ହାଇଦ୍ରାବାଦ: କୀଟ-ପତଙ୍ଗ, ପଶୁ-ପ୍ରାଣୀଙ୍କ ପ୍ରତି ଦୟା ପ୍ରଦର୍ଶନର ଭାବ ଥିବାରୁ ମଣିଷକୁ ଶ୍ରେଷ୍ଠ ପ୍ରାଣୀର ଆଖ୍ୟା ଦିଆଯାଇଛି । ଜାତି, ବର୍ଣ୍ଣ, ଧର୍ମ ନିର୍ବିଶେଷରେ ବିଶ୍ବକୁ ଏକତାର ବନ୍ଧନରେ ବାନ୍ଧି ରଖିବାକୁ ହେଲେ ଦୟା ହିଁ ଏକମାତ୍ର ମୁଖ୍ୟ ଅସ୍ତ୍ର । ମାତ୍ର ବର୍ତ୍ତମାନ ସମୟରେ ଏହି ଶ୍ରେଷ୍ଠ ପ୍ରାଣୀ ମନୁଷ୍ୟଠାରୁ ଦୟାର ଭାବ ଯେପରି ଉଭେଇ ଯାଉଛି ! ଯାହାର ସଦ୍ୟତମ ଉଦାହରଣ ଋଷ-ୟୁକ୍ରେନ ଯୁଦ୍ଧ । ସାମାନ୍ୟତମ ସ୍ବାର୍ଥ ପାଇଁ ହଜାର ହଜାର ଜନ ସାଧାରଣ, ସୈନ୍ୟଙ୍କ ସମେତ ପଶୁ-ପକ୍ଷୀଙ୍କ ଜୀବନ ଚାଲିଗଲାଣି, ତଥାପି ଯୁଦ୍ଧ ଥମୁନି ।
ସେଥିପାଇଁ ପ୍ରତିଟି ବ୍ୟକ୍ତିଙ୍କ ମନରେ ଦୟାର ଭାବ ଜାଗ୍ରତ କରିବା ସହ ବିଶ୍ବକୁ ଶାନ୍ତି ପ୍ରଦାନ କରିବା ଉଦ୍ଦେଶ୍ୟରେ ପ୍ରତିବର୍ଷ ଆଜିର ଦିନକୁ ବିଶ୍ବ କାଇଣ୍ଡ୍ନେସ୍ ଡେ' ବା ବିଶ୍ବ ଦୟା ଦିବସ ଭାବେ ପାଳନ କରାଯାଉଛି(World Kindness Day) । ଦୟାର ଶକ୍ତି କିପରି ସୁସମାଜ ଗଠନ କ୍ଷେତ୍ରରେ ପ୍ରଭାବ ପକାଏ ସେ' ବାବଦରେ ଜାଗରଣ ସୃଷ୍ଟି କରିବା ହିଁ ଏହି ଦିବସ ପାଳନ ପଛର ଉଦ୍ଦେଶ୍ୟ । ଯଦିଓ ଏହି ଦିନ ମିଳିତ ଜାତିସଂଘ ଦ୍ୱାରା ସ୍ୱୀକୃତିପ୍ରାପ୍ତ ହୋଇନାହିଁ, ତଥାପି ଏହା ସାରା ବିଶ୍ୱରେ ପାଳନ କରାଯାଏ । ବିଶ୍ୱ ଦୟା ଦିବସ ହେଉଛି ସମସ୍ତ ଦୟାଳୁ ହୃଦୟର ଏକ ଉତ୍ସବ, ଯେଉଁମାନେ ଅଭାବୀ ଲୋକଙ୍କୁ ସାହାଯ୍ୟ କରିବାକୁ ବାଟ ଆଗେଇ ଆସିଥାନ୍ତି ।
ଏହି ଦିବସରେ ବିଦ୍ୟାଳୟ, କର୍ମକ୍ଷେତ୍ର, କଲେଜ ଏବଂ ସର୍ବସାଧାରଣ ସ୍ଥାନରେ ବିଶ୍ୱ ଦୟା ଦିବସ ପାଳନକୁ ଉତ୍ସାହିତ କରାଯାଏ । ବିଶ୍ୱ ଦୟା ଦିବସ ହେଉଛି ଏକ ବିଶ୍ୱସ୍ତରୀୟ ପର୍ଯ୍ୟବେକ୍ଷଣ, ଯାହା ଏକ ବିଶ୍ୱ ସମୁଦାୟ ଭାବରେ ଶାନ୍ତିପୂର୍ଣ୍ଣ ଭାବେ ଆଗକୁ ବଢିବା ପାଇଁ ପରସ୍ପର ପ୍ରତି ଦୟାଳୁ ହେବା ଆବଶ୍ୟକତାକୁ ଗୁରୁତ୍ୱ ଦେଇଥାଏ । ନାଇଜେରିଆ, କାନାଡା, ଅଷ୍ଟ୍ରେଲିଆ, ଇଟାଲୀ, ୟୁଏଇ, ବ୍ରିଟେନ ଏବଂ ଆମ ଦେଶ ଭାରତ ଭଳି ଦେଶରେ ଏହି ଦିନ ପାଳନ କରାଯାଏ ।
ଚଳିତ ବର୍ଷ "Be Kind Whenever Possible" ଅର୍ଥାତ୍ ଯେତେ ସମ୍ଭବ ଦୟାଳୁ ହୁଅନ୍ତୁ ବିଷୟବସ୍ତ ମାଧ୍ୟମରେ ଏହି ଦିବସ ପାଳନ କରାଯାଉଛି ।
ବିଶ୍ୱ ଦୟା ଦିବସର ଇତିହାସ(History of World Kindness Day):-
ବିଶ୍ୱର ପ୍ରାୟ 27 ଟି ଦେଶ ବହୁତ ଉତ୍ସାହର ସହିତ ବିଶ୍ୱ ଦୟା ଦିବସ ପାଳନ କରନ୍ତି । ପ୍ରତିବର୍ଷ ଅଧିକରୁ ଅଧିକ ଦେଶ ଏହି ଦିନର ଉତ୍ସବରେ ଅଂଶଗ୍ରହଣ କରନ୍ତି । ବିଶ୍ୱ ଦୟା ଦିବସର ଇତିହାସ ବାବଦରେ ନିମ୍ନରେ ବର୍ଣ୍ଣନା କରାଯାଇଛି...
- ଦୟା ଦିବସର ଧାରଣା ପ୍ରଥମେ 1998 ରେ ଟୋକିଓ ସମ୍ମିଳନୀରେ ଉପସ୍ଥାପିତ ହୋଇଥିଲା ।
- ଏହା ବର୍ତ୍ତମାନ ଏକ ବିଶ୍ବବ୍ୟାପୀ ଉତ୍ସବରେ ପରିଣତ ହୋଇଛି, ଯାହା ସମସ୍ତଙ୍କୁ ମନେ ପକାଇଥାଏ ଯେ, ଏକ ଦୟାଳୁ ମନବୃତ୍ତି କିପରି ବିଶ୍ବକୁ ଏକଜୁଟ କରିପାରେ ।
- ବିଶ୍ୱ ଦୟାଳୁ ଅଭିଯାନ ବିଭିନ୍ନ ଦେଶରୁ ଅନେକ ଛୋଟ ସଂଗଠନକୁ ଏକାଠି କରିଛି ।
- ସମ୍ପ୍ରତି 27 ରୁ ଅଧିକ ଦେଶ ବିଶ୍ୱ ଦୟାଳୁ ଅଭିଯାନରେ ଭାଗ ନେଇଛନ୍ତି । ଏଥିରେ ଭାରତ, କାନାଡା, ବ୍ରାଜିଲ, ଆମେରିକା, ଜାପାନ, ଅଷ୍ଟ୍ରେଲିଆ, ସଂଯୁକ୍ତ ଆରବ ଏମିରେଟ୍ସ ଏବଂ ଇଟାଲୀ ଅନ୍ତର୍ଭୁକ୍ତ ।
