Bengaluru: ଗ୍ୟାରେଜରେ ଭୟାବହ ଅଗ୍ନିକାଣ୍ଡ, ଜଳିଗଲା 18 ବସ

ବେଙ୍ଗାଲୁରୁ: ସହରର ବୀରଭଦ୍ରନଗରରେ ଥିବା ବସ୍‌ ଗ୍ୟାରେଜରେ ଭୟାବହ ଅଗ୍ନିକାଣ୍ଡ ଘଟି ପ୍ରାୟ 18ଟି ବସ ଜଳିଯାଇଛି । ‘ଏସଭି କୋଚ’ ନାମକ ଏହି ଗ୍ୟାରେଜରେ ବସର ବଡି ଫିଟିଂ କାମ କରାଯାଏ । ଶତାଧିକ ବସ ଏହି ଗ୍ୟାରେଜରେ ମରାମତି ପାଇଁ ରଖାଯାଇଥିଲା । ତେବେ ଆଜି (ସୋମବାର) ପୂର୍ବାହ୍ନରେ କୌଣସି କାରଣରୁ ଗ୍ୟାରେଜରେ ନିଆଁ ଲାଗିବା ସହ ତୁରନ୍ତ ବ୍ୟାପି ଯାଇଥିଲା । ଖବର ପାଇ 10ଟି ଫାଏର ଟିମ ଘଟଣାସ୍ଥଳରେ ପହଞ୍ଚି ନିଆଁକୁ ନିୟନ୍ତ୍ରଣ କରିବା ଆରମ୍ଭ କରିଥିଲେ । ମାତ୍ର ଗୋଟିଏ ପରେ ଗୋଟିଏ ବସକୁ ନିଆଁ ବ୍ୟାପିଯିବା ଫଳରେ 18ଟି ବସ ଜଳିଯାଇଛି ।

ଫାଏର ବ୍ରିଗେଡ ଉପନିର୍ଦ୍ଦେଶକ ଗୁରୁଲିଙ୍ଗାୟା ଘଟଣାର ତଦନ୍ତ ଜାରି ରଖିଛନ୍ତି । ପ୍ରାଥମିକ ଭାବେ ଏହି ଗ୍ୟାରେଜରେ ଅଗ୍ନି ନିର୍ବାପକ ନିୟମାବଳି ଅନୁପାଳନରେ ଅବହେଳା କାରଣରୁ ନିଆଁ ଲାଗିଥିବା କାରଣ ସାମ୍ନାକୁ ଆସିଛି । ସମସ୍ତ ଦିଗରୁ ତଦନ୍ତ ଜାରି ରହିଛି । ସେହି ଆଧାରରେ ଉକ୍ତ ଗ୍ୟାରେଜ ମାଲିକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ନେଇ ମଧ୍ୟ ଫାଏର ବ୍ରିଗେଡ ଉପନିର୍ଦ୍ଦେଶକ କହିଛନ୍ତି । 

ବ୍ୟୁରୋ ରିପୋର୍ଟ, ଇଟିଭି ଭାରତ