କଟକକୁ ଆସିଲା ସମଲେଶ୍ବରୀ ପ୍ରକଳ୍ପ ନିମନ୍ତ୍ରଣ

SAMALEI Project Inauguration: କଟକ: ଆସନ୍ତା ୨୭ ତାରିଖରେ ଲୋକାର୍ପିତ ହେବାକୁ ଯାଇଛି ମା’ ସମଲେଇଙ୍କ ପ୍ରକଳ୍ପ । ଏହି ପ୍ରକଳ୍ପର ଉଦଘାଟନୀ ଉତ୍ସବରେ ସାମିଲ ହେବା ପାଇଁ ସମ୍ବଲପୁରରୁ ବିଭିନ୍ନ ଜିଲ୍ଲାଗୁଡିକୁ ନିମନ୍ତ୍ରଣ ପତ୍ର ନେଇ ବାହାରିଛନ୍ତି ସ୍ବତନ୍ତ୍ର ଟିମ ।  ଗୁରୁବାର ସମ୍ବଲପୁରରୁ ସ୍ବତନ୍ତ୍ର ଟିମ କଟକ ଜିଲ୍ଲାକୁ ନିମନ୍ତ୍ରଣ ପତ୍ର ନେଇଆସିଥିଲେ । ଜିଲ୍ଲାର ଚର୍ଚ୍ଚିକା ଠାକୁରାଣୀ, ବାବା ଧବଳେଶ୍ଵର ଓ କଟକର ଅଧିଷ୍ଠାତ୍ରୀ ଦେବୀ ମା’ କଟକ ଚଣ୍ଡୀଙ୍କ ମନ୍ଦିରକୁ ନିମନ୍ତ୍ରଣ ପତ୍ର ପ୍ରଦାନ କରାଯାଇଛି । ଏହି କାର୍ଯ୍ୟକ୍ରମରେ କଟକ ଜିଲ୍ଲାପାଳଙ୍କ ସମେତ ପ୍ରଶାସନିକ ଅଧିକାରୀମାନେ ଉପସ୍ଥିତ ରହି ଅତିଥିମାନଙ୍କ ନିକଟରୁ ନିମନ୍ତ୍ରଣ ପତ୍ର ଗ୍ରହଣ କରିଥିଲେ । 

ଏହା ମଧ୍ୟ ପଢ଼ନ୍ତୁ... ଗର୍ଭଗୃହରେ ବିରାଜିଲେ ରାମଲାଲା, ରାମନାମରେ କମ୍ପିଲା ଚତୁର୍ଦ୍ଦିଗ

କଟକରେ ଆସି ନିମନ୍ତ୍ରଣ ପତ୍ର ପ୍ରଦାନ କରିବା ସହ ସମ୍ବଲପୁରରେ ଆତିଥ୍ୟ ପାଇଁ ସମସ୍ତ ପ୍ରକାରର ବନ୍ଦୋବସ୍ତ କରାଯାଇଛି ବୋଲି କହିଛନ୍ତି ମା’ ସମଲେଶ୍ଵରୀ ମନ୍ଦିରର ଟ୍ରଷ୍ଟି  । ସେହିଭଳି ନିମନ୍ତ୍ରଣ ପତ୍ର ପାଇ ବେଶ ଖୁସି ପ୍ରକଟ କରିଛନ୍ତି ମନ୍ଦିରର ବରିଷ୍ଠ ପୂଜକମାନେ । ପୂର୍ବରୁ ପୁରୀ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଶୁଭ ଉଦଘାଟନ ନିମନ୍ତ୍ରଣ ପତ୍ର ନେଇ କଟକ ସର୍କିଟ ହାଉସରେ ପହଞ୍ଚିଥିଲେ ପୁରୀ ଶ୍ରୀମନ୍ଦିରର 3 ଦଇତାପତି । କଟକ ଜିଲ୍ଲା ପ୍ରଶାସନ ଓ ଜିଲ୍ଲା ସଂସ୍କୃତି ବିଭାଗ ପକ୍ଷରୁ ସମସ୍ତ ଦଇତାପତିଙ୍କୁ ପାରମ୍ପରିକ ବାଦ୍ୟ ମାଧ୍ୟମରେ ସ୍ୱାଗତ କରାଯାଇଥିଲା । କଟକ ଜିଲ୍ଲା ସଂସ୍କୃତି ବିଭାଗ ପକ୍ଷରୁ ପୁରୀ ମନ୍ଦିର ପ୍ରଶାସନଙ୍କୁ ଜିଲ୍ଲାର 299 ମନ୍ଦିରର ତାଲିକା ଦିଆଯାଇଥିଲା । ତେବେ ସମଲେଶ୍ବରୀ ମନ୍ଦିର ପାଇଁ କଟକରୁ 3ଟି ମନ୍ଦିରକୁ ନିମନ୍ତ୍ରଣ କରିଛନ୍ତି ସମଲେଶ୍ବରୀ ମନ୍ଦିର ଟ୍ରଷ୍ଟି ସଦସ୍ୟ ।

ଇଟିଭି ଭାରତ, କଟକ