ଭଙ୍ଗା ଘରେ ସ୍ବପ୍ନ ସାଉଣ୍ଟିବାରେ ବ୍ୟସ୍ତ ଅସହାୟ ବୃଦ୍ଧ ଦମ୍ପତି

ଯାଜପୁର: ଯାଜପୁର ଜିଲ୍ଲା ବ୍ୟାସନଗର ପୌରାଞ୍ଚଳ ଅନ୍ତର୍ଗତ ବ୍ୟାସ ସରୋବର ଜଗନ୍ନାଥ ଆଦିବାସୀ ସାହିରେ ବାସ କରନ୍ତି ଅସହାୟ ବୃଦ୍ଧ ଦମ୍ପତି । ଏଣେ ତେଣେ ଭିକ୍ଷାବୃତ୍ତି କରି ପେଟ ପୋଷନ୍ତି ଦୁହେଁ । ଏବେ ଏମାନେ ବ୍ୟାଧିଗ୍ରସ୍ତ ହୋଇ ଭଲରେ ଚଲାବୁଲା କରିପାରୁ ନାହିଁନ୍ତି । ପ୍ରାୟ 30 ବର୍ଷରୁ ଊର୍ଦ୍ଧ୍ବ ସମୟ ଧରି ଦୁହେଁ ଏଠାରେ ଏକ କୁଡିଆ ଘରେ ବସବାସ କରିଆସୁଥିଲେ । 2 ମାସ ତଳେ ବୃଦ୍ଧଙ୍କ ବଡପୁଅ ଆରପାରିକୁ ଚାଲିଗଲା । ଠିକ୍ ତା ପରେ ପରେ ଏହି ଦମ୍ପତି କିଛି ମାଫିଆଙ୍କ ଧମକର ଶିକାର ହୋଇଥିଲେ । ଦମ୍ପତି ଭିକ୍ଷାବୃତ୍ତି ପାଇଁ ଯାଇଥିବା ବେଳେ ମାଫିଆମାନେ ତାଙ୍କ ଘର ଭାଙ୍ଗି ମାଟିରେ ମିଶାଇ ଦେଇଥିଲେ ।