ହାଇଦ୍ରାବାଦ : ଆଜି ହେଉଛି ବିଶ୍ବ ହସ ଦିବସ । ପ୍ରତିବର୍ଷ ଅକ୍ଟୋବର ମାସର ପ୍ରଥମ ଶୁକ୍ରବାରକୁ ବିଶ୍ବ ହସ ଦିବସ ହିସାବରେ ପାଳନ କରାଯାଏ । ଲେକଙ୍କୁ ଜୀବନ ବଞ୍ଚିବା ପାଇଁ ହସର ମହତ୍ତ୍ବକୁ ବୁଝିବା ପାଇଁ ଆଜିର ଦିନ ପାଳନ କରାଯାଏ । ହସ... ସମ୍ପର୍କକୁ ଦିଏ ନୂଆ ପରିଚୟ । ବାସ୍ତବରେ ତମାମ ଅଧୁରାପଣ, ଦୁଃଖ, ଲୁହ, ଶୋକ, ମାନସିକ ଦୁଶ୍ଚିନ୍ତା, ସମସ୍ୟା, ଅଭାବ, ପ୍ରେମ, ଵିଚ୍ଛେଦ, ମୋହ ଆଉ ସ୍ପପ୍ନଭଂଗ ଭିତରେ ମଣିଷ ହସିବାକୁ ଭୁଲି ଯାଉଛି । କିନ୍ତୁ ହସ କାହାକୁ ବା ଭଲ ନଲାଗେ ? ଏଭଳି ପରିସ୍ଥିତିରେ ଲୋକଙ୍କ ଜୀବନରୁ ହଜିଯାଇଥିବା ହସକୁ ଫେରାଇ ଆଣିବା ଲକ୍ଷ୍ୟରେ 'ବିଶ୍ୱ ହସ ଦିବସ' ପାଳନ କରାଯାଏ ।
କେବେ ଆରମ୍ଭ ହୋଇଥିଲା ବିଶ୍ବ ହସ ଦିବସ: ବିଶ୍ବ ହସ ଦିବସର ଧାରଣା ପ୍ରଥମେ ହାର୍ଭେ ରସ୍ ବଲଙ୍କଠାରୁ ଆସିଥିଲା । 1963 ମସିହାରେ, ମାସାଚୁସେଟ୍ସ କଳାକାର ହାର୍ଭେ ବଲ୍ ଏକ ସ୍ମାଇଲ୍ ଗ୍ରାଫିକ୍ ଚିତ୍ର ପ୍ରସ୍ତୁତ କରିଥିଲେ । ଏହା ପରେ ହାସ୍ୟ ଦିବସ ପାଳନ କରିବା ନେଇ ତାଙ୍କ ମନକୁ ଆସିଥିଲା। ଏହାପରେ ସେ ବିଶ୍ବ ହସ ଦିବସ ପାଳନ କରିବା ନେଇ ପ୍ରସ୍ତାବ ଦେଇଥିଲେ। 1999ରେ, ସେ ଘୋଷଣା କରିଥିଲେ ଯେ, ଅକ୍ଟୋବରର ପ୍ରଥମ ଶୁକ୍ରବାର ବିଶ୍ୱ ହସ ଦିବସ ଭାବରେ ପାଳନ କରାଯିବ । 2001ରେ ହାର୍ଭେଙ୍କ ମୃତ୍ୟୁ ପରେ ହାର୍ଭେ ବଲ୍ ୱାର୍ଲ୍ଡ ସ୍ମାଇଲ୍ ଫାଉଣ୍ଡେସନ୍ ତାଙ୍କ ନାମରେ ନାମିତ ହେଲା । ତାଙ୍କ ସ୍ମୃତିରେ ପ୍ରତିବର୍ଷ ବିଶ୍ୱ ହସ ଦିବସ ପାଳନ କରାଯାଏ ।
ବିଶ୍ବ ହସ ଦିବସର ଉଦ୍ଦେଶ୍ୟ: ବ୍ୟସ୍ତବହୁଳ ଜୀବନ ଭିତରେ ବର୍ଷର ଗୋଟିଏ ଦିନ ଲୋକଙ୍କୁ ହସିବା ପାଇଁ କହିବା ସହିତ ମନୋବଳକୁ ସୁଦୃଢ କରିବା ପାଇଁ ଉତ୍ସାହିତ କରିବା ହସ ଦିବସ ପାଳନ କରିବାର ମୁଖ୍ୟ ଉଦ୍ଦେଶ୍ୟ । କାରଣ ହସିବା ଦ୍ବାରା ଚାପର ପରିମାଣ କମିଯାଇଥାଏ । କଠିନ ପରିସ୍ଥିତିରେ ଛୋଟିଆ ହସ ହିଁ ଅନେକ ଚାପ ହ୍ରାସ କରିବାରେ ସାହାଯ୍ୟ କରିଥାଏ ଏବଂ କଠିନ ପରିସ୍ଥିତିକୁ ସାମ୍ନା କରିବା ପାଇଁ ଶକ୍ତି ପ୍ରଦାନ କରିଥାଏ । ଏହା ବ୍ୟତୀତ ହସ ମନୁଷ୍ୟର ଚେହେରାର ସୌନ୍ଦର୍ଯ୍ୟକୁ ମଧ୍ୟ ଦ୍ବିଗୁଣିତ କରିବା ସହିତ ପେଟର ଚର୍ବିକୁ ମଧ୍ୟ ହ୍ରାସ କରିବାରେ ସାହାଯ୍ୟ କରିଥାଏ । ତେବେ ସ୍ବାସ୍ଥ୍ୟ ବିଶେଷଜ୍ଞଙ୍କ କହିବା ଅନୁସାରେ, ହସିବା କେବଳ ଚାପକୁ ହ୍ରାସ କରେ ନାହିଁ ବରଂ ଜୀବନକାଳକୁ ମଧ୍ୟ ବୃଦ୍ଧି କରିଥାଏ । ତେଣୁ ହସିବା ସମସ୍ତଙ୍କ ପାଇଁ ଲାଭଦାୟକ ଅଟେ ।
ଏହା ମଧ୍ୟ ପଢନ୍ତୁ: ହସିବା ଦ୍ବାରା ଶରୀର ଉପରେ କେଉଁ ପ୍ରଭାବ ପଡ଼େ, ଏହା କହୁଛି ରିସର୍ଚ୍ଚ
ବିଶ୍ବ ହସ ଦିବସର ଥିମ: ପ୍ରତ୍ୟେକ ବର୍ଷ ଏକ ଥିମରେ ବିଶ୍ବ ହସ ଦିବସ ପାଳନ କରାଯାଇଥାଏ । ଚଳିତବର୍ଷର ଥିମ ରହିଛି(Universal Expression Of Happiness) । ଖୁସିର ସାର୍ବଭୌମିକ ଅଭିବ୍ୟକ୍ତି । ଅର୍ଥାତ ହସ ପାଇଁ ଦିନଟିଏ ।
ବିଶ୍ବରେ ଭିନ୍ନଭିନ୍ନ ତରିକାରେ ବିଶ୍ବ ହସ ଦିବସ ପାଳନ କରାଯାଏ । ଯେପରିକି
- ବିଦ୍ୟାଳୟରେ ପିଲାମାନଙ୍କ କ୍ଷେତ୍ରରେ ଚିତ୍ରାଙ୍କନ ଏବଂ କଳା ପ୍ରତିଯୋଗିତା ଆୟୋଜନ କରି 'ବିଶ୍ୱ ହସ ଦିବସ' ବିଷୟବସ୍ତୁକୁ ପ୍ରତିଫଳିତ କରିବା ।
- ଗରିବ ପିଲାମାନଙ୍କୁ ମାଗଣା ଖାଦ୍ୟ ଦେବା ଏବଂ ସେମାନଙ୍କ ପାଇଁ ପୋଷାକ କିଣି ବା। ଏହିପରି କାର୍ଯ୍ୟକଳାପ ଦ୍ବାରା ସେମାନଙ୍କ ମୁହଁରେ ହସ ଆଣିବା ସମ୍ଭବପର ହୋଇପାରିବ ।
- ଦିନ ମଜୁରିଆଙ୍କ ନିକଟକୁ ଯାଇ ମଜାଳିଆ ଖେଳର ଆୟୋଜନ କରିପାରିବେ । କିମ୍ବା କାମରୁ ଗୋଟିଏ ଦିନ ଛୁଟି ଦେବା ଦ୍ବାରା ସେମାନଙ୍କ ମୁହଁରେ ହସ ଆଣିବା ସମ୍ଭବ ହୋଇପାରିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
