ਚੰਡੀਗੜ੍ਹ: ਬਾਲੀਵੁੱਡ ਦੇ ਬਹੁਮੁਖੀ ਅਦਾਕਾਰ ਰਾਹੁਲ ਦੇਵ ਪੰਜਾਬੀ ਸਿਨੇਮਾ ਖੇਤਰ ਵਿੱਚ ਵੀ ਮਜ਼ਬੂਤ ਪੈੜਾਂ ਸਿਰਜਦੇ ਜਾ ਰਹੇ ਹਨ, ਜੋ ਰਿਲੀਜ਼ ਹੋਣ ਜਾ ਰਹੀ ਆਪਣੀ ਨਵੀਂ ਪੰਜਾਬੀ ਫਿਲਮ 'ਵਾਰਨਿੰਗ 2' ਨਾਲ ਪਾਲੀਵੁੱਡ ਵਿੱਚ ਇੱਕ ਹੋਰ ਪ੍ਰਭਾਵੀ ਪਾਰੀ ਵੱਲ ਵਧਣ ਜਾ ਰਹੇ ਹਨ, ਜਿੰਨਾਂ ਦੀ ਇਸ ਬਹੁ-ਚਰਚਿਤ ਫਿਲਮ ਦੇ ਟ੍ਰੇਲਰ ਨੂੰ ਚਾਰੇ ਪਾਸੇ ਤੋਂ ਭਰਵਾਂ ਹੁੰਗਾਰਾ ਮਿਲ ਰਿਹਾ ਹੈ।
'ਹੰਬਲ ਮੋਸ਼ਨ ਪਿਕਚਰਜ਼' ਵੱਲੋਂ 'ਸਾ-ਰੇ-ਗਾ-ਮਾ' ਅਤੇ 'ਯੁਡਲੀ ਫਿਲਮਜ਼' ਦੇ ਸੁਯੰਕਤ ਨਿਰਮਾਣ ਅਧੀਨ ਪੇਸ਼ ਕੀਤੀ ਜਾ ਰਹੀ ਇਸ ਐਕਸ਼ਨ ਡਰਾਮਾ ਫਿਲਮ ਦਾ ਨਿਰਦੇਸ਼ਨ ਨੌਜਵਾਨ ਫਿਲਮਕਾਰ ਅਮਨ ਹੁੰਦਲ ਦੁਆਰਾ ਕੀਤਾ ਗਿਆ ਹੈ, ਜੋ ਇਸ ਫਿਲਮ ਦੇ ਪਹਿਲੇ ਅਤੇ ਸੁਪਰ-ਡੁਪਰ ਹਿੱਟ ਰਹੇ ਭਾਗ 'ਵਾਰਨਿੰਗ' ਤੋਂ ਲੈ ਕੇ ਕਈ ਚਰਚਿਤ ਅਤੇ ਸਫ਼ਲ ਵੈੱਬ ਸੀਰੀਜ਼ ਦਾ ਨਿਰਦੇਸ਼ਨ ਕਰ ਚੁੱਕੇ ਹਨ।
ਇਸ ਨਵੇਂ ਵਰ੍ਹੇ ਦੀ ਪਹਿਲੀ ਵੱਡੀ ਐਕਸ਼ਨ ਫਿਲਮ ਵਜੋਂ ਸਾਹਮਣੇ ਆ ਰਹੀ ਉਕਤ ਫਿਲਮ ਨੂੰ ਲੈ ਕੇ ਆਪਣਾ ਉਤਸ਼ਾਹ ਜ਼ਾਹਰ ਕਰਦੇ ਹੋਏ ਅਦਾਕਾਰ ਰਾਹੁਲ ਆਖਦੇ ਹਨ, 'ਇਹ ਮੇਰੇ ਲਈ ਇਸ ਮਾਅਨਿਆਂ ਤੋਂ ਵੀ ਖਾਸ ਫਿਲਮ ਹੈ, ਕਿਉਂਕਿ ਇਸ ਦੁਆਰਾ ਪੰਜਾਬੀ ਸਿਨੇਮਾ ਸਟਾਰ ਅਤੇ ਉੱਚਕੋਟੀ ਨਿਰਮਾਤਾ ਗਿੱਪੀ ਗਰੇਵਾਲ ਨਾਲ ਦੂਸਰੀ ਵਾਰ ਸਕਰੀਨ ਸ਼ੇਅਰ ਕਰਨ ਦਾ ਅਵਸਰ ਮਿਲਿਆ ਹੈ। ਇਸ ਤੋਂ ਇਲਾਵਾ ਜੇਕਰ ਕਿਰਦਾਰ ਦੀ ਗੱਲ ਕਰਾਂ ਤਾਂ ਇਸ ਨੂੰ ਨਿਭਾਉਣਾ ਵੀ ਬੇਹੱਦ ਸ਼ਾਨਦਾਰ ਅਤੇ ਚੁਣੌਤੀਪੂਰਨ ਰਿਹਾ ਹੈ।'
ਉਲੇਖਯੋਗ ਹੈ ਕਿ ਹਾਲ ਹੀ ਵਿੱਚ ਰਿਲੀਜ਼ ਹੋਈ ਅਪਣੀ ਪੀਰੀਅਡ ਡਰਾਮਾ ਫਿਲਮ 'ਮਸਤਾਨੇ' ਵਿੱਚ ਨਿਭਾਏ ਅਪਣੇ ਉਮਦਾ ਕਿਰਦਾਰ ਨੂੰ ਲੈ ਵੀ ਖਾਸੀ ਸਲਾਹੁਤਾ ਹਾਸਿਲ ਕਰ ਚੁੱਕੇ ਹਨ ਇਹ ਬਾ-ਕਮਾਲ ਅਦਾਕਾਰ, ਜਿੰਨਾਂ ਇਸ ਸਿਨੇਮਾ ਨਾਲ ਦਿਨ ਬ ਦਿਨ ਹੋਰ ਗੂੜੀ ਹੁੰਦੀ ਜਾ ਰਹੀ ਸਾਂਝ ਨੂੰ ਲੈ ਕੇ ਵਲਵਲੇ ਸਾਂਝੇ ਕਰਦਿਆਂ ਦੱਸਿਆ ਕਿ ਪੰਜਾਬੀ ਸਿਨੇਮਾ ਨਾਲ ਜੁੜਨਾ ਮੇਰੇ ਲਈ ਹਮੇਸ਼ਾ ਇੱਕ ਮਾਣ ਵਾਂਗ ਰਿਹਾ ਹੈ, ਜਿਸ ਦੇ ਮੱਦੇਨਜ਼ਰ ਹੀ ਹਰ ਪੰਜਾਬੀ ਫਿਲਮ ਦੀ ਤਰ੍ਹਾਂ ਉਕਤ ਫਿਲਮ ਪ੍ਰੋਜੈਕਟ ਦਾ ਹਿੱਸਾ ਬਣਨਾ ਵੀ ਮੇਰੇ ਲਈ ਬਿਨਾਂ ਸੋਚੇ-ਸਮਝੇ ਲਿਆ ਜਾਣ ਵਾਲਾ ਫੈਸਲਾ ਸੀ, ਜਿਸ ਦਾ ਕਾਰਨ ਇਸ ਸਿਨੇਮਾ ਨਾਲ ਮੇਰਾ ਹੱਦ ਤੋਂ ਵੱਧ ਮੋਹ ਕਿਹਾ ਜਾ ਸਕਦਾ ਹੈ।
ਉਨਾਂ ਅੱਗੇ ਕਿਹਾ ਕਿ ਹੁਣ ਤੱਕ ਕੀਤੀ ਹਰ ਪੰਜਾਬੀ ਫਿਲਮ ਦੀ ਤਰਾਂ ਉਕਤ ਫਿਲਮ ਵਿਚਲੇ ਕਿਰਦਾਰ ਦਾ ਵੀ ਪੂਰਾ ਆਨੰਦ ਮਾਣਿਆ ਹੈ ਅਤੇ ਇਸ ਰੋਲ ਨੂੰ ਪਰਦੇ 'ਤੇ ਵੇਖਣ ਲਈ ਦਰਸ਼ਕਾਂ ਵਾਂਗ ਹੀ ਬਹੁਤ ਹੀ ਰੋਮਾਂਚਿਤ ਹਾਂ।
ਸਾਲ 2012 'ਚ ਆਈ 'ਮਿਰਜ਼ਾ ਦਾ ਅਨਟੋਲਡ ਸਟੋਰੀ' ਦੇ ਲੰਮੇ ਸਮੇਂ ਤੋਂ ਬਾਅਦ 'ਵਾਰਨਿੰਗ 2' ਵਿਚ ਦੂਜੀ ਵਾਰ ਅਦਾਕਾਰ ਗਿੱਪੀ ਗਰੇਵਾਲ ਨਾਲ ਨਜ਼ਰ ਆਉਣਗੇ ਇਹ ਅਜ਼ੀਮ ਹਿੰਦੀ ਸਿਨੇਮਾ ਐਕਟਰ, ਜਿੰਨਾਂ ਦੀ ਇਹ ਬਿੱਗ ਸੈਟਅੱਪ ਫਿਲਮ 2 ਫਰਵਰੀ 2024 ਨੂੰ ਦੁਨੀਆ ਭਰ 'ਚ ਰਿਲੀਜ਼ ਹੋਣ ਜਾ ਰਹੀ ਹੈ, ਜਿਸ ਵਿੱਚ ਜੈਸਮੀਨ ਭਸੀਨ, ਰਾਜ ਸਿੰਘ ਝਿੰਜਰ, ਪ੍ਰਿੰਸ ਕੰਵਲਜੀਤ ਸਿੰਘ, ਜੱਗੀ ਸਿੰਘ, ਰਘੂਬੀਰ ਬੋਲੀ, ਧੀਰਜ ਕੁਮਾਰ ਸਮੇਤ ਕਈ ਮੰਨੇ ਪ੍ਰਮੰਨੇ ਚਿਹਰੇ ਮਹੱਤਵਪੂਰਨ ਕਿਰਦਾਰਾਂ ਵਿੱਚ ਨਜ਼ਰ ਅਉਣਗੇ।
