ନୟାଗଡରେ ପୁଣି ଏକ ଶିଶୁକନ୍ୟା ନିଖୋଜ ଘଟଣା: ସ୍ଥାନୀୟ ଅଞ୍ଚଳରେ କୋକୁଆ ଭୟ

ନୟାଗଡ: ଜିଲ୍ଲା ରଣପୁର ଥାନା ଅଧୀନସ୍ଥ ନରେନ୍ଦ୍ରପୁର ପଞ୍ଚାୟତ ବଧିପାଟଣା ଗ୍ରାମରେ 3 ବର୍ଷର ଶିଶୁ କନ୍ୟା ହରପ୍ରିୟା ସାହୁ(ସ୍ବାତି) ନିଖୋଜକୁ ନେଇ ଏବେ ଚର୍ଚ୍ଚା ଜୋର ଧରିଛି । ଗାଁରେ ପୋଲିସ ଡେରା ପକାଇ ଜୋରଦାର ତଦନ୍ତ କରୁଛି । ସ୍ଥାନୀୟ ସବୁ ଜଳାଶୟକୁ ଦମକଳ ବାହିନୀ ପକ୍ଷରୁ ଖୋଜାଖୋଜି କରାଯାଇଛି । ଆଇଆଇସି ଏବଂ ଏସଡିପିଓ ଘଟଣାସ୍ଥଳରେ ଉପସ୍ଥିତ ରହି ଅଧିକ ତଦନ୍ତ କରୁଛନ୍ତି । ଗତକାଲି(ଶୁକ୍ରବାର) ଅପରାହ୍ନ 3 ଟାରେ ଶିଶୁକନ୍ୟା ଜଣକ ଖେଳିବାକୁ ଯାଇ ଆଉ ଫେରିନଥିଲା । ବହୁ ଖୋଜାଖୋଜି ପରେ ମଧ୍ୟ ସେ ନ ମିଳିବାରୁ ପରିବାର ଲୋକେ ଥାନାରେ ଏତଲା ଦେଇଥିଲେ । ତେବେ ବହୁଚର୍ଚ୍ଚିତ ପରୀ ହତ୍ୟାକାଣ୍ଡ ଘଟଣା ସାରା ରାଜ୍ୟରେ ଚାଞ୍ଚଲ୍ୟ ସୃଷ୍ଟି କରିଥିବା ବେଳେ ପୁଣି ଏକ ଶିଶୁ ନିଖୋଜକୁ ନେଇ ସ୍ଥାନୀୟ ଅଞ୍ଚଳରେ କୋକୁଆ ଭୟ ସୃଷ୍ଟି ହୋଇଛି । ନୟାଗଡରୁ ଜୟେନ୍ଦ୍ର ବେହେରା, ଇଟିଭି ଭାରତ