ରେଳଧାରଣା ଉପରେ ପଡ଼ିଲା ଶାଳ ଗଛ, ଅଟକିଲା ମେମୁ ଟ୍ରେନ୍‌

ରାଇରଙ୍ଗପୁର: ରେଳ ଧାରଣା ଉପରେ ପଡ଼ିଲା ଶାଳ ଗଛ । ଫଳରେ ଅଟକି ରହିଛି ରୂପସା-ବାଙ୍ଗିରିପୋଷି ମେମୁ ଟ୍ରେନ୍‌ ।  ମୟୁରଭଞ୍ଜ ବେତନଟୀ ଷ୍ଟେସନର ୨ ଶହ ମିଟର ଦୂରରେ ରେଳଧାରଣା ଉପରେ ଗଛଟି ପଡ଼ିଥିବା ଦେଖିବାକୁ ମିଳିଥିଲା । ତେବେ ଏକ ବଡ଼ ଧରଣର ଦୁର୍ଘଟଣାରୁ ଅଳ୍ପକେ ବର୍ତ୍ତି ଯାଇଛନ୍ତି  ଯାତ୍ରୀ । ସୌଭାଗ୍ୟ ବଶତଃ ବାରିପଦା-ବାଲେଶ୍ୱର ଡିଏମୟୁ ବେତନଟୀରୁ ବାରିପଦା ଅଭିମୁଖେ ବାହାରିଯିବାର ୧୫ ମିନିଟ୍ ପରେ ଏହି ଶାଳ ଗଛଟି ଟ୍ରେନ୍‌ଲାଇନ୍‌ ଉପରେ ପଡ଼ିଥିଲା । ବିଶାଳକାୟ ଗଛ ଭାଙ୍ଗି ରେଳ ଉପର ବିଦ୍ୟୁତ ତାର ଉପରେ ପଡ଼ିବା ଟ୍ରାକ୍‌ ଉପରେ ପଡ଼ିଥିଲା  । ଫଳରେ ମଞ୍ଚାବନ୍ଧା ଜଙ୍ଗଲରେ ଟ୍ରେନଟି ଅଟକି ରହିଛି । ରେଳ ବିଭାଗ ପକ୍ଷରୁ ତୁରନ୍ତ ଗଛକୁ ହଟାଇ ରେଳଧାରଣାର ମରାମତି ଆରମ୍ଭ ହୋଇଛି । ସେପଟେ ଉକ୍ତ ଗଛ ତଳେ ଚାପି ହୋଇ ଜଣେ ମହିଳା ଗୁରୁତର ଆହତ ହୋଇଥିବା ବେଳେ ତାଙ୍କୁ ଉଦ୍ଧାର କରି ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରିଛନ୍ତି ସ୍ଥାନୀୟ ଲୋକେ । ଅନ୍ୟପଟେ ଉକ୍ତ ଟ୍ରେନ୍‌ରେ ଯାତ୍ରା କରୁଥିବା କିଛି ରେଳଯାତ୍ରୀ ଜଙ୍ଗଲ ରାସ୍ତାରେ ଚାଲିଚାଲି କେସିପୁର ପହଞ୍ଚିବା ପରେ ଜାତୀୟ ରାଜପଥରେ ନିଜ ଗନ୍ତବ୍ୟ ସ୍ଥଳକୁ ଯିବା ପାଇଁ ବସକୁ ଅପେକ୍ଷା କରିଥିବା ଦେଖିବାକୁ ମିଳିଛି ।

ଇଟିଭି ଭାରତ, ରାଇରଙ୍ଗପୁର