ਅੰਮ੍ਰਿਤਸਰ: ਅੱਜ ਕੱਲ੍ਹ ਜਿਆਦਾਤਰ ਨੌਜਵਾਨ ਵਿਦੇਸ਼ਾਂ ਦਾ ਰੁਖ ਕਰ ਰਹੇ ਹਨ ਤੇ ਡਿਪੋਰਟ ਹੋਕੇ ਵਾਪਿਸ ਆ ਰਹੇ ਹਨ ਪਰ ਉੱਥੇ ਹੀ ਇਕ ਨੌਜਵਾਨ ਵਿਦੇਸ਼ ਗਿਆ ਤੇ ਉਥੋਂ ਵਾਪਿਸ ਆ ਕੇ ਆਪਣਾ ਕਾਰੋਬਾਰ ਸ਼ੁਰੂ ਕੀਤਾ ਤੇ ਆਪਣੇ ਨਾਲ ਹੋਰ ਵੀ ਕਈ ਪਰਿਵਾਰਾਂ ਦੀ ਰੋਟੀ ਚਲਾ ਰਿਹਾ ਹੈ। ਇਹ ਨੌਜਵਾਨ ਦਾ ਨਾਂ ਬਲਵੀਰ ਸਿੰਘ ਹੈ ਤੇ ਇਸ ਨੇ ਕਹਿਣਾ ਕਿ ਆਪਣੇ ਵਤਨ ਵਿੱਚ ਵੀ ਬਹੁਤ ਕੁਝ ਹੈ ਜੇ ਬੰਦਾ ਮਿਹਨਤ ਕਰਨ ਵਾਲਾ ਹੋਵੇ। 2011 ਵਿੱਚ ਵਰਕ ਪਰਮਿਟ 'ਤੇ ਇੰਗਲੈਂਡ ਗਏ ਪੰਜਾਬੀ ਨੌਜਵਾਨ ਬਲਬੀਰ ਸਿੰਘ ਦਾ ਆਪਣੇ ਵਤਨ ਦੀ ਮਿੱਟੀ ਦਾ ਮੋਹ ਉਸਨੂੰ ਭਾਰਤ ਖਿੱਚ ਲਿਆਇਆ।
ਬਲਬੀਰ ਸਿੰਘ ਨੇ ਦੱਸਿਆ ਕਿ ਜਿਸ ਤਰ੍ਹਾਂ ਬਾਕੀ ਨੌਜਵਾਨ ਵਿਦੇਸ਼ਾਂ ਵਿਚ ਜਾ ਰਹੇ ਹਨ ਮੇਰੇ ਦਿਲ ਵਿੱਚ ਵੀ ਸੀ ਕੀ ਮੈਂ ਵੀ ਵਿਦੇਸ਼ ਜਾਵਾਂ ਤੇ ਆਪਣੇ ਘਰ ਦੇ ਹਾਲਾਤ ਸੁਧਾਰਾਂ ਪਰ ਜਦੋਂ ਬਲਬੀਰ ਸਿੰਘ ਨੇ ਵੇਖਿਆ ਕਿ ਇੱਥੋਂ ਦੇ ਹਾਲਾਤ ਵੀ ਠੀਕ ਨਹੀਂ ਹਨ। ਉਨ੍ਹਾਂ ਨੇ ਦੱਸਿਆ ਕਿ ਅਸੀਂ ਮਿਹਨਤੀ ਬੰਦੇ ਸੀ, ਮਿਹਨਤ ਮਜਦੂਰੀ ਸ਼ੁਰੂ ਕੀਤੀ ਜਿਸ ਬਿਲਡਰ ਕੋਲ ਕੰਮ ਕੀਤਾ ਉਹ ਪੈਸੇ ਲੇਕੇ ਭੱਜ ਗਿਆ। ਬਲਬੀਰ ਸਿੰਘ ਨੇ ਦੱਸਿਆ ਕਿ ਫਿਰ ਉਸ ਨੇ ਇਕ ਹੋਟਲ ਵਿਚ ਕੰਮ ਕੀਤਾ ਤੇ ਇੱਥੇ ਉਹ ਡਬਲ ਸ਼ਿਫਟ ਲਗਾ ਰਿਹਾ ਸੀ। ਉਸਨੇ ਵੇਖਿਆ ਕਿ ਉਸ ਦੇ ਹੋਟਲ ਪਿੱਛੇ ਜੋ ਜ਼ਮੀਨ ਹੈ, ਉਸ ਉੱਤੇ ਇੱਕ ਔਰਤ ਜ਼ਮੀਨ 'ਤੇ ਵਾਹੀ ਕਰ ਰਹੀ ਸੀ ਜਦੋਂ ਉਸ ਨੂੰ ਮੈ ਰੋਕਿਆ ਤਾਂ ਉਸਨੂੰ ਮੈਨੂੰ ਕਿਹਾ ਕਿ ਮੈਂ ਵੀ ਕਿਸਾਨ ਹਾਂ ਫਿਰ ਉਸ ਨੇ ਕਿਹਾ ਤੂੰ ਤਾਂ ਰਾਜਾ ਹੈ। ਬਲਬੀਰ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਦੀ ਫਲਾਵਰ ਦੀ ਸ਼ੋਪ ਸੀ, ਉਨ੍ਹਾਂ ਮੈਨੂੰ ਕਿਹਾ ਕਿ ਤੁਸੀ ਫੁੱਲਾਂ ਦੀ ਵਧੀਆ ਖੇਤੀ ਕਰ ਸਕਦੇ ਹੋ, ਮੇਰੇ ਦਿਮਾਗ ਵਿਚ ਆਇਆ ਮੈਂ ਵੀ ਫੁੱਲਾਂ ਦੀ ਖੇਤੀ ਕਰਾਂ।
ਪੰਜਾਬ ਵਿੱਚ ਰਹਿ ਕੇ ਹੀ ਰੋਜੀ ਰੋਟੀ ਕਮਾਈ
ਬਲਬੀਰ ਸਿੰਘ ਨੇ ਗੱਲਬਾਤ ਕਰਦੇ ਹੋਏ ਕਿਹਾ ਕਿ ਘਰ ਦੀ ਮਜ਼ਬੂਰੀ ਕਾਰਨ ਉਸ ਨੂੰ ਫਿਰ ਵਾਪਸ ਆਪਣੇ ਘਰ ਪੰਜਾਬ ਆਉਣਾ ਪਿਆ। ਉਸ ਦਾ ਸੱਤ ਮਹੀਨੇ ਦਾ ਵਰਕ ਪਰਮਿਟ ਦਾ ਵੀਜ਼ਾ ਰਹਿੰਦਾ ਸੀ ਪਰ ਫਿਰ ਇਹ ਸੋਚ ਕਿ ਵਾਪਸ ਆਇਆ ਕਿ ਉਹ ਆਪਣੇ ਬੱਚਿਆਂ ਅਤੇ ਪਰਿਵਾਰ ਦੀ ਖਾਤਰ ਰੋਜੀ ਰੋਟੀ ਕਮਾਉਣ ਦੇ ਲਈ ਵਿਦੇਸ਼ ਆਇਆ ਹੈ, ਫਿਰ ਕਿਉਂ ਨਾ ਉਹ ਭਾਰਤ ਰਹਿ ਕੇ ਹੀ ਆਪਣੇ ਬੱਚਿਆਂ ਅਤੇ ਪਰਿਵਾਰ ਦੀ ਦੇਖਭਾਲ ਕਰੇ। ਪੰਜਾਬ ਵਿੱਚ ਰਹਿ ਕੇ ਹੀ ਰੋਜੀ ਰੋਟੀ ਕਮਾਏ ਅਤੇ ਆਪਣੇ ਘਰ ਦਾ ਗੁਜ਼ਾਰਾ ਕਰੇ। ਉਸ ਨੇ ਕਿਹਾ ਕਿ ਜਿਆਦਾਤਰ ਵੇਖਿਆ ਗਿਆ ਕਿ ਲੋਕ ਕਣਕ ਅਤੇ ਝੋਨੇ ਦੀ ਫਸਲ ਬੀਜਦੇ ਹਨ ਪਰ ਉਸ ਨੇ ਕਿਹਾ ਕਿ ਉਸ ਦਾ ਦਿਲ ਕੁਝ ਵੱਖਰਾ ਕਰਨ ਨੂੰ ਕਰਦਾ ਸੀ ਤੇ ਇਸ ਲਈ ਸੋਚਿਆ ਕਿ ਜੋ ਉਸ ਕੋਲ ਜ਼ਮੀਨ ਹੈ, ਉਸ 'ਤੇ ਹੀ ਉਹ ਫੁੱਲਾਂ ਦੀ ਖੇਤੀ ਕਰੇ।
ਗੇਂਦੇ ਦੇ ਫੁੱਲਾਂ ਦੇ ਬੀਜ ਕੋਲਕਾਤੇ ਤੋਂ ਮੰਗਾਏ
ਬਲਬੀਰ ਸਿੰਘ ਦੱਸਿਆ ਕਿ ਉਸ ਕੋਲ ਢਾਈ ਕਿੱਲੇ ਜ਼ਮੀਨ ਹੈ। ਉਸ ਨੇ ਲੁਧਿਆਣੇ ਐਗਰੀਕਲਚਰ ਵਿਭਾਗ ਵਿੱਚ ਜਾ ਕੇ ਅਧਿਕਾਰੀਆਂ ਨਾਲ ਗੱਲਬਾਤ ਕੀਤੀ ਤੇ ਕਿਹਾ ਕਿ ਉਹ ਇੰਗਲੈਂਡ ਤੋਂ ਆਇਆ ਹੈ। ਉਹ ਇੱਥੇ ਫੁੱਲਾਂ ਦੀ ਖੇਤੀ ਕਰਨਾ ਚਾਹੁੰਦਾ ਹੈ ਅਤੇ ਉਸ ਨੇ ਕਿਹਾ ਕਿ ਉਸ ਕੋਲ ਬਹੁਤ ਵਧੀਆ ਸੁਝਾਅ ਹੈ। ਉਸ ਸੁਝਾਅ 'ਤੇ ਉਹ ਆਪਣੇ ਨਾਲ-ਨਾਲ ਹੋਰ ਵੀ ਪਰਿਵਾਰਾਂ ਦੀ ਰੋਟੀ ਚਲਾ ਰਿਹਾ ਹੈ। ਉਸ ਨੇ ਕਿਹਾ ਕਿ ਪਹਿਲਾਂ ਗੇਂਦੇ ਦੇ ਫੁੱਲਾਂ ਦੇ ਬੀਜ ਕੋਲਕਾਤੇ ਤੋਂ ਮੰਗਾਏ ਜਾਂਦੇ ਸਨ ਪਰ ਹੁਣ ਅੰਮ੍ਰਿਤਸਰ ਵਿੱਚ ਵੀ ਇਸ ਦੀ ਖੇਤੀ ਸ਼ੁਰੂ ਹੋ ਗਈ ਹੈ। ਹੁਣ ਇਹ ਫੁੱਲ ਪੰਜਾਬ ਵਿੱਚ ਵੀ ਮਿਲਣਗੇ। ਉਨ੍ਹਾਂ ਨੇ ਕਿਹਾ ਕਿ ਜ਼ਿਆਦਾਤਰ ਇਹ ਫੁੱਲ ਮੰਦਰਾਂ ਅਤੇ ਵਿਆਹ ਸ਼ਾਦੀਆਂ ਦੇ ਪ੍ਰੋਗਰਾਮਾਂ ਵਿੱਚ ਲੱਗਦੇ ਹਨ।
ਕਿਸਾਨਾਂ ਦੀ ਮਦਦ
ਬਲਬੀਰ ਸਿੰਘ ਨੇ ਦੱਸਿਆ ਕਿ ਜਦੋਂ ਕੋਈ ਵੀ ਤਿਉਹਾਰ ਦਾ ਸੀਜ਼ਨ ਹੋਵੇ ਜਾਂ ਵਿਆਹ ਸ਼ਾਦੀਆਂ ਦਾ ਸੀਜ਼ਨ ਹੋਵੇ। ਉਦੋਂ ਇਨ੍ਹਾਂ ਦੀ ਡਿਮਾਂਡ ਹੋਰ ਜ਼ਿਆਦਾ ਵੱਧ ਜਾਂਦੀ ਹੈ। ਉਸ ਨੇ ਦੱਸਿਆ ਕਿ ਸਭ ਤੋਂ ਵੱਡੀ ਗੱਲ ਇਹ ਹੈ ਕਿ ਪਾਣੀ ਦੀ ਵੀ ਜਿਆਦਾ ਲੋੜ ਨਹੀਂ ਹੁੰਦੀ ਤੇ ਨਾ ਹੀ ਕੋਈ ਜਿਆਦਾ ਡਰਨ ਦੀ ਲੋੜ ਹੁੰਦੀ ਹੈ ਕਿ ਸਾਡੀ ਫ਼ਸਲ ਖ਼ਰਾਬ ਹੋ ਜਾਵੇਗੀ। ਬਲਬੀਰ ਨੇ ਦੱਸਿਆ ਕੇ ਉਸ ਦੇ ਤਿੰਨ ਬੱਚੇ ਹਨ। ਉਸ ਨੇ ਇੱਕ ਲੜਕੀ ਦਾ ਵਿਆਹ ਕਰ ਦਿੱਤਾ ਹੈ ਤੇ ਇੱਕ ਲੜਕਾ ਮੇਰਾ ਦੁਬਈ ਟਰਾਲਾ ਚਲਾ ਰਿਹਾ ਹੈ ਤੇ ਇੱਕ ਲੜਕੇ ਨੂੰ ਉਹ ਬੀਐਸਸੀ ਐਗਰੀਕਲਚਰ ਦੀ ਪੜ੍ਹਾਈ ਕਰਵਾ ਰਿਹਾ ਹੈ। ਉਸ ਨੂੰ ਵੀ ਛੇਤੀ ਸਰਕਾਰੀ ਵਿਭਾਗ ਵਿੱਚ ਇੱਕ ਵੱਡਾ ਅਧਿਕਾਰੀ ਵੇਖਣਾ ਚਾਹੁੰਦਾ ਹੈ ਤਾਂ ਜੋ ਕਿਸਾਨਾਂ ਦੀ ਮਦਦ ਕਰ ਸਕੇ। ਬਲਬੀਰ ਸਿੰਘ ਨੇ ਕਿਹਾ ਕਿ ਜੇਕਰ ਆਦਮੀ ਦੇ ਮਨ ਵਿੱਚ ਕੁਝ ਕਰਨ ਦੀ ਇੱਛਾ ਹੈ ਤਾਂ ਉਹ ਆਪਣੇ ਘਰ ਵਿੱਚ ਰਹਿ ਕੇ ਵੀ ਬਹੁਤ ਕੁਝ ਕਰ ਸਕਦਾ ਹੈ। ਉਸ ਨੇ ਕਿਹਾ ਕਿ ਜੋ ਅੱਜਕਲ ਨੌਜਵਾਨ ਵਿਦੇਸ਼ਾਂ ਦਾ ਰੁੱਖ ਕਰ ਰਹੇ ਹਨ ਅਤੇ ਡਿਪੋਰਟ ਹੋ ਕੇ ਵਾਪਸ ਆਪਣੇ ਵਤਨ ਆ ਰਹੇ ਹਨ, ਸਾਰਾ ਪੈਸਾ ਬਰਬਾਦ ਹੋ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਜੇਕਰ ਤੁਸੀਂ ਕੁਝ ਕਰਨਾ ਚਾਹੁੰਦੇ ਹੋ ਤਾਂ ਆਪਣੇ ਵਤਨ ਵਿੱਚ ਰਹਿ ਕੇ ਵੀ ਕਰ ਸਕਦੇ ਹੋ। ਬਹੁਤ ਕੰਮ ਹਨ ਕਰਨ ਦੇ ਲਈ ਜੇਕਰ ਮਨ ਵਿੱਚ ਕੁਝ ਕਰਨ ਦਾ ਜਜ਼ਬਾ ਹੋਵੇ।
