Manipur Women Paraded Naked: ରାଜଧାନୀରେ ଜଣେ ଅଭିଯୁକ୍ତ ଘର ଭାଙ୍ଗି ନିଆଁ ଲଗାଇଲେ ଉତ୍ତ୍ୟକ୍ତ ମହିଳା

ଇମ୍ଫାଲ: ସାରା ଦେଶକୁ ଲଜ୍ଜିତ କରିଛି ମଣିପୁରରେ ୨ ଆଦିବାସୀ ଯୁବତୀଙ୍କୁ ଦୁଷ୍କର୍ମ ପରେ ଉଲଗ୍ନ କରି ରାସ୍ତାରେ ବୁଲାଇବା ଘଟଣା । ଏହାକୁ ନେଇ ବିଭିନ୍ନ ମହଲରେ ଉଦବେଗ ପ୍ରକାଶ ପାଇଛି । ଏହି ଘଟଣାରେ ଅନେକ ଅଭିଯୁକ୍ତ ସାମିଲ ଥିବା ବେଳେ ପୋଲିସ ଏଯାବତ ୪ଜଣ ଅଭିଯୁକ୍ତଙ୍କୁ ଗିରଫ କରିଛି । ଏହି ଗିରଫ ଅଭିଯୁକ୍ତଙ୍କ ମଧ୍ୟରୁ ଜଣେ ଅଭିଯୁକ୍ତର ଘର ଭାଙ୍ଗିବା ସହ ନିଆଁ ଲଗାଇଛନ୍ତି ଉତ୍ତ୍ୟକ୍ତ ଲୋକେ । ଅନେକ ମହିଳା ଗୁରୁବାର ଅଭିଯୁକ୍ତର କଚ୍ଚା ଘରକୁ ବାଉଁଶ ସାହାଯ୍ୟରେ ଭାଙ୍ଗିବା ପରେ ଘରେ ନିଆଁ ଲଗାଇ ଦେଇଛନ୍ତି । ଯାହାର ଭିଡିଓ ଏବେ ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି । ସୂଚନା ଥାଉ କି ଗତ କିଛି ମାସ ଧରି ମଣିପୁରରେ ବାସ କରୁଥିବା କୁକି ଓ ମୈତେଇ ସମ୍ପ୍ରଦାୟଙ୍କ ମଧ୍ୟରେ ବିବାଦ ଲାଗି ରହିଛି । ଏହାରି ମଧ୍ୟରେ କିଛି ଯୁବକ ୨ ଆଦିବାସୀ ଯୁବତୀଙ୍କୁ ଦୁଷ୍କର୍ମ କରିବା ପରେ ରାସ୍ତାରେ ଉଲଗ୍ନ କରି ବୁଲାଇଥିବା ଦେଖିବାକୁ ମିଳିଥିଲା । ବୁଧବାର ଏହି ଭିଡିଓଟି ଖୁବ ଭାଇରାଲ ହେବା ପରେ ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ଯେଉଁମାନେ ଏଭଳି ଘୃଣ୍ୟ ଅପରାଧରେ ସମ୍ପୃକ୍ତ ତାଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଦେଶବାସୀଙ୍କୁ ପ୍ରତିଶୃତି ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।