OTDC ପକ୍ଷରୁ ଓଡ଼ିଆ ନବ ବର୍ଷ ଓ ପଣା ସଂକ୍ରାନ୍ତି ପାଳିତ

ଭୁବନେଶ୍ବର: ଭୁବନେଶ୍ଵର ପାନ୍ଥ ନିବାସ ପରିସରରେ ଆୟୋଜିତ ହୋଇଯାଇଛି ଓଡ଼ିଆ ନବ ବର୍ଷ ଓ ପଣା ସଂକ୍ରାନ୍ତି । ଶୁକ୍ରବାର ଓଟିଡିସି ଓ ରାଜ୍ୟ ପର୍ଯ୍ୟଟନ ବିଭାଗର ମିଳିତ ଆନୁକୂଲ୍ୟରେ ଏହି କାର୍ଯ୍ୟକ୍ରମ ଆୟୋଜିତ ହୋଇଯାଇଥିଲା । ମୁଖ୍ୟ ଅତିଥି ଭାବେ ଓଟିଡିସି ଅଧ୍ୟକ୍ଷ ଲେଲିନ ମହାନ୍ତି ଏଥିରେ ସାମିଲ ହୋଇ କାର୍ଯ୍ୟକ୍ରମର ଉଦଘାଟନ କରିଥିଲେ । ଏନେଇ ଲେଲିନ ମହାନ୍ତି କହିଛନ୍ତି ଯେ,''କୋଭିଡ ପରେ ପରିସ୍ଥିତି ବଦଳିଛି, ବିଶ୍ଵର ବିଭିନ୍ନ ପ୍ରାନ୍ତରୁ ଓଡ଼ିଶା ବୁଲିବାକୁ ଆସୁଥିବା ପର୍ଯ୍ୟଟକଙ୍କ ସଂଖ୍ୟା ବଢ଼ିଛି । ଯାହା ରାଜ୍ୟ ପର୍ଯ୍ୟଟନ ବିଭାଗ ପାଇଁ ଏକ ଶୁଭ ସଙ୍କେତ । ଆଗକୁ ଓଡ଼ିଶାକୁ ଆସୁଥିବା ପ୍ରତି ପର୍ଯ୍ୟଟକ ଯେଉଁ ଭଳି ସୁନ୍ଦର ଅନୁଭୂତି ନେଇ ଫେରିବେ ସେ ନେଇ ମିଳିତ ଭାବେ ଉଦ୍ୟମ କରିବେ ଓଟିଡିସି ଓ ପର୍ଯ୍ୟଟନ ବିଭାଗ । କାର୍ଯ୍ୟକ୍ରମରେ ଓଡ଼ିଆ ଘର ପରମ୍ପରାକୁ ନେଇ ପ୍ରଦର୍ଶୀତ ହୋଇଥିଲା ଚିତ୍ର ପ୍ରଦର୍ଶନୀ । ଯେଉଁଥିରେ ୪୨ ଜଣ ଯୁବ ଚିତ୍ର ଶିଳ୍ପୀ ମାନେ ଅଂଶ ଗ୍ରହଣ କରିଥିଲେ । ସମସ୍ତ ଚିତ୍ର ଶିଳ୍ପୀ ମାନଙ୍କୁ ବିଭାଗ ତରଫରୁ ସମ୍ମାନିତ କରାଯାଇଥିଲା । ଏହା ସହ ସାଧାରଣ ଲୋକଙ୍କ ପାଇଁ ପଣା ଓ କାକରା ବ୍ୟବସ୍ଥା କରାଯାଇଥିଲା । 

ଇଟିଭି ଭାରତ,ଭୁବନେଶ୍ବର