ହାଇଦ୍ରାବାଦ: ପୁରାତନ ଧାତୁ ଭାବେ ଜଣା ଯାଉଥିବା ତମ୍ବାକୁ ପିନ୍ଧିବା ପାଇଁ ପୂର୍ବଜ ତଥା ଘରର ବଡମାନେ ସବୁବେଳେ ପରାମର୍ଶ ଦେଇଥାଆନ୍ତି । ଏହା ନା ଯେ କେବଳ ଶରୀର ସୁସ୍ଥ ରଖିବାରେ ସାହାଯ୍ୟ କରେ ବରଂ ଏହା ଶରୀରକୁ କେତେକ ଜରୁରୀ ପୋଷକ ତତ୍ତ୍ବ ଯୋଗାଇବାରେ ମଧ୍ୟ ସାହାଯ୍ୟ କରେ । ଏହା ଶରୀରର ରୋଗ ପ୍ରତିରୋଧକ ଶକ୍ତି ବଢାଇବାରେ ମଧ୍ୟ ସାହାଯ୍ୟ କରେ ଓ ଶରୀରରେ ସକାରାତ୍ମକ ଶକ୍ତି ସୃଷ୍ଟି କରେ ।
ଏଥିରେ ଥିବା ଆଣ୍ଟିବ୍ୟାକ୍ଟେରିଆଲ ଓ ଆଣ୍ଟିମାଇକ୍ରୋବିଆଲ ଗୁଣ ଶରୀର ପାଇଁ ଅତି ଜରୁରୀ ତତ୍ତ୍ବ । କାଜୁ, ଡ୍ରାଏ ଫ୍ରୁଟ, ଗୋଲମରିଚ ଓ ଇଷ୍ଟରେ ମଧ୍ୟ ଏହି ପୋଷକ ତତ୍ତ୍ବ ମହଜୁଦ ରହିଛି । ଏହା କେବଳ ଖାଇବା ଦ୍ବାରା ନୁହେଁ ବରଂ ପିନ୍ଧିବା ଦ୍ବାରା ମଧ୍ୟ ଶରୀରକୁ ଏହାର ସକାରାତ୍ମକ ପ୍ରଭାବ ମିଳିଥାଏ । ଏହା ପିନ୍ଧିବା ଦ୍ବାରା ଏହାର ସକାରାତ୍ମକ ପ୍ରଭାବ ଶରୀର ସମେତ ମନ ଉପରେ ମଧ୍ୟ ପଡିଥାଏ । ଏହାକୁ ଚାହିଁଲେ ଆପଣ ବ୍ରେସଲେଟ କିମ୍ବା ମୁଦି ଆକାରରେ ପିନ୍ଧି ପାରିବେ ।
ତମ୍ବାର ଶରୀର ଉପରେ ରହିଥିବା ସକାରାତ୍ମକ ପ୍ରଭାବ:
ରୋଗପ୍ରତିରୋଧକ ଶକ୍ତି:
ଏହା ରକ୍ତ ଶୁଦ୍ଧ କରିବା ସହ ରକ୍ତ ସଞ୍ଚାଳନକୁ ନିୟନ୍ତ୍ରିତ କରିବାରେ ସାହାଯ୍ୟ କରେ । ଏହା ଶରୀର ଉପରେ ଅନ୍ୟ ଧାତୁର ନକାରାତ୍ମକ ପ୍ରଭାବ ମଧ୍ୟ ପକାଇବାକୁ ଦିଏ ନାହିଁ ।
ହୃତପିଣ୍ଡର କାର୍ଯ୍ୟକାରିତା ବଢାଏ:
ଏହା ହୃତପିଣ୍ଡ ସୁସ୍ଥ ରଖିବା ସହ ରକ୍ତଚାପ ନିୟନ୍ତ୍ରଣରେ ସାହାଯ୍ୟ କରିଥାଏ । ତେଣୁ ରକ୍ତଚାପ ଜନିତ ସମସ୍ୟା ଥିଲେ ଏହି ଧାତୁ ଶରୀର ପାଇଁ ଉପାଦେୟ ସାବ୍ୟସ୍ତ ହୋଇପାରେ ।
ହୃତପିଣ୍ଡରେ ରକ୍ତ ନଳୀକୁ ସୁସ୍ଥ ରଖେ:
ଏହା ହୃତପିଣ୍ଡରେ ଥିବା କୋଲାଜେନ, ଇଲାଷ୍ଟିନ ଓ ଫାଇବରର କ୍ଷମତା ବୃଦ୍ଧି ସହ ଶରୀରରେ ରକ୍ତ ନଳୀକାକୁ ସୁସ୍ଥ ରଖିବାରେ ସାହାଯ୍ୟ କରେ ।
ହାଡ ଶକ୍ତ କରେ:
ଏହା ଗଣ୍ଠି ଦରଜ ଦୂର କରିବା ସହ ହାଡ ଶକ୍ତ କରିବାରେ ସାହାଯ୍ୟ କରିଥାଏ । କେବଳ ସେତିକି ହାଡ ଜନିତ ବିଭିନ୍ନ ରୋଗରୁ ମଧ୍ୟ ଏହା ଉପଶମ ଦେଇଥାଏ ।
ଆଣ୍ଟି ଏଜିଂ ପ୍ରଭାବ:
ଏହା ଶରୀର ଉପରେ ବାର୍ଦ୍ଧକ୍ୟର ପ୍ରଭାବ କମାଇଥାଏ । ଶରୀରରେ ଇଲାଷ୍ଟିକର ସାନ୍ଦ୍ରତା ବୃଦ୍ଧି ସହ କୋଲାଜେନ ବା ଚର୍ମ ଓ କେଶକୁ ସୁସ୍ଥ ରଖିବାରେ ସାହାଯ୍ୟ କରେ ।
ଆଧ୍ୟାତ୍ମିକ ଓ ଜ୍ୟୋତିର୍ବିଦ ବିଶ୍ବାସ:
ଏହା ଆଖପାଖରେ ଥିବା ନକାରାତ୍ମକ ଶକ୍ତିକୁ ଦୂର କରିବାରେ ସାହାଯ୍ୟ କରେ । ରାଗ ଓ ଚିନ୍ତା ଆଦି ଦୂର କରିବାରେ ଏହା ସାହାଯ୍ୟ କରେ । ଏହାର ଶରୀର, ମନ ଓ ମସ୍ତିଷ୍କ ଉପରେ ଆଧ୍ୟାତ୍ମିକ ପ୍ରଭାବ ରହିଛି । ତେଣୁ ଏକ ତମ୍ବା ମୁଦି ପିନ୍ଧିବା ଦ୍ବାର ଆପଣଙ୍କ ବ୍ୟକ୍ତିତ୍ବରେ ମଧ୍ୟ ବିକାଶ ହୋଇଥାଏ ।
ଏସବୁ ବ୍ୟତୀତ ନିକଟରେ ୟୁନିଭର୍ସିଟି ଅଫ ସାଉଥମ୍ପଟନରେ ହୋଇଥିବା ଏକ ଅଧ୍ୟୟନ ଅନୁଯାୟୀ ଏହା ଶ୍ବାସକ୍ରିୟା ଜନିତ ଭୂତାଣୁ ସଂକ୍ରମଣରୁ ରକ୍ଷା ଦେଇଥାଏ । ଅନ୍ୟ ଶବ୍ଦରେ କହିବାକୁ ଗଲେ ସାର୍ସ ଓ ମର୍ସଜନିତ ଭୂତାଣୁ ସଂକ୍ରମଣରୁ ମଧ୍ୟ ଏହା ରକ୍ଷା ଦେଇପାରେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
