉੱਪਰ ਲਗਾਇਆ ਗਿਆ ਕਾਗਜ਼ ਖਰਾਬ ਹੋ ਜਾਂਦਾ ਹੈ ਪਰ ਇਸ ਵਾਰ ਉਹਨਾਂ ਵੱਲੋਂ ਵਾਟਰ ਪਰੂਫ ਕਾਗਜ਼ ਮੰਗਾਇਆ ਗਿਆ ਹੈ।
- ਕੇਂਦਰੀ ਮੰਤਰੀ ਰਵਨੀਤ ਬਿੱਟੂ ਦੀ ਰਿਹਾਇਸ਼ ਬਾਹਰ ਆਂਗਨਵਾੜੀ ਵਰਕਰਾਂ ਦਾ ਪ੍ਰਦਰਸ਼ਨ, ਕਿਹਾ- ਸਰਕਾਰ ਕਰ ਰਹੀ 50 ਸਾਲ ਤੋਂ ਸ਼ੋਸ਼ਣ - Minister Ravneet Bittus residence
- ਕਿਸਾਨ ਆਗੂ ਵਲੋਂ ਰੇਲ ਰੋਕੋ ਅੰਦੋਲਨ ਦਾ ਐਲ਼ਾਨ, ਜਾਣੋ ਭਲਕੇ ਕਿੰਨੇ ਸਮੇਂ ਲਈ ਕਿੱਥੇ-ਕਿੱਥੇ ਰੋਕੀਆਂ ਜਾਣਗੀਆਂ ਰੇਲਾਂ - Rail Roko Andolan
- ਵਿਧਾਨ ਸਭਾ ਹਲਕਾ ਗਿੱਲ ਦੇ ਇਸ ਪਿੰਡ ਵਿੱਚ ਹੋਈ ਸਰਬ ਸੰਮਤੀ, ਹਰਪ੍ਰੀਤ ਕੌਰ ਨੂੰ ਚੁਣਿਆ ਗਿਆ ਸਰਬਸੰਮਤੀ ਨਾਲ ਸਰਪੰਚ - panchayat Unanimous election
ਪੀਐੱਮ ਮੋਦੀ ਕਰ ਚੁੱਕੇ ਹਨ ਸਨਮਾਨਿਤ
ਅਲੀ ਅਸਗਰ ਦੇ ਦਾਦਾ ਨੂੰ ਦੇਸ਼ ਦੇ ਪ੍ਰਧਾਨ ਮੰਤਰੀ ਗੁਜਰਾਤ ਵਿੱਚ ਸਨਮਾਨਿਤ ਵੀ ਕਰ ਚੁੱਕੇ ਨੇ, ਜਦੋਂ ਉਹ ਗੁਜਰਾਤ ਦੇ ਮੁੱਖ ਮੰਤਰੀ ਸਨ। ਇੰਨ੍ਹਾਂ ਹੀ ਨਹੀਂ ਅਸਗਰ ਅਲੀ ਨੂੰ ਪੰਜਾਬ ਦੇ ਮਰਹੂਮ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਅਤੇ ਹਰਿਆਣਾ ਦੇ ਸਾਬਕਾ ਮੁੱਖ ਮੰਤਰੀ ਵੀ ਸਨਮਾਨਿਤ ਕਰ ਚੁੱਕੇ ਹਨ। ਪੂਰੇ ਉੱਤਰ ਭਾਰਤ ਵਿੱਚ ਇਹ ਪਰਿਵਾਰ ਰਾਵਣ ਦੇ ਪੁਤਲੇ ਬਣਾਉਣ ਵਿੱਚ ਮਾਹਿਰ ਹੈ। ਅਕੀਲ ਅਲੀ ਨੇ ਕਿਹਾ ਕਿ ਉਨ੍ਹਾਂ ਦਾ ਪੂਰਾ ਹੀ ਪਰਿਵਾਰ ਇਹ ਪੁਸ਼ਤੈਨੀ ਕੰਮ ਕਰਦਾ ਹੈ, ਬੱਚੇ ਤੋਂ ਲੈਕੇ ਲੜਕੀਆਂ, ਭੈਣਾਂ ਅਤੇ ਬਜ਼ੁਰਗ ਵੀ ਕੰਮ ਕਰਦੇ ਹਨ। ਉਨ੍ਹਾਂ ਦੱਸਿਆ ਕਿ ਮੇਰੀ ਭਾਣਜੀ ਭਾਵੇਂ ਸਰਕਾਰੀ ਅਧਿਆਪਕ ਹੈ ਪਰ ਇਸ ਦੇ ਬਾਵਜੂਦ ਉਹ ਲੁਧਿਆਣਾ 2 ਦਿਨ ਪਹਿਲਾਂ ਆਕੇ ਕੰਮਕਾਰ ਵੇਖਦੀ ਹੈ, ਲੋੜ ਪੈਣ ਉੱਤੇ ਉਸ ਨੂੰ ਪਹਿਲਾਂ ਵੀ ਬੁਲਾ ਲਿਆ ਜਾਂਦਾ ਹੈ। ਉਨ੍ਹਾ ਦੱਸਿਆ ਕਿ ਲੁਧਿਆਣਾ ਵਿੱਚ ਇਸ ਸਾਲ ਉਸ ਦੀ ਡਿਊਟੀ ਲੱਗੀ ਹੈ। 4 ਤੋਂ 5 ਵਰਕਰ ਦਿਨ ਰਾਤ 40 ਦਿਨ ਇੱਕ ਕਰਕੇ ਪੁਤਲੇ ਤਿਆਰ ਕਰਦੇ ਨੇ।
