ମାଫିଆଙ୍କ ଇଶାରାରେ ଚାଲିଛି ଅବାଧ ଗଞ୍ଜେଇ ଚାଷ, ମୋହରା ହେଉଛନ୍ତି ବେକାରୀ ଯୁବକ !

ଗଞ୍ଜେଇ: ଗଞ୍ଜେଇ ବେପାରୀଙ୍କ ପାଇଁ ଭୂସ୍ବର୍ଗ ପାଲଟିଛି ଗଜପତି ଜିଲ୍ଲାର ଆଦିବସୀ ଅଧ୍ୟୁଷିତ ଅଞ୍ଚଳ । ବାର୍ଷିକ ପ୍ରାୟ 2 ହଜାର କୋଟି ଟଙ୍କାର ଗଞ୍ଜେଇ ଚାଷ କରାଯାଉଥିବା ବେଳେ ଏହାକୁ ବିକି ବ୍ୟବସାୟୀ ମାଲାମାଲ ହେଉଛନ୍ତି । କିନ୍ତୁ ଏହି ଚାଷ କରୁଥିବା ନିରୀହ ଆଦିବାସୀମାନେ କେବଳ ମାମଲାରେ ଛନ୍ଦି ହେବା ହିଁ ସାର ହେଉଛି । ନଚେତ ଏତେ ଟଙ୍କାର ଗଞ୍ଜେଇ ଚାଷ ହେଉଥିବା ଅଞ୍ଚଳର ଲୋକଙ୍କ ଆର୍ଥିକ କିମ୍ବା ସାମାଜିକ ବିକାଶ ଏବେ ବି ଯଥା ପୂର୍ବଂ ରହନ୍ତା ନାହିଁ । ପ୍ରତିବର୍ଷ ଗଞ୍ଜେଇ ଗଛ ନଷ୍ଟ କରିବା କିମ୍ବା ଗଞ୍ଜେଇ ଚାଲଣ ସମୟରେ କେତେବେଳେ କେମିତି ଜବତ କରି କେବଳ ବାଃ ବାଃ ଗୋଟାଇବାରେ ବ୍ୟସ୍ତ ପୋଲିସ ଏବଂ ଅବକାରୀ ବିଭାଗ । ଏହାର ଚେର ଯାଏଁ ଯିବାକୁ ପ୍ରୟାସ ମଧ୍ୟ କରୁନାହିଁ ।