ନେତାଜୀ ସୁବାଷ ବୋଷଙ୍କ ପ୍ରତିମୂର୍ତ୍ତିରୁ ଚଷମା ଭାଙ୍ଗିଲେ ଛାତ୍ର, ଭିଡିଓ ଭାଇରାଲ

ଅନୁଗୋଳ: ରିଲ୍‌ସ କରିବା ବାହାନାରେ ଯୁବପିଢ଼ି ହିତାହିତ ଜ୍ଞାନ ଭୁଲି ଯାଉଛନ୍ତି । ଜଣେ କଲେଜ ଛାତ୍ର ନେତାଜୀ ସୁବାଷ ବୋଷ ପ୍ରତିମୂର୍ତ୍ତିରୁ ଚଷମା ଭାଙ୍ଗି ରିଲ୍ସ କରୁଥିବାର ଭିଡ଼ିଓ ଭାଇରାଲ ହୋଇଛି । ସୁବାଷ ବୋଷଙ୍କ ପ୍ରତିମୂର୍ତ୍ତି ଉପରେ କାନ୍ଧରେ ହାତ ପକାଇ, ତାଙ୍କ ଚଷମା ଟାଣି ରିଲ୍ସ କରିଛନ୍ତି ଜଣେ କଲେଜ ଛାତ୍ର । ଯାହାର ଭିଡିଓ ଏବେ ଭାଇରାଲ ହେବାରେ ଲାଗିଛି । ଘଟଣାକୁ ନେଇ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି ଅଞ୍ଚଳବାସୀ । ଏହି ଘଟଣାଟି ଅନୁଗୋଳ ସ୍ୱୟଂ ଶାସିତ ମହାବିଦ୍ୟାଳୟର ବୋଲି ଜଣା ପଡ଼ିଥିବା ବେଳେ ଛାତ୍ର ଜଣଙ୍କ ଯୁକ୍ତ ୨ର ହୋଇଥିବା ଜଣାପଡିଛି । 

ସୂଚନା ଅନୁସାରେ, ଦିଲ କା ରାଜା ସନ୍ଦୀପ ନାମକ ଏକ ଇନଷ୍ଟାଗ୍ରାମ ଆକାଉଣ୍ଟରେ ସମ୍ପୃକ୍ତ ଯୁବକ ଜଣଙ୍କ ଏକ ରିଲ କରି ଛାଡିଥିଲେ । ଅନୁଗୋଳ କଲେଜ ପରିସରରେ ଅନେକ ମହାପୁରୁଷଙ୍କ ପ୍ରତିମୂର୍ତ୍ତି ଥିବା ବେଳେ ଛାତ୍ର ଜଣଙ୍କ ସୁବାଷ ବୋଷଙ୍କ ପ୍ରତିମୂର୍ତ୍ତିକୁ ଧରି ତାଙ୍କ ଚଷମା ଟାଣି ଟାଣି ନାଚିଥିଲେ । କିଛି ସମୟ ପରେ ପ୍ରତିମୂର୍ତ୍ତିରେ ଲାଗିଥିବା ଚାଷମାକୁ ବଳ ପୂର୍ବକ ଟାଣି ଭାଙ୍ଗିଦେବା ସହ ସେହି ଚଷମାକୁ ପିନ୍ଧି ମଇନା ମୋର ମଇନା ଗୀତରେ ନାଚି ନାଚି ରିଲ କରିଥିଲେ । ତେବେ ଜଣେ କଲେଜ ପଢୁଆ ଛାତ୍ରଙ୍କ ଏଭଳି କାରନାମା ଦେଖି ଅଞ୍ଚଳରେ ତୀବ୍ର ଅସନ୍ତୋଷ ପ୍ରକାଶ ପାଇଛି । ଭିଡିଓଟି ଭାଇରାଲ ହେବା ପରେ ଭିଡିଓ ଜାରି କରି ଏପରି କାର୍ଯ୍ୟ ପାଇଁ ସମ୍ପୃକ୍ତ ଛାତ୍ର ଜଣକ କ୍ଷମା ବି ମାଗିଛନ୍ତି  ।

ଇଟିଭି ଭାରତ, ଅନୁଗୋଳ