ଅକାଳରେ ଲିଭିଗଲା ତିନି ନୀରିହ ଜୀବନ ଦୀପ, ଶୋକାକୁଳ ପରିବେଶରେ ଶେଷ ହେଲା ଅନ୍ତିମ ସଂସ୍କାର

ସୁବର୍ଣ୍ଣପୁର: ଗାଁ ଶ୍ମଶାନରେ ଜଳିଲା ତିନି ନିରୀହ ଛାତ୍ରଙ୍କ ମୃତଦେହ । ଶୋକାକୁଳ ପରିବେଶ ଭିତରେ ତିନି ନିଷ୍ପାପ ଛାତ୍ରଙ୍କ ଅନ୍ତିମ ସଂସ୍କାର କଲେ ଗ୍ରାମବାସୀ । ସୁବର୍ଣ୍ଣପୁର ଜିଲ୍ଲା ଶରଧାପାଲି ଛକରେ ଭୟଙ୍କର ସଡକ ଦୁର୍ଘଟଣାରେ ଚାଲିଗଲା ତିନି ପ୍ରାଣୀଙ୍କ ଜୀବନ  । ଜଣେ ଛାତ୍ର ଘଟଣାସ୍ଥଳରେ ହିଁ ପ୍ରାଣ ତ୍ୟାଗ କରିଥିବା ବେଳେ ଅନ୍ୟ ଦୁଇ ଗୁରୁତର ଆହତ ଛାତ୍ର ବୁର୍ଲା ମେଡିକାଲକୁ ସ୍ଥାନାନ୍ତର କରିବା ବାଟରେ ହିଁ ମୃତ୍ୟୁ ହୋଇଥିଲା । ଏହି ଦୁର୍ଘଟଣା ନେଇ ଘଟଣାସ୍ଥଳରେ ବ୍ୟାପକ ଉତ୍ତେଜନା ଦେଖା ଦେଇଥିଲା । ରାସ୍ତା ଉପରେ ଛାତ୍ରଙ୍କ ମୃତଦେହ ରଖି ସ୍ଥାନୀୟ ଲୋକେ ଧାରଣା ଦେଇଥିଲେ  । ଏହି ଘଟଣାକୁ ନେଇ ମୁଖ୍ୟମନ୍ତ୍ରୀ ଶୋକ ପ୍ରକାଶ କରିଛନ୍ତି  । ମୃତ ଛାତ୍ରମାନଙ୍କ ପରିବାର ପାଇଁ ୩ ଲକ୍ଷ ଟଙ୍କା ଲେଖାଏଁ ଅନୁକମ୍ପାମୂଳକ ସହାୟତା ଘୋଷଣା କରିଛନ୍ତି ରାଜ୍ୟ ସରକାର । ଏହା ସହିତ ଆହତ ଛାତ୍ରମାନଙ୍କ ଉପଯୁକ୍ତ ଚିକିତ୍ସା ବ୍ୟବସ୍ଥା କରିବା ପାଇଁ ନିର୍ଦ୍ଦେଶ ଦେଇଛନ୍ତି । ସେମାନଙ୍କ ପାଇଁ ୫୦ ହଜାର ଟଙ୍କାର ସହାୟତା ମଧ୍ୟ ଘୋଷଣା କରାଯାଇଛି । କ୍ଷତିପୂରଣ ଘୋଷଣା ପରେ ରାସ୍ତାରୁ ମୃତଦେହ ଉଠାଇ ଅନ୍ତିମ ସଂସ୍କାର କରିଛନ୍ତି ଗ୍ରାମବାସୀ  । ଅକାଳରେ ଲିଭିଗଲା ତିନି ନୀରିହ ଛାତ୍ରଙ୍କ ଜୀବନ  । ଯାହାକୁ ନେଇ ଗ୍ରାମରେ ଶୋକାକୁଳ ବାତାବରଣ ଦେଖିବାକୁ ମିଳିଛି  । ଇଟିଭି ଭାରତ, ସୁବର୍ଣ୍ଣପୁର