ହାଇଦ୍ରାବାଦ: କିଡନୀ ବା ବୃକକ ଶରୀରରୁ ବର୍ଜ୍ୟବସ୍ତୁ ଏବଂ ଅତ୍ୟଧିକ ତରଳ ପଦାର୍ଥ ନିଷ୍କାସନ କରି ଶାରୀରିକ ପ୍ରକ୍ରିୟାକୁ ସୁସ୍ଥ ରଖିବାରେ ବେଶ୍ ସହାୟକ ହୋଇଥାଏ । କିଡନୀ ଶରୀରରେ ଲବଣ, ଜଳ ଏବଂ ଅନ୍ୟାନ୍ୟ ରାସାୟନିକ ପଦାର୍ଥର ସ୍ତରକୁ ମଧ୍ୟ ସଜାଡି ହରମୋନାଲ ସନ୍ତୁଳନ ନିୟନ୍ତ୍ରଣ କରିବାରେ ସାହାଯ୍ୟ କରେ । ମାତ୍ର କିଡନୀ କାର୍ଯ୍ୟ ଠିକ୍ରେ ପରିଚାଳନା ହୋଇନପାରିଲେ ନାନା ରୋଗ ସୃଷ୍ଟି ହୋଥାଏ । ସେଥିମଧ୍ୟରୁ ପଲିସିଷ୍ଟିକ କିଡନୀ ରୋଗ(Polycystic kidney disease) ଅନ୍ୟତମ । ତେବେ ଏହି ରୋଗ କଣ, କାହିଁକି ହୁଏ ଏବଂ ଏହାର ଲକ୍ଷଣ ବାବଦରେ ଜାଣନ୍ତୁ ।
ପଲିସିଷ୍ଟିକ କିଡନୀ ରୋଗ ଏକ ଅନୁବଂଶିକ ରୋଗ, ଯାହା ବୃକ୍କ ମଧ୍ୟରେ ଅନେକ ସିଷ୍ଟ୍ ସୃଷ୍ଟି କରିଥାଏ । ଏହାକୁ ପିକେଡି(PKD) ମଧ୍ୟ କୁହାଯାଏ । ଏହି ରୋଗ ଜନ୍ମ ପୂର୍ବରୁ, ବାଲ୍ୟକାଳରେ କିମ୍ବା ବୟସ୍କ ଅବସ୍ଥାରେ ସୃଷ୍ଟି ହୋଇପାରେ । ଜନ୍ମ ପୂର୍ବରୁ ସୃଷ୍ଟି ହୋଇଥିଲେ ଶାରୀରିକ ବିକାଶ ବାଧାପ୍ରାପ୍ତ ହୁଏ କିମ୍ବା ଶ୍ୱାସକ୍ରିୟାରେ ସମସ୍ୟା ସୃଷ୍ଟି ହୋଇପାରେ । ଅନ୍ୟଥା ଉଦର ପାର୍ଶ୍ୱ ଯନ୍ତ୍ରଣା, ୟୁରିନରେ ରକ୍ତ ପଡିବା ଏବଂ ମୁଣ୍ଡ ବିନ୍ଧା ଆଦି ଲକ୍ଷଣଗୁଡ଼ିକ ଦେଖାଯାଇପାରେ । ରୋଗ ଜଟିଳ ହେଲେ କିଡନୀ ଫେଲ୍, ଉଚ୍ଚ ରକ୍ତଚାପ, ଲିଭର୍ ସିଷ୍ଟ୍, ଏବଂ ସେରେବ୍ରାଲ ଆନିଉରିଜିମ ହୋଇପାରେ ।
କାରଣ:-
ଜେନେଟିକ ମ୍ୟୁଟେସନ ଫଳରେ ଏହା ଘଟିଥାଏ । ସାଧାରଣତଃ ଏହା ପିତାମାତାଙ୍କଠାରୁ ଆସିଥାଏ, କିମ୍ବା ଅନ୍ୟକେହି ପରିବାର ସଦସ୍ୟ ଏହି ରୋଗରେ ପୀଡିତ ଥିଲେ ଏହା ହୋଇଥାଏ । କ୍ବଚିତ ପ୍ରାଥମିକ ବିକାଶ ସମୟରେ ମଧ୍ୟ ଏହା ସୃଷ୍ଟି ହୋଇପାରେ । ଅଣ-କାର୍ଯ୍ୟକ୍ଷମ ଟ୍ୟୁବୁଲ ଭିତରକୁ ତରଳ ପଦାର୍ଥ ପମ୍ପ ହୋଇଗଲେ ଏହି ସିଷ୍ଟ୍ ସୃଷ୍ଟି ହୋଇଥାଏ ।
ପ୍ରକାର:-
ଦୁଇ ପ୍ରକାର ପଲିସିଷ୍ଟିକ୍ କିଡନୀ ରୋଗ ଥାଏ ଯଥା:- ଅଟୋସୋମାଲ ଡୋମିନାଣ୍ଟ ଏଡିପିକେଡି (ADPKD) ପଲିସିଷ୍ଟିକ କିଡନୀ ଡିଜିଜ୍ ଓ ଅଟୋସୋମାଲ ରିସିସିଭ ପଲିସିଷ୍ଟିକ କିଡନୀ ଡିଜିଜ୍/ ଏଆରପିକେଡି (ARPKD) । ମେଡିକାଲ ଇମେଜିଙ୍ଗ ବା ଜେନେଟିକ ପରୀକ୍ଷା ସାହାଯ୍ୟରେ ଏହି ରୋଗ ନିର୍ଣ୍ଣୟ କରାଯାଏ ।
ଏହି ରୋଗ ଆରୋଗ୍ୟ ସାଧ୍ୟ ନୁହେଁ । ଏହାର ଚିକିତ୍ସାରେ ଜୀବନଶୈଳୀରେ ପରିବର୍ତ୍ତନ ଓ ଉଚ୍ଚ ରକ୍ତଚାପ କମ୍ କରିବା ପାଇଁ ଏସିଇ ଇନହିବିଟର ଭଳି ଔଷଧ ଦିଆଯାଏ । କିଡନୀ ଫେଲ୍ ପାଇଁ ଡାଏଲିସିସ ବା ବୃକ୍କ ପ୍ରତିରୋପଣ(kidney transplant) କରାଯାଇପାରେ । ଏଆରପିକେଡି ଥିବା ଲୋକଙ୍କ ମଧ୍ୟରୁ ପ୍ରାୟ ୩୦% ରୋଗୀଙ୍କର ଜୀବନର ପ୍ରଥମ କିଛି ସପ୍ତାହ ମଧ୍ୟରେ ମୃତ୍ୟୁ ହୁଏ । ଏଡିପିକେଡି ରୋଗୀଙ୍କ ମଧ୍ୟରୁ ପ୍ରାୟ ଅର୍ଦ୍ଧେକ ରୋଗୀଙ୍କର ୭୦ ବର୍ଷ ବୟସ ସୁଦ୍ଧା କିଡନୀ ଫେଲ୍ ସୃଷ୍ଟି ହୋଇଥାଏ ।
ଯୁକ୍ତରାଷ୍ଟ୍ରର ପ୍ରାୟ ଅଧ ନିୟୁତ ଲୋକଙ୍କୁ ପିକେଡି ପ୍ରଭାବିତ କରିଥାଏ । ଏଡିପିକେଡି ରୋଗ ପ୍ରାୟ ୭୦୦ ଲୋକଙ୍କ ମଧ୍ୟରୁ ଜଣକୁ ପ୍ରଭାବିତ କରିଥାଏ ଏବଂ ଏଆରପିକେଡି ପ୍ରାୟ ୨୦,୦୦୦ ପିଲାଙ୍କ ମଧ୍ୟରୁ ଜଣକ ଉପରେ ପ୍ରଭାବ ପକାଇଥାଏ । ପୁରୁଷ ଏବଂ ମହିଳା ସମାନ ଭାବରେ ବାରମ୍ବାର ପ୍ରଭାବିତ ହୁଅନ୍ତି ।
