ଯାଜପୁରରେ ଶିକ୍ଷୟିତ୍ରୀଙ୍କୁ ହତ୍ୟା, ସ୍ଵାମୀ ଓ ଝିଅକୁ ହାଣିଲେ ଦୁର୍ବୃତ୍ତ

ଯାଜପୁର: ଧର୍ମଶାଳା ବ୍ଲକ ମିର୍ଜାପୁର ଗାଁରେ ଶିକ୍ଷୟିତ୍ରୀଙ୍କୁ ଗୋଡେଇ ଗୋଡେଇ ହାଣି ନିର୍ମମ ଭାବେ ହତ୍ୟା କରାଯାଇଛି । ସ୍ଵାମୀ ଓ ଝିଅଙ୍କୁ ମଧ୍ୟ ହାଣି ଦେଇଛନ୍ତି ଦୁର୍ବୃତ୍ତ । ତେବେ ଘଟଣାସ୍ଥଳରେ ହିଁ ଶିକ୍ଷୟିତ୍ରୀଙ୍କର ମୃତ୍ୟୁ ଘଟିଥିବାବେଳେ ତାଙ୍କ ସ୍ବାମୀ ଓ ଝିଅଙ୍କୁ ମୁର୍ମୁଷ ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରାଯାଇଛି । ଦୁହିଁଙ୍କୁ ପ୍ରଥମେ ଧର୍ମଶାଳା ସିଏଚସି ପ୍ରାଥମିକ ଚିକିତ୍ସାଳୟରେ ଭର୍ତ୍ତି କରାଯାଇଥିବାବେଳେ ପରେ କଟକ ଏସସିବିକୁ ସ୍ଥାନାନ୍ତର କରାଯାଇଛି । ସେପଟେ ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି । ମୃତ ଶିକ୍ଷୟିତ୍ରୀ ଜଣଙ୍କ ତରୁଲତା ବିଶ୍ବାଳ ହୋଇଥିବାବେଳେ ସେ ମିର୍ଜାପୁର ଅନନ୍ତ କୁମାରୀ ବାଳିକା ଉଚ୍ଚ ବିଦ୍ୟାଳୟର ଶିକ୍ଷୟିତ୍ରୀ ଭାବେ କାର୍ଯ୍ୟରତ ଥିଲେ ।