ਨਵੀਂ ਦਿੱਲੀ: ਇਸ ਸਾਲ 19 ਅਪ੍ਰੈਲ ਨੂੰ ਸ਼ੁਰੂ ਹੋਈਆਂ ਲੋਕ ਸਭਾ ਚੋਣਾਂ 43 ਦਿਨਾਂ ਬਾਅਦ ਸ਼ਨੀਵਾਰ ਨੂੰ 7ਵੇਂ ਗੇੜ ਵਿੱਚ ਵੋਟਿੰਗ ਦੇ ਨਾਲ ਖ਼ਤਮ ਹੋਣ ਜਾ ਰਹੀਆਂ ਹਨ। ਚੋਣਾਂ ਖ਼ਤਮ ਹੋਣ ਤੋਂ ਬਾਅਦ ਸਭ ਦੀਆਂ ਨਜ਼ਰਾਂ ਐਗਜ਼ਿਟ ਪੋਲ 'ਤੇ ਹੋਣਗੀਆਂ, ਜੋ ਅਧਿਕਾਰਤ ਤੌਰ 'ਤੇ ਵੋਟਿੰਗ ਖ਼ਤਮ ਹੋਣ ਤੋਂ ਤੁਰੰਤ ਬਾਅਦ ਸਾਹਮਣੇ ਆਉਣੀਆਂ ਸ਼ੁਰੂ ਹੋ ਜਾਣਗੀਆਂ।
ਚੋਣਾਂ ਦੇ ਨਤੀਜੇ ਆਉਣ ਤੋਂ ਪਹਿਲਾਂ ਹੀ ਐਗਜ਼ਿਟ ਪੋਲ ਆ ਜਾਣਗੇ, ਜੋ ਸਿਆਸੀ ਪਾਰਟੀਆਂ ਨੂੰ ਨਤੀਜਿਆਂ ਤੋਂ ਪਹਿਲਾਂ ਨਿਰਾਸ਼ਾ ਜਾਂ ਉਤਸ਼ਾਹ ਨਾਲ ਭਰ ਦੇਣਗੇ। ਹਾਲਾਂਕਿ, ਕਈ ਵਾਰ ਐਗਜ਼ਿਟ ਪੋਲ ਵੀ ਗ਼ਲਤ ਸਾਬਿਤ ਹੁੰਦੇ ਹਨ। ਦੱਸ ਦੇਈਏ ਕਿ ਚੋਣਾਂ ਦੇ ਨਤੀਜੇ 4 ਜੂਨ ਨੂੰ ਐਲਾਨੇ ਜਾਣਗੇ।
ਜ਼ਿਕਰਯੋਗ ਹੈ ਕਿ 2014 ਦੀਆਂ ਲੋਕ ਸਭਾ ਚੋਣਾਂ 7 ਅਪ੍ਰੈਲ ਤੋਂ 12 ਮਈ ਦਰਮਿਆਨ ਹੋਈਆਂ ਸਨ ਅਤੇ ਨਤੀਜੇ 16 ਮਈ ਨੂੰ ਐਲਾਨੇ ਗਏ ਸਨ, ਜਦਕਿ 2019 ਦੀਆਂ ਚੋਣਾਂ 11 ਅਪ੍ਰੈਲ ਤੋਂ 19 ਮਈ ਦਰਮਿਆਨ ਹੋਈਆਂ ਸਨ ਅਤੇ ਨਤੀਜੇ 23 ਮਈ ਨੂੰ ਐਲਾਨੇ ਗਏ ਸਨ।
2009 ਵਿੱਚ ਐਗਜ਼ਿਟ ਪੋਲ ਦੀ ਭਵਿੱਖਬਾਣੀ ਕੀ ਸੀ? : 2009 ਵਿੱਚ ਕਰਵਾਏ ਗਏ 4 ਐਗਜ਼ਿਟ ਪੋਲ ਵਿੱਚ, ਯੂਪੀਏ ਨੂੰ 195 ਅਤੇ ਐਨਡੀਏ ਨੂੰ 185 ਸੀਟਾਂ ਮਿਲਣ ਦੀ ਭਵਿੱਖਬਾਣੀ ਕੀਤੀ ਗਈ ਸੀ। ਇਸ ਦੇ ਨਾਲ ਹੀ ਜਦੋਂ ਚੋਣ ਨਤੀਜੇ ਸਾਹਮਣੇ ਆਏ ਤਾਂ ਯੂਪੀਏ ਨੂੰ 262 ਸੀਟਾਂ ਮਿਲੀਆਂ ਅਤੇ ਐਨਡੀਏ 158 ਸੀਟਾਂ ਜਿੱਤ ਸਕੀ। ਇਹ ਸਨ ਪੋਲ ਆਫ਼ ਪੋਲ ਦੇ ਨਤੀਜੇ।
2014 ਵਿੱਚ ਐਗਜ਼ਿਟ ਪੋਲ ਕੀ ਸਨ?: 2014 ਦੀਆਂ ਲੋਕ ਸਭਾ ਚੋਣਾਂ ਵਿੱਚ 8 ਐਗਜ਼ਿਟ ਪੋਲ ਕਰਵਾਏ ਗਏ ਸਨ। ਇਨ੍ਹਾਂ ਵਿੱਚ ਔਸਤਨ 283 ਸੀਟਾਂ ਐਨਡੀਏ ਨੂੰ ਅਤੇ 105 ਸੀਟਾਂ ਯੂਪੀਏ ਨੂੰ ਮਿਲੀਆਂ, ਜਦਕਿ ਅੰਤਿਮ ਨਤੀਜੇ ਵਿੱਚ ਐਨਡੀਏ ਨੂੰ 336 ਅਤੇ ਯੂਪੀਏ ਨੂੰ 60 ਸੀਟਾਂ ਮਿਲੀਆਂ।
2019 ਵਿੱਚ ਕੀ ਰਿਹਾ ਨਤੀਜਾ ? : ਇਸੇ ਤਰ੍ਹਾਂ 2019 ਦੀਆਂ ਲੋਕ ਸਭਾ ਚੋਣਾਂ ਵਿੱਚ 13 ਐਗਜ਼ਿਟ ਪੋਲ ਕਰਵਾਏ ਗਏ ਸਨ। ਇਨ੍ਹਾਂ ਵਿੱਚੋਂ ਐਨਡੀਏ ਨੂੰ ਔਸਤਨ 306 ਅਤੇ ਯੂਪੀਏ ਨੂੰ 120 ਸੀਟਾਂ ਮਿਲਣ ਦਾ ਦਾਅਵਾ ਕੀਤਾ ਗਿਆ ਸੀ ਪਰ ਜਦੋਂ ਨਤੀਜੇ ਆਏ ਤਾਂ ਐਨਡੀਏ ਨੂੰ 353 ਅਤੇ ਯੂਪੀਏ ਨੂੰ ਕੁੱਲ 93 ਸੀਟਾਂ ਮਿਲੀਆਂ।
