କାରଗିଲ ବିଜୟ ଦିବସ ପାଇଁ ସେନାର ପ୍ରସ୍ତୁତି, ଅସ୍ତ୍ରଶସ୍ତ୍ର ପ୍ରଦର୍ଶନ କଲେ ଯବାନ

ଜମ୍ମୁ-କାଶ୍ମୀର: କାରଗିଲ ବିଜୟ ଦିବସ ପୂର୍ବରୁ ସେନା ପକ୍ଷରୁ ଅସ୍ତ୍ରଶସ୍ତ୍ର ପ୍ରଦର୍ଶନ କରାଯାଇଛି। ଆଉ ସପ୍ତାହକ ପରେ ଦେଶ ପାଳିବ କାରଗିଲ ବିଜୟ ଦିବସ । ଇତିହାସର ସେହି ବିଜୟର ଦିନକୁ ମନେ ପକାଇବା ପାଇଁ ପ୍ରତିବର୍ଷ ଜୁଲାଇ 26ତାରିଖରେ କାରଗିଲ ବିଜୟ ଦିବସ ପାଳନ କରାଯାଇଆସୁଛି । ତେବେ ଏହା ପୂର୍ବରୁ ଭାରତୀୟ ସେନା ପକ୍ଷରୁ ସମସ୍ତ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି । ଏହି ଅବସରରେ କାରଗିଲରେ 'ମେଡ ଇନ୍ ଇଣ୍ଡିଆ' ଅର୍ଥାତ୍ ଭାରତରେ ନିର୍ମିତ ଅସ୍ତ୍ରଶସ୍ତ୍ରର ପ୍ରଦର୍ଶନ କରିଛି ସେନା । ଯାହାକୁ ଦେଖିବା ପାଇଁ ସ୍ଥାନୀୟ ପୋଲିସ ଅଧୀକ୍ଷକଙ୍କ ସମେତ ଅନ୍ୟାନ୍ୟ ଅଧିକାରୀ, ସ୍କୁଲ ଛାତ୍ରଛାତ୍ରୀ ଏବଂ ଅଞ୍ଚଳବାସୀଙ୍କ ଭିଡ଼ ଜମିଥିଲା ।  
ଏହା ମଧ୍ୟ ପଢନ୍ତୁ...Passing Out Parade: ସେନା ଅଧିକାରୀ ହେଲେ ଟ୍ରକ୍ ଡ୍ରାଇଭରଙ୍କ ପୁଅ

୨୬ ମେ' ୧୯୯୯ ମସିହାରେ କାଶ୍ମୀରରେ ଭାରତର ସୀମା ଭିତରକୁ ପଶି ଆସିଥିବା ପାକିସ୍ତାନୀ ସୈନ୍ୟଙ୍କୁ ଘଉଡ଼ାଇବା ପାଇଁ ଆରମ୍ଭ ହୋଇଥିଲା ଅପରେସନ୍ ବିଜୟ । ଆକାଶମାର୍ଗରୁ ଆକ୍ରମଣ କରିଥିଲା ଭାରତୀୟ ବାୟୁସେନା । ଆଉ ତାପରେ ୬୦ ଦିନର ଘମାଘୋଟ ଯୁଦ୍ଧ ପରେ ବିଜୟ ହାସଲ କରିଥିଲା ଭାରତ । କାରଗିଲ, ଦ୍ରାସ ଓ ଅନ୍ୟ ସେକ୍ଟରରେ ବିଜୟର ତ୍ରିରଙ୍ଗା ଉଡିଥିଲା । ତେବେ ଏହି ଅପରେସନରେ ଶହୀଦ ହୋଇଥିଲେ ଦେଶର ୫୨୭ ଜଣ ଯବାନ ।