ୱାଶିଂଟନ୍: ଶୀତଦିନ ଆରମ୍ଭ ହେବା ମାତ୍ରେ ଏକ ପ୍ରକାର ଆନନ୍ଦ ଉଲ୍ଲାସ ଖେଳିଯାଏ, କାରଣ ଶୀତଋତୁ ସାଙ୍ଗକୁ ପାର୍ବଣ ଋତୁ ଆରମ୍ଭ ହୁଏ ଏବଂ ବର୍ଷର ଶେଷକୁ ଉପଭୋଗ କରିବା ପାଇଁ ବିଭିନ୍ନ ପ୍ଲାନିଂ ହୋଇଥାଏ । କିନ୍ତୁ ଶିତଋତୁରେ ଏକ ପ୍ରମୁଖ ଖରାପ ଦିଗ ହେଉଛି, ଏହି ସମୟରେ ସ୍ବାସ୍ଥ୍ୟ ଏବଂ ଚର୍ମଜନିତ ସମସ୍ୟା ଅଧିକ ଦେଖାଯାଇଥାଏ । ଥଣ୍ଡା, ଜ୍ବର, କାଶଠୁ ଆରମ୍ଭ କରି ଚର୍ମ ଫାଟିବା ଇଦ୍ୟାଦି ସମସ୍ୟା ଶୀତଦିନ ସରିବା ଯାଏଁ ଲାଗିରହିଥାଏ ।
ସବୁ ପରେବି ଯଦି ଦୃଢ ପ୍ରତିରକ୍ଷା ପ୍ରଣାଳୀ ଥିବ, ତେବେ ନିଶ୍ଚିତ ରୂପେ ଶୀତଦିନରେ ସୃଷ୍ଟି ହେଉଥିବା ରୋଗ ସମସ୍ୟାକୁ ରୋକାଯାଇ ପାରିବ । ତେବେ ପ୍ରତିରକ୍ଷା ପ୍ରଣାଳୀକୁ ପ୍ରଥମେ ଦୃଢ କରିବା ଉଚିତ୍ । ଏଥିପାଇଁ କେବଳ ଯେ, ମେଡିସିନ୍ ବ୍ୟବହାର କରାଯିବ ତାହା ନୁହେଁ, ଘରୋଇ ଉପାୟରେ, ଜୀବନଶୈଳୀରେ ପରିବର୍ତ୍ତନ ଏବଂ ଆୟୁର୍ବେଦ ଉପଚାର ମାଧ୍ୟମରେ ଇମ୍ୟୁନିଟି ବୃଦ୍ଧି କରାଯାଇପାରିବ । କେଉଁ ଖାଦ୍ୟ ଖାଇବା ଦ୍ବାରା ଇମ୍ୟୁନିଟି ବୃଦ୍ଧି ପାଇଥାଏ ସେ ବାବଦରେ ନିମ୍ନରେ ବର୍ଣ୍ଣନା କରାଯାଇଛି...
Sweet Potato(କନ୍ଦମୂଳ):-
କନ୍ଦମୂଳରେ ଭିଟାମିନ୍ ଏ, ପୋଟାସିୟମ୍ ଏବଂ ଅନ୍ୟାନ୍ୟ ପୋଷକ ତତ୍ତ୍ୱ ରହିଥାଏ, ଯାହା ପ୍ରତିରକ୍ଷା ପ୍ରଣାଳୀକୁ ଦୃଢ କରିବାରେ ସାହାଯ୍ୟ କରିଥାଏ । ଏଥିରେ ଅନ୍ୟାନ୍ୟ ପୋଷକ ତତ୍ତ୍ୱରେ ମଧ୍ୟ ଭରପୂର ଥାଏ, ଯେପରିକି ବିଟା-କାରୋଟିନ୍ ଏବଂ ଭିଟାମିନ୍-ସି ଇତ୍ୟାଦି । କନ୍ଦମୂଳ ଖାଇବା ଦ୍ୱାରା ପ୍ରଦାହ ଏବଂ କୋଷ୍ଠକାଠିନ୍ୟକୁ ନିୟନ୍ତ୍ରଣ କରାଯାଇପାରିବ । ଏହାକୁ ସିଝା କିମ୍ବା ସିଧା କଞ୍ଚା ଖାଇପାରିବେ । ଏପରିକି ସାଲାଡ୍ରେ ମଧ୍ୟ ମିଶାଇ ଖାଇପାରିବେ ।
ଚୀନା ବାଦାମ(Groundnut)
ପିନଟ୍ ଅର୍ଥାତ୍ ବାଦାମକୁ ଗ୍ରାଉଣ୍ଡନାଟ୍ ମଧ୍ୟ କୁହାଯାଏ । ଏଥିରେ ପ୍ରୋଟିନ୍, ସୁସ୍ଥ ଚର୍ବି ଏବଂ ଅନ୍ୟାନ୍ୟ ମାଇକ୍ରୋ ଏବଂ ମାକ୍ରୋନ୍ୟୁଟ୍ରିଏଣ୍ଟ୍ର ଭରପୂର ଥାଏ, ଯାହା ଶରୀରକୁ ଉଷ୍ମ ରଖେ ଏବଂ ଆମକୁ ରୋଗରୁ ରକ୍ଷା କରିଥାଏ ।
ଚୱନପ୍ରାଶ(Chyawanprash)
ଚୱନପ୍ରାଶରେ ଥାଏ 20 ରୁ 40 ଆୟୁର୍ବେଦିକ ଉପାଦାନ ଏବଂ ଏହା ରୋଗ ପ୍ରତିରୋଧକ ଶକ୍ତି ବଢାଇବାର ଗୁଣ ଥାଏ । ସ୍ମୃତି ଶକ୍ତି ବଢାଇବା, ରକ୍ତ ସଫା କରିବା, ଋତୁକାଳୀନ ରୋଗକୁ ରୋକିବା ଏବଂ ହଜମକୁ ପ୍ରୋତ୍ସାହିତ କରିବାର କ୍ଷମତା ପାଇଁ ଚୱନପ୍ରାଶ ବେଶ୍ ଜଣାଶୁଣା । ତେଣୁ, ବିଭିନ୍ନ ସ୍ତରରେ ରୋଗ ପ୍ରତିରୋଧକ ଶକ୍ତି ବଢାଇବା ପାଇଁ ଭୋଜନ ପରେ ଏକ ଚାମଚ ଚୱନପ୍ରାଶ ଗ୍ରହଣ କରନ୍ତୁ ।
ଗୁଡ(Jaggery):-
ଏଥିରେ ଆଇରନ୍ ଏବଂ ମିନେରାଲ୍ସ ଭରପୂର ଥାଏ । ଏହାକୁ ଶୀତଋତୁରେ ଖାଇବା ଦ୍ବାରା ଶରୀରରେ ରକ୍ତ ପ୍ରବାହ ବୃଦ୍ଧି ସହ ଶରୀର ଉଷ୍ମ ରହିଥାଏ । କିନ୍ତୁ ଅତ୍ୟଧିକ ଗୁଡ ଖାଇବା ଦ୍ବାରା ଶର୍କରା ବୃଦ୍ଧିଜନିତ ସମସ୍ୟା ହୋଇପାରେ, ତେଣୁ ଏହାକୁ ପ୍ରତିଦିନ କମ୍ ପରିମାଣରେ ଖାଇବା ଉଚିତ୍ ।
ଅଁଳା:-
ଭିଟାମିନ୍-ସି ର ଅଁଳା ହେଉଛି ସର୍ବୋତ୍ତମ ଉତ୍ସ, ଯାହା ରୋଗ ପ୍ରତିରୋଧକ ଶକ୍ତି ବଢାଇବାରେ ସାହାଯ୍ୟ କରେ । ଚର୍ମ ସମସ୍ୟା ହ୍ରାସ କରିବା ଏବଂ କେଶ ଝଡିବା ବନ୍ଦ କରିବା ସହିତ ଏହା ମାନସିକ ସ୍ତରରେ ଉନ୍ନତି ଆଣିବା ପାଇଁ ମଧ୍ୟ ଜଣାଶୁଣା । ତେଣୁ ଶୀତଦିନେ ପ୍ରତିଦିନ ଗୋଟିଏ ଅଁଳା ଖାଇବା ଲାଭଦାୟକ ହେବ ।
Disclaimer: ଉପରିସ୍ଥ ସମସ୍ତ ବିବରଣୀ କେବଳ ସାଧାରଣ ପରାମର୍ଶ ନିମନ୍ତେ । ଜଟିଳ ରୋଗ ସମସ୍ୟା ପାଇଁ ସର୍ବଦା ଡାକ୍ତରଙ୍କ ପରାମର୍ଶ ଗ୍ରହଣୀୟ ।
