ସାଲେପୁରରେ ବ୍ୟବସାୟୀଙ୍କୁ ହତ୍ୟା ଅଭିଯୋଗ, ପୋଲିସର ତଦନ୍ତ ଜାରି

କଟକ: ପୁଣି ଦୁର୍ବୃତ୍ତଙ୍କ ଟାର୍ଗେଟରେ ବ୍ୟବସାୟୀ ! ଜଳଖିଆ ବ୍ୟବସାୟୀଙ୍କୁ ନିର୍ମମ ହତ୍ୟା । ଶୋଇଥିବା ବେଳେ ଘରେ ପଶି ହତ୍ୟା କରିଯାଇଥିବା ଅଭିଯୋଗ । ଏଭଳି ହତ୍ୟାକାଣ୍ଡ କଟକ ଜିଲ୍ଲା ନିଶ୍ଚିନ୍ତକୋଇଲି ବ୍ଲକ କୁଳିଆ ବଜାରରେ ଘଟିଛି । ମୃତ ବ୍ୟବସାୟୀ ଜଣକ ହେଲେ ହରେକୃଷ୍ଣ ପୃଷ୍ଟି । ସୂଚନାଅନୁସାରେ, ବୁଧବାର ବିଳମ୍ବିତ ରାତିରେ ଉଭୟ ସ୍ବାମୀ-ସ୍ତ୍ରୀ ଦୋକାନ ଶୋଇଥିବା ବେଳେ ଦୁର୍ବୃତ୍ତ ଘରେ ପଶି ଆକ୍ରମଣ କରିଥିବା ନେଇ ସନ୍ଦେହ କରାଯାଉଛି । ତେବେ ଘଟଣାସ୍ଥଳରେ ସ୍ବାମୀର ମୃତ୍ୟୁ ହୋଇଥିବା ବେଳେ ସ୍ତ୍ରୀକୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ କଟକ ସ୍ଥାନାନ୍ତର କରାଯାଇଛି । ଖବରପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । 

ଖବରଅନୁସାରେ, ସକାଳୁ ସକାଳୁ ସ୍ଥାନୀୟ ଲୋକେ ଚାହା ପିଇବାକୁ ଆସିଥିବା ବେଳେ ଘଟଣା ସମ୍ପର୍କରେ ଜାଣି ପୋଲିସ ଏବଂ ପରିବାର ଲୋକଙ୍କୁ ଖବର ଦେଇଥିଲେ । ପରିବାର ଲୋକେ ଏହି ଘଟଣାକୁ ହତ୍ୟାକାଣ୍ଡର ରୂପ ଦେଇଥିବା ବେଳେ ସାଇଣ୍ଟିଫିକ ଟିମ ସାହାଯ୍ୟରେ ତଦନ୍ତ ଆରମ୍ଭ କରିଛି ପୋଲିସ । ସାଲେପୁର ଥାନା ଅଧିକାରୀ, ଏସଡିପିଓ ସାଲେପୁର ଏବଂ କଟକ ଗ୍ରାମାଞ୍ଚଳ ଅତିରିକ୍ତ ଏସପି କୃଷ୍ଣ ପ୍ରସାଦ ପଟ୍ଟନାୟକ ଘଟଣାର ଅନୁସନ୍ଧାନ କରିଛନ୍ତି ।

ପ୍ରକାଶଥାଉକି, ଗତ ୨୪ ତାରିଖ ଦିନ ସ୍ଥାନୀୟ ଜନିଆଁ ବଜାରରେ ବ୍ୟବସାୟୀ ଦୋଳଗୋବିନ୍ଦ ଦାସଙ୍କୁ ହତ୍ୟା କରାଯାଇଥିଲା । ଆଜକୁ ପ୍ରାୟ ୧୨ ଦିନ ବିତିଯାଇଥିଲେ ମଧ୍ୟ ସାଲେପୁର ପୋଲିସ ହତ୍ୟାକାରୀର ଟେର୍ ପାଇନି। ମାସେ ଭିତରେ ଦୁଇଜଣ ବ୍ୟବସାୟୀଙ୍କୁ ଟାର୍ଗେଟ କରିଥିବା ବେଳେ ସ୍ଥାନୀୟବାସୀଙ୍କ ମନରେ ଛନକା ସୃଷ୍ଟି ହୋଇଛି । ଘଟଣା ଉପରୁ କେବେ ପରଦା ହଟୁଛି ତାହା ଦେଖିବାକୁ ବାକି ରହିଲା ।

ଇଟିଭି ଭାରତ, କଟକ